Elbasy Aqparat jáne kommýnıkasııalar mınıstri Dáýren Abaevty qabyldady

Kezdesý barysynda Memleket basshysy tıimdi aqparattyq saıasat júrgizýdiń, eldegi medıa keńistiktiń qaýipsizdigin qamtamasyz etýdiń mańyzdylyǵyn atap ótti, dep habıýarlady Prezıdenttiń baspasóz qyzmeti. – Jańadan qurylǵan mınıstrliktiń mańyzy zor. Búginde basty mindetterdiń biri – aqparat keńistigindegi túrli syn-qaterlerge tıimdi qarsy tura bilý. Sonymen qatar, halyq arasynda ekonomıkalyq ósimdi jáne turǵyndardyń ál-aýqatyn arttyrýdy qamtamasyz etý baǵytynda memleket qabyldap otyrǵan sharalar týraly túsindirý jumysyn tıisti deńgeıde júrgizý qajet, – dedi Qazaqstan Prezıdenti. Budan bólek, Nursultan Nazarbaev memlekettik BAQ-tyń basshylyq quramyn qalyptastyrý isine muqııat bolý qajettigine nazar aýdardy. – Joǵarǵy talaptarǵa saı keletin, shetel tilderin meńgergen jáne aqparat keńistiginiń basty úrdisterine sapaly taldaý jasaı alatyn adamdardy tańdaý kerek. Jalpy, memlekettik aqparat saıasatynyń máseleleri meniń basty nazarymda. Mınıstrliktiń qyzmetine tikeleı ózim jáne Prezıdent Ákimshiliginiń basshysy baqylaý jasaıdy. Basqa tulǵalardyń aralasýyna jol berilmeıdi, – dedi Memleket basshysy. Aqparat jáne kommýnıkasııalar mınıstri BAQ jumysynyń tıimdiligin arttyrý, sondaı-aq «bir tereze» qaǵıdaty boıynsha halyqqa memlekettik qyzmetter kórsetý isin ilgeriletý jóninde qabyldanyp otyrǵan sharalar týraly baıandady. Sondaı-aq, D.Abaev Qazaqstan Prezıdentin telekommýnıkasııa salasynyń qyzmet etý sapasyn arttyrýdaǵy mınıstrliktiń qyzmeti, sonyń ishinde «Sandyq Qazaqstan» baǵdarlamasyn ázirleý jumysy týraly habardar etti.