Kóshpeliler kúresiniń kórigi qyzdy

Budan buryn habarla­ǵany­myzdaı, 3 qyrkúıek kúni keshke Qyrǵyzstannyń Ystyqkól oblysynyń ortalyǵy – Cholpon-Ata shaharynyń ıppodromynda Kóshpelilerdiń búkilálemdik II oıyndary saltanatty jaǵdaıda jalaý kóterdi. Oıyndardyń ashylý saltanatynda Qyrǵyzstan prezıdenti Almazbek Atambaev sóz alyp, qatysýshylar men qonaqtardy osynaý orasan zor oqıǵamen quttyqtady. Ol eldiń bir mezgilde 62 memlekettiń 1 myń adamǵa jýyq sportshydan turatyn úlken delegasııasyn qabyldaı alyp otyrǵanyna maqtanysh sezimin bildirdi. Qyrǵyz eliniń basshysy sońynda Oıyndardy ashyq dep jarııalady. Arada bir kún ótkennen keıin taıak tartysh jarysynyń jeńimpazdary men júldegerleriniń esimderi belgili boldy. Áıelder arasynda – 5, erler arasynda 7 salmaq dárejesi boıynsha ótti. Bul úleste Qazaqstan komandasy qorjynyna 1 kúmis, 2 qola medal tústi. Atap aıtqanda, bizden 65 kg salmaqta synǵa túsken Elmıra Ezyıamı – ekinshi, 85 kılodan aýyr salmaqta baǵyn synaǵan Sýraı Sharopova men 80 kg salmaqta kúsh baıqasqan Roman Grıgorev úshinshi oryndarǵa taban tiredi. Kelesi kúni kókpar men kúres túrlerinen jarystar sóreden shyqty. Munda birinshi kúni qazaqstandyq kókparshylar Qytaı komandasyn 15:1 etip oısyrata utty. Al keshe Qazaqstan jáne Qyr­ǵyzstan jasaqtarynyń óz toptarynda barlyq qarsylastaryn jeńip, fınalǵa shyqqandary belgili boldy. Oıyndarda qazaq kúresi týrnıri bárinen buryn márege jetti. Onda 5 salmaq dárejesiniń 4-inde bizdiń balýandar eshkimge des bermedi. Sonyń ishinde Talǵat Shegenov (60 kg), Ádilet Seıilhanov (70 kg), Dáýlet Pahrıdenov (80 kg) jáne Suńǵat Zákárıaev (90 kg) chempıon atansa, Elaman Erǵalıev (+90 kg) kúmis medaldi qanaǵat tutty. Qazir birinshi jarys kúniniń qorytyndysy boıynsha 10 altyn, 2 kúmis jáne 1 qola medal jınaǵan Reseı sportshylary komandalyq esepte birinshi orynda keledi. Ekinshi orynǵa 4 altyn, 2 kúmis jáne 2 qola medal alǵan Qazaqstan shyqty. Damır QOJAMQUL