Osynyń aldynda Dýterte AQSh prezıdentiniń ózine adam quqy týraly dáris oqyǵanyna kónbeıtinin aıtyp, Obamany bylapyt sózben tildegen bolatyn. Fılıppın prezıdenti Rodrıgo Dýterte esirtki mafııasyna qarsy júrgizip jatqan kúrestegi tym qatań sharalary úshin quqyq qorǵaýshylar tarapynan synǵa ushyrap jatyr. Dýterte prezıdent qyzmetine maýsymnyń sońynda kiristi. Sodan beri Fılıppınde esirtki saýdasyna qarsy kúreste 2000-nan asa adam qaza bolǵan. Dýterte prezıdenttik saılaý naýqany kezinde basty maqsaty eldegi narkomafııanyń tamyryna balta shabýǵa ýáde bergen-di. Ol turǵyndardy boı tasalap júrgen esirtki saýdagerlerin shetinen óltirýge shaqyrdy. Quqyq qorǵaýshylardyń aıtýynsha, Davao qalasynyń ákimi bolyp turǵan ýaǵynda Dýterte kúdiktilerdi sotsyz-tergeýsiz qyrǵyzyp otyrǵan.
