Bolsa kerek búginnen erteń nurly

Búgin álemniń 206 eliniń sportshylary men bosqyndar quramalarynyń basyn qosyp, uzyn sany 974 medaldi sarapqa saldyrǵan, tabany kúrekteı 16 kún boıy Jer shary jurtynyń basym bóligin ózine kóz tigip, qulaq túrgizdirip qoıǵan Olımpıadanyń aıaqtalǵanyna týra 16 kún tolyp otyr. Rıo-de-Janeıronyń tórinde jarys kórigin qyzdyrǵan bul alamannyń qyzyǵy men qyzýy áli basyla qoıǵan joq. Kerisinshe, 2020 jyly Tokıoda ótetin kelesi Oıyndarǵa deıin aıtyla beretin onyń máni men mańyzy, salmaǵy men saraby týraly ádipti áńgimelerdiń kezegi aldaǵy kúnderdiń enshisinde jatyr. Endi olımpııalyq ýaqytpen birdeı mezgil ótkennen keıin biz de oǵan qaıta bir oralyp, Oıyndar qorytyndylary týrasynda qysqasha sóz qozǵap kóreıik. Birden aıtyp qoıaıyq, Qazaqstan sportshylarynyń Rıoda qol jetkizgen tabystary shyn máninde eresen erlikpen para-par boldy. Muny paıymdaý úshin bizge budan burynǵy Olımpıadalardaǵy kórsetkishter men esep-qısapty bezben basyna taǵy bir salyp ótýge týra keledi. Bárińizge belgili, Qazaqstan derbes komanda retinde alǵash ret qatysqan 1996 jylǵy Olımpııalyq oıyndarda 3 altyn, 4 kúmis jáne 4 qola medal jeńip alǵan bolatyn. Muny sporttyń 14 túri boıynsha saıysqa túsken 96 sportshymyz alyp keldi. Mine, budan keıingi kezeńderde bizdiń Olımpııalyq oıyndarǵa qatysqan sańlaqtarymyzdyń sany men olardyń jarysqan báıgeleriniń qatary udaıy ósip otyrdy. Osylaısha, biz 2000 jyly Sıdneıge 17 sport túri boıynsha 130 tarlanymyzdy apardyq. Olar «jasyl qurlyqtan» 3 altyn jáne 4 kúmis medal alyp qaıtty. 2004 jyly Afınada jalaý jelbiretken kelesi Oıyndarda sporttyń 17 túri boıynsha 119 sańlaq elimizdiń namysyn qorǵady. Bulardyń enshisine 1 altyn, 4 kúmis jáne 3 qola medal jazyldy. Budan keıin 2008 jyly Beıjińde kerýen kergen alaman 22 sport túrinen bizdiń 132 sportshymyzdy jarys joldaryna shyǵardy. Olar elge 2 altyn, 4 kúmis jáne 7 qola medalmen oraldy. Sóıtip, jalpy medal sanyn birinshi ret 13-ke jetkizdi. 2012 jyly Londonda tap osy medaldar sany jónindegi úzdik kórsetkish jáne bir qaıtalandy. Biraq bul kezdegi eń basty tabys sportshylarymyzdyń altyn medaldar sanyn 7-ge jetkizýi edi. Sol sııaqty qorjynǵa taǵy 1 qola jáne 5 kúmis medal tústi. Bulardy sporttyń 20 túri boıynsha saıysqa shyqqan 115 órenimiz júzege asyrdy. Al Brazılııa jerine 104 namysty ul-qyzdarymyz attanyp, 17 túrli saıys boıynsha júldeler úshin kúreske qatysty. Bulardyń alyp qaıtqandary 3 altyn, 5 kúmis jáne 9 qola medal boldy. Osynyń negizinde jalpy medaldar kórsetkishi jóninen 17-ge toqtap, taǵy bir rekordqa qulash urdyq. Al tap Oıyndar bastalar aldynda tórt birdeı Olımpıada chempıonymyzdyń joldaryna tosqaýyl qoıylmaǵanda, júldeler sanynyń budan da kóp bolatynynda eshbir kúmánimiz joq. Osylardyń bári bizdiń elimizde sporttyń kóptegen túri boıynsha alǵan baǵyt pen baǵdardyń durys ekenin baıqatady. Biz bul jerde, eń aldymen, aýyr atletterimizge rızashylyq bildirýimiz kerek. «Qanaty qaıyrylyp, tumsyǵy maıyrylyp» barǵan sol ujym qorytyndyda komandalyq esepte besinshi orynǵa turaqtady. Al taıaý kúnderde bul sapqa taǵy bir qola medaldiń qosylyp qalýy ábden múmkin. О́ziniń qaısybir Oıyndardan da altyn medal alyp kelý úrdisin jaqsy jalǵastyra bilgen boksshylarymyz da áspetteýge turady. Onyń ústine, buǵan deıin eń joǵary kórsetkishi 4 medaldan asyp kórmegen bylǵary qolǵap sheberleriniń bul joly 5 júldemen oralyp otyrǵanyn da umytpaý kerek. Sol sııaqty áıelder kúresiniń ókilderi de aıdy aspannan bir-aq shyǵardy. Osy sapta sýda júzý sportynan tuńǵysh ret altyn medaldyń alynýy bul salaǵa sony serpin beretin bolsa kerek. Munyń bárin nege aıtyp otyrmyz? Qazir ma­mandar men jankúıerler arasynda Oıyn­darǵa baryp qaıtqan sportshylarymyzben jattyq­tyrýshylarymyzdy jóndi-jónsiz synaýshylar kóbeıip ketti. Álbette, syn aıtylýy kerek. Ol endigi jumysty jaqsartý úshin de qajet. Biraq syn synaý úshin ǵana aıtylmaýy tıis. Bizdińshe, tıisti federasııalar men bapkerler shtabtary ózderiniń jibergen kemshilikteri men olqylyqtaryn syrt kózden de artyq biledi. Tek olardyń sol kemshin tustary men olqy jaqtaryn júıeli de josparly túrde jóndeýlerin tileıik. Bizdiń bala kúnimizde «Búginnen de bolady erteń nurly» dep keletin án joldary bolýshy edi. Al biz sportymyzdyń keleshegi búgingiden de áleýetti bola túsetinine, onyń buryn ózimiz úshin ógeı kórinip kelgen kóptegen túrleriniń órken jaıa bastaıtynyna senimdimiz. Buǵan Elbasynyń tikeleı tapsyrmasymen qazir biraz ýaqyttan beri ártúrli oblystar ortalyqtarynda salynyp kele jatqan alýan sıpatty sport saraılary tolyq dálel.  Serik  Pirnazar, «Egemen Qazaqstan»