Elshiniń «Egemenge» alǵysy

Jýyrda Japonııanyń Qazaqstandaǵy elshisi qyzmetine jańadan taǵaıyndalǵan Itıro Kavabata «Egemen Qazaqstan» gazetine kelip, basylym basshylyǵymen kezdesken bolatyn. Sol kezdesýde aldaǵy ýaqytta óziniń basty mindeti eki eldiń yntymaqtastyǵyn odan ári keńeıtý bolatynyn atap ótken elshi «Egemen Qazaqstan» gazetimen aradaǵy aqparattyq baılanysty damytýǵa erekshe den qoıatynyn aıtyp edi. Mine, kóp ýaqyt ótpeı sol ýaǵdalastyq alǵashqy nátıjesin bere bastady. Oǵan jaqynda gazetimizde jarııalanǵan Japonııanyń Parlamenttik vıse-mınıstri Motome Takısavanyń maqalasy bir mysal. Gazetimizdiń 27 tamyz kúngi nómirinde jaryq kórgen «Taǵdyrlas elderden – taǵylym» atty bul maqalada Japonııanyń Parlamenttik vıse-mınıstri elimizde ótken Semeı ıadrolyq polıgony jabylýynyń 25 jyldyǵyna arnalǵan halyqaralyq konferensııa jaıyndaǵy oıymen bólisti. Onda Japonııa men Qazaqstannyń ıadro zardabyn tartýda uqsas taǵdyrlaryn mysalǵa keltirip, elimiz atom qarýyna qatysty shynaıy aqıqatty erekshe túsinetin memleket bolyp sanalatynyn jetkizdi. Sondaı-aq, ol atalǵan konferensııanyń ótkizilýin quptaı otyryp, Qazaqstannyń osy máseledegi kóshbasshylyq róline qurmet sezimin bildirdi. Al keshe «Egemen Qazaqstan» gazetiniń basshylyǵyna Japonııanyń Qazaqstandaǵy elshisi Itıro Kavabata bul maqalanyń gazetimizde jaryq kórýine yqpal etip, qoldaý bildirgeni úshin rızashylyǵyn aıtyp, alǵys hat joldady. «Bolashaqta da bizdiń ekijaqty yntymaqtastyǵymyz ári qaraı jalǵasyn tabady dep senemin» delingen elshiniń hatynda. Iá, «eldestirmek – elshiden» degen osyndaı bolsa kerek-ti. «Egemen-aqparat»