Tirespen kelgen teń oıyn

Fýtboldan 2018 jylǵy álem chempıonaty irikteý jarysynyń E tobyna túsken Qazaqstan quramasy qyrkúıektiń 4-i kúni túnde týrnırdegi birinshi matchynda Polsha komandasyn qabyldady. Elordanyń «Astana-Arena» sport kesheninde ótken qyzyqty kezdesý 2:2 esebimen aıaqtaldy. Osylaısha sol kúni jasy 48-ge tolyp otyrǵan Talǵat Baısýfınov respýblıka terme jamaǵaty tizginin qolǵa ustaǵaly beri ótkizgen birinshi resmı oıynynda kúshti qarsylasymen teń nátıjege qol jetkizdi. Teginde, bıyl ǵana Eýropa chempıo­natynyń shırek fınalyna deıin barǵan toptyń negizgi favorıtimen ótetin kezdesýdiń bizdiń jigitter úshin ońaıǵa soqpaıtynyn aldyn ala bárimiz de shamalaǵanbyz. Munyń ústine, qarsylastardyń basy 2003 jyldan bastalatyn úsh kezdesýinde de polıaktar jeńip ketken. Alań ıeleri oıyndy óte erkin bastady. Olardyń senimdi oıyndary ádepkide qonaqtardy birshama tosyldyryp tastaǵandaı kórindi. Sondyǵynan bolar, olar kópke deıin dopqa ıelik ete almady. Biraq 9-mınýtta dop aıaqtaryna tıgen boıda quıyndaı quıǵytqan qarsy shabýyl uıymdastyryp, bizdiń shepke tez jetip keldi. Polıaktar aldymen sol qaptaldan qaqpa alańyna qaraı dop jóneltti. Oǵan bizdiń úsh birdeı qorǵaýshydan buryn jetken Bartosh Kapýstka aıaǵyn tosa qoıdy. Esep osylaı ashyldy. Al 35-mınýtta Robert Levandovskıı penaltıden esepti 2:0-ge jetkizdi. Biz osydan keıin óz koman­damyzdyń barlyq yntasy men múm­kindigi taýsylyp bitkendeı kórip edik. Biraq jigitter qaıtpady. Aldy­men eki oıynshyny qarsylastar qaq­pasy aldynda aldap ótken Baýyrjan Islamhan golkıper Lýkash Fabıanskımen bet-bet kelip, dopty baǵannyń janynan jiberdi. 42-mınýtta Maqsat Baıjanovtyń áýeletip jibergen dobyn Islambek Qýat bas­pen uryp, Fabıanskıdi taǵy bir synap úlgerdi. Komandalar ekinshi taımǵa buryn­ǵy quramdarymen oraldy.  Qazaqstan qura­masynyń beldi forvardy Sergeı Hıjnıchenko bas-aıaǵy jeti mınýttyń ishinde alańnyń opaı-topaıyn shyǵaryp, esepti teńestirdi de jiberdi. Ádepki gol 51-mınýtta jartylaı qorǵaýshy Dmıtrıı Shomkonyń sol qaptaldan aıyp alańy ishine dop jetkizýinen keıin salyndy. Ony keýdesimen qabyldap alǵan shabýylshy golkıper men qorǵaýshyny aldap ótip, qaqpa toryn búlik etkizdi. Budan keıin polıaktar eki ret standartty jaǵdaıdan dop urdy. Munyń sońy taǵy da alań ıeleriniń qarsy shabýylyna ulasty. Taǵy sol búıirden dop jetkizildi. Bul joly Maqsat Baıjanov forvardqa jol ashyp berdi. Sóıtip, esep teńesti de ketti. Jaǵdaıdyń bulaısha qalyptasýy, álbette, polıaktarǵa unaǵan joq. Sondyq­tan olar esterin jıyp alǵan­nan keıin qaıta shabýylǵa shyǵa bas­tady. Munda kóp rette Levandovskı urǵan doptardyń jolynan Shomko tabylyp jatty. Endi bir kezde Mılık alystan uryp, baǵyn synap kórmek boldy. Kelesi bir mezette Levandovskıdiń bergen dobyn Iаkýb Blashıkovskı jaqyn jerden uryp túsire almady. Munyń sońynan alań ıeleri buryshtama dobynan gol soǵyp ketýge sál qaldy. Osymen irikteý týrnırindegi birinshi oıyn eki quramaǵa teń nátıje ákeldi. Osy kúni osy toptaǵy Danııa quramasy Armenııany qabyldap, 1:0 etip utsa, Rýmynııa men Chernogorııa 1:1 esebimen teń tústi. Budan basqa, mynadaı nátıjeler tirkeldi: Chehııa – Soltústik Irlandııa 0:0, Norvegııa – Ger­manııa 0:3, Malta – Shot­landııa 1:5, Lıtva – Slovenııa 2:2, Slova­kııa – An­­glııa 0:1, San-Marıno – Ázer­baı­­jan 0:1. Qalǵan oıyndardyń bir­­sy­­pyrasy keshe ótse, sońy búgin oı­na­lady. Qazaqstan quramasy kelesi kezde­sýin 8 qazan kúni syrt alańda Cher­nogorııamen ótkizedi. Serik PIRNAZAR, «Egemen Qazaqstan» Sýretti túsirgen Orynbaı BALMURAT