«Biz osyndaı ulttyq arnany armandaǵanbyz!»

«Qazaqstan» teleradıokorporasııasynyń jańa maýsymy el Táýelsizdiginiń 25 jyldyǵyna arnalady Apta basyndaǵy aıshyqty oqıǵanyń biri – Ulttyq arnanyń jańa telemaýsymynyń tusaýkeserlik «Bul – meniń Qazaqstanym!» atty keshi boldy. Almatydaǵy barsha zııaly qaýymnyń basyn qosqan saltanatty jıynda «Qazaqstan» teleradıokorporasııasy bul maýsym el Táýelsizdiginiń 25 jyldyǵyna arnalatyndyǵyn atap kórsetti. Bir jaǵynan kórermendermen qaýy­shý, ekinshi jaǵynan talǵampaz orta­ny shyǵarmashylyq bastamalarmen tanys­tyrý sıpatynda ótken kesh ulttyq arna­nyń ótkeni men búginin saralap, tamasha usynystar, aqyl-keńesterden de kende bolǵan joq. Keshke «Qazaqstan» RTRK» AQ Bas­qar­ma tóraıymy Nurjan Muhamedjanova qaty­syp, zııalylarmen dıdarlasyp, jańa maýsymnyń jaı-japsary týraly keńinen baıandady. Memleket ómiriniń aınasy ispettes ulttyq telearna komandasyna Ulttyq ǵylym akademııasynyń akademıgi, profes­­sor, Tóregeldi Sharmanov, Qazaq­stan­­nyń halyq ártisi Sábıt Orazbaev, Olım­pıada chempıony Jaqsylyq Úsh­kempirov, Qazaqstan Jazýshylar odaǵy tóraǵasynyń orynbasary Maral­taı Raıymbekuly sóz sóılep, óz sala­laryna qatysty usynyqty oılaryn ortaǵa saldy. Qarap otyrsaq, ulttyq arna – ult tulǵalarynyń da júrip ótken jolynyń ǵumyrnamasy. Qazaqstannyń halyq ártisi, Memlekettik syılyqtyń laýreaty, ánshi-kompozıtor Eskendir Hasanǵalıev mádenı baǵdarlamalarǵa qatysty pikirin aıtyp, ózi osy arnada 46 jyl áýeletken «Atameken» ánin shyrqady. Kesh barysynda telearna jetekshisi N.Muhamedjanova «Qazaqstan» Ulttyq arnasynyń 2016-2017 jyldarǵa arnalǵan tusaýkeserin ótkizý – korporasııa úshin bir ja­ǵynan úlken jaýapkershilik bolsa, ekin­shi jaǵynan mereıli mindet ekenin aıtty. «Táýelsizdiktiń 25 jyldyq toıy qarsańynda merekelik maýsymdaǵy ?baǵdarlamalar men teletýyndylardy tanystyrýdy azattyqqa besik bolǵan arý qaladan bastaǵandy durys sanadyq. Jáne taıaý kúnderi Almaty óziniń 1000 jyl­dyq toıyn ótkizedi. On ǵasyr boıy tarıhtan oıyp turyp oryn alǵan qala­nyń qýanyshyna úles qosýdy ózimizdiń azamattyq paryzymyz dep bilemiz. Úshinshiden, sonaý 1958 jyly televızııa salasyna besik bolǵan da osy qala. Sońǵy jyldary bizdiń korporasııa turaqty túrde Astanada jumys istep jatqanymen, Almaty bizdiń ujym úshin ushqan uıa, túletken ystyq meken sanalady. Taǵy bir sebepti aıta keteıin, bizdiń Elbasynyń tikeleı tapsyrmasy boıynsha barlyq habardy memlekettik tilde taratyp kele jat­q­anymyzǵa bıyl 1 qyrkúıekte 5 jyl toldy. Ulttyń zııaly qaýymynyń qaı­maǵy Almatyda toptasqan soń biz qazaq tilindegi jańa jáne jańarǵan baǵdarlamalarymyz ben endi túsirilip bitken teleserıaldarymyzdy ózderi­ńizdiń aq batalaryńyzben bastaǵan­dy jón kórdik», – dedi Nurjan Jalaýqyzy. Basqarma tóraıymy telearna ónim­derine de toqtaldy: «Televızııanyń habarlary berilýine qaraı kúndelikti, aptalyq jáne bir jolǵy bolyp bólinetinin bilesizder. Bizdiń kúndelikti beriletin baǵdarlamalarymyz «Tańsholpanmen» bastalyp, «Túngi stýdııada Nurlan Qoıanbaevpen» aıaqtalady. Onyń arasynda «Birge tańdaımyz!» ben «Áıel baqyty», «Aıtýǵa ońaı...» baǵdarlamalary jáne birneshe ret jańalyqtar toptamasy qaıtalanady. Bul baǵdarlamalar jańa maýsymda jalǵasady. Kórermenge bılikti neǵurlym jaqyndatý bıylǵy jyldyń basty ustanymy bolmaq. Buǵan apta saıyn shyǵatyn «Serpilis», «Qoǵamdyq keńes» jáne «Suhbat» baǵdarlamalary dálel bolady. Elbasy el aldyna qoıǵan Bes ınstıtýttyq reformany júzege asyrý boıynsha qazir barlyq aımaqtarda qoǵamdyq keńester jumys isteıdi. Munda talqylanǵan taqyryptar bizdiń aptalyq «Qoǵamdyq keńes» atty jańa baǵdarlamamyzdyń ózegine aınalady. Al árkim óz kókeıinde júrgen saýalǵa týra jaýap alýy úshin osy aıdan bastap «Suhbat» atty tikeleı efırde ótetin baǵdar­lama ashyp jatyrmyz. Jańa maý­symda talantty aqyn Qalqa­man Sarın júrgi­zetin «Oı-tolǵaý» baǵdar­lama­sy efır­ge shyǵady», – dedi N.Muhamedjanova. Jeke jobalarǵa da toqtalǵan Basqarma tóraıymy: «Televızııany synaǵandar kóbi­nese «bular shetel juldyzdaryna ta­byn­ǵysh» dep jatady. «Qazaqstan» Ult­­tyq arnasy óz tórin tek ultymyzdyń óner­­li, talantty tulǵalaryna usynady. Bıyl­­ǵy maýsymda «Uly Dala balasy» at­ty joba tabysty júrip jatyr. Onda án­­shi Tóreǵalı Tóreáli Qazaqstannyń bir­­ne­she aımaǵynda bolyp, el ómiriniń jaq­­sy­­l­yq­qa qaraı ózgergenine kýá bol­dy. El Táýel­sizdiginiń 25 jyldyǵyna ar­nal­­ǵan bul arnaıy jobamyzdyń reı­tın­­gi óte joǵary. Ulttyq ónerge degen qam­­qor­lyq­tyń jáne bir kórinisi ja­qyn kún­deri ek­ranǵa jol tartatyn «MýzART LIVE» jo­basy. Ondaǵan jyl boıy bar­sha­ńyz­dy án­men terbegen atal­mysh top­tyń mú­she­leri endi búkil qazaq dalasy­nan ózderi sııaqty talantty jastardy izdeıdi», – dedi. Sondaı-aq, birneshe jyldan beri Ulttyq arna otandyq teleserıaldar túsirýdi qolǵa alǵany belgili. Kórermen jyly qabyldaǵan «Syrǵalym», «Qarashańyraq», «Kók tarlandary», «Aıaýly arman», «Ápke» syndy serıal­dar ábden tanys. Telearna ústimizdegi jyldyń basynda aqyn Jambyl Jabaev týraly tórt bólimdi derekti de kór­kem fılm túsirgen. Onyń bir jarym saǵat­tyq nusqasy kınoteatrlarda kórsetildi. «Qazaqstannyń Táýelsizdik jyl­daryn­da júrip ótken joly eshkimniń oıy­nan shyqpaýy kerek. Osyny eskere otyryp, biz kóp serııaly «Aıman-Shol­pan» telehıkaıasyn túsirdik. Aldaǵy kúnderi efırge shyǵatyn taǵy bir serıal «Shekara shebinde» dep atalady. Mine, mereıli de merekeli jyly sizderdiń aldaryńyzǵa usynatyn ónimderimizdiń bir bóligi osyndaı. «Bul – meniń Qazaqstanym!» dep barshamyz maqtanyp júreıik!» – dep sózin aıaqtaǵan Basqarma tóraıymynyń sózin tulǵaly azamattar tamasha oı-pikirlerge ulastyrdy. «Biz 100 paıyz memlekettik tilde habar taratatyn osyndaı ulttyq arnany arman­daǵan­byz!», – dedi Memlekettik syılyqtyń laýreaty, jazýshy Dýlat Isabekov. Aıta ketý kerek, jańa telemaýsym keshi barysynda Qazaqstannyń eńbek sińirgen ártisteri jáne «Qurmanǵazy» orkestri men «Hassaq» etnofolklorlyq toby óner kórsetti. Tanymal óner adam­dary ánnen shashý shashty.  Aınash ESALI, «Egemen Qazaqstan» ALMATY