1992
* 28 qarashada Prezıdent N.Á.Nazarbaevtyń «Qazaqstan Respýblıkasynyń ýaqytsha ımporttyq keden tarıfi týraly» Jarlyǵy shyqty.
* 1 jeltoqsanda Abaı atyndaǵy opera jáne balet teatrynda Ǵabıden Mustafınniń týǵanyna 90 jyl tolýyna arnalǵan saltanatty kesh ótti. Al «Egemendi Qazaqstan» gazetiniń 2 jeltoqsandaǵy nómirinde kórnekti ádebıettanýshy, ǵalym Serik Qırabaevtyń «Zamana jyrshysy» taqyrybymen Ǵ.Mustafın týraly kólemdi maqalasy jarııalandy.
* 2 jeltoqsanda Ortalyq konsert zalynda Roza Baǵlanovanyń týǵanyna 70 jyl tolýyna arnalǵan kesh uıymdastyryldy. Jıyn barysynda «Egemendi Qazaqstan» gazetiniń bas redaktory, Halyq jazýshysy Ábish Kekilbaev «Qazirgi jer basyp júrgen qazaq násiliniń keıingi jarty ǵasyr ishinde Roza áninsiz, Roza úninsiz keshken saǵaty bolsa bolar, Roza áninsiz, Roza úninsiz keshken kúni bolǵan joq», – dep, júrekjardy lebizin bildirdi.
* 4 jeltoqsanda Elbasy N.Á.Nazarbaevtyń «Kóp balaly otbasylaryn áleýmettik jaǵynan qoldaý jónindegi sharalar týraly» Jarlyǵy shyqty. Jarlyqqa sáıkes 18 jasqa deıingi tórt jáne odan da kóp balasy bar otbasylarǵa birqatar jeńildikter men artyqshylyqtar belgilendi. Sondaı-aq, osy kúni Prezıdent N.Á.Nazarbaev «Memlekettik basqarý organdary laýazymdy adamdarynyń tártip, qoǵamdyq tártip jáne qaýipsizdik jaǵdaıyna jaýapkershiligin arttyrý týraly» qaýlyǵa qol qoıdy.
* 7 jeltoqsanda Prezıdent Nursultan Nazarbaev Almaty stýdentterimen jáne shyǵarmashylyq jastar ókilderimen kezdesti. Qazaq memlekettik ekonomıka ýnıversıtetinde ótken jıynda Elbasy joǵary mektepti damytýdyń jańa baǵdarlamasynyń negizgi baǵytyna toqtala kelip, eń basym baǵyttardyń qatarynda bilim berýdiń shynaıy izgilendirilýi men demokratııalandyrylýyn qamtamasyz etýdi, ekonomıkanyń naryqqa kóshýin eskere otyryp, ulttyq jáne jalpy adamzattyq qazynalar negizinde jeke adamnyń ósip-jetilýi úshin jaǵdaı jasaýdy atady.
* 8 jeltoqsanda Almaty joǵary jalpy áskerı komandalyq ýchılıshesinde Qazaqstan Qarýly Kúshteri basshy quramynyń aldynda Prezıdent Nursultan Nazarbaev sóz sóılep, áskerimizdiń qalyptasýy men damýy problemalaryna toqtaldy.
* 9 jeltoqsanda Parlament úıinde Joǵarǵy Keńestiń IH sessııasy ashyldy. Alǵashqy kúngi keshki májiliste Prezıdent, Konstıtýsııalyq komıssııanyń Tóraǵasy Nursultan Nazarbaev baıandama jasap, Konstıtýsııanyń jobasyn talqylaýǵa 3 mıllıonnan astam adam qatysyp, olar 18 myńnan astam usynystar men eskertýler engizgenin, oǵan qosa, eldiń Negizgi Zańynyń basty-basty qaǵıdalaryn tarata aıtyp berdi.
* 11 jeltoqsanda Qazaqstan Respýblıkasy memlekettik gımniniń mátini bekitildi. Avtorlary – Muzafar Álimbaev, Qadyr Myrzalıev, Tumanbaı Moldaǵalıev, Jadyra Dáribaeva. Gımn mátini notasymen qosa «Egemendi Qazaqstan» gazetinde 15 jeltoqsan kúni jarııalandy.
*14 jeltoqsanda Almatyda Qazaqstan halyqtarynyń tuńǵysh forýmy ótti. «Biz barlyǵymyz qarapaıym turǵyndar ǵana emes, Qazaqstan Respýblıkasynyń azamattarymyz! Sondyqtan adamǵa laıyq ómir jolyn tańdaǵan, urpaqtar aldynda jaýapkershilikti moınyna alǵan óz memleketimiz úshin maqtanysh sezimine bólenip, birtutas otbasy sezimin sezinýge, qazir búkil dúnıejúzi biletin respýblıka Týyn, Eltańbasyn, Ánuranyn ardaqtap, qurmetteýge tıispiz», – dedi Prezıdent forýmǵa jınalǵandar aldynda sóılegen sózinde. Forýmda Prezıdenttiń Beıbitshilik pen rýhanı tatýlyq syılyǵy alǵash ret tapsyryldy.
* 15 jeltoqsanda Almatydaǵy Respýblıka saraıynda Táýelsizdigimizdiń bir jyldyǵyna arnalǵan saltanatty jınalys ótti. Prezıdent Nursultan Nazarbaev Qazaqstan táýelsizdiginiń alǵashqy jyldyǵy týraly baıandama jasady. Baıandamanyń mátini «Egemendi Qazaqstan» gezetiniń 16 jeltoqsanyndaǵy nómirine basyldy.
*16 jeltoqsanda Almatydaǵy Respýblıka alańynda Qazaqstan táýelsizdiginiń birinshi jyldyǵyna arnalǵan mıtıngi ótti. Mıtıngige jınalǵandardy Prezıdent Nursultan Nazarbaev mereıli merekemen quttyqtady.
* 22 jeltoqsanda Qazaqstan Respýblıkasy Joǵary Keńesi Tóralqasynyń «Qazaqstan Ortalyq Atqarý Komıteti men KAKSR Halyq Komıssarlary Keńesiniń 1928 jylǵy 27 tamyzdaǵy «Baı sharýashylyqtardy tárkileý týraly», 1928 jylǵy 13 qyrkúıektegi «Asa iri jáne jartylaı feodal baılardy tárkileý men jer aýdarýǵa qarsy áreket jasaǵany úshin qylmystyq jaýaptylyq týraly» jáne 1930 jylǵy 19 aqpandaǵy «Jappaı uıymdastyrý aýdandarynda aýyl sharýashylyǵyn sosıalıstik jolmen qaıta qurýdy nyǵaıtý jónindegi jáne kýlaktar men baılarǵa qarsy kúres jónindegi sharalar týraly» qaýlylaryn zertteý jónindegi Qazaqstan Respýblıkasy Joǵarǵy Keńesiniń Tóralqasy komıssııasynyń qorytyndylary men usynystary týraly» qaýlysy jarııalandy.
* 26 jeltoqsanda Almatydaǵy respýblıkalyq Oqýshylar saraıynda Prezıdent shyrshasy uıymdastyryldy. Sol joly Qazaqstannyń túkpir-túkpirinen kelgen 650-ge jýyq bala Jańa jyldy qarsy alý qýanyshyn Elbasymen birge bólisti. Balalar úıleri men kóp balaly otbasylardyń ul-qyzdary qatysatyn bul shara keıinnen dástúrge aınaldy.
28 jeltoqsanda Qazaqstan Respýblıkasynyń memlekettik jáne qoǵamdyq ómiriniń mańyzdy máseleleri boıynsha sheshimder qabyldaý úshin usynystar ázirleý, ókimettiń ókiletti jáne atqarýshy organdarynyń qyzmetin úılestirý maqsatynda Prezıdent N.Nazarbaevtyń konsýltasııalyq keńesýshi organ – Respýblıka Keńesin qurý týraly Jarlyǵy shyqty.
*29 jeltoqsanda Respýblıka Ǵylym akademııasynyń jalpy jınalysynyń sessııasy bolyp ótti. Ǵylym akademııasynyń prezıdenti О́mirzaq Sultanǵazın eldegi ǵylymı-tehnıkalyq saıasat tujyrymdamasynyń jobasy týraly baıandap berdi. Osy kúni Almatyda Qazaqstan men Ýkraına úkimet delegasııalarynyń kelissózi aıaqtaldy. Kelissózdiń qorytyndysy boıynsha óte mańyzdy bes kelisimge qol qoıyldy. Olardyń biri Ýkraınanyń rýbl aımaǵynan shyǵýyna baılanysty ózara qaryz mindettemeleri men nesıe talaptaryn retteýdi kózdeıdi.
* 31 jeltoqsanda Táýelsizdik tarıhynyń alǵashqy tutas jyly aıaqtaldy. «Egemendi Qazaqstannyń» 31 jeltoqsan kúngi nómirinde jarııalanǵan redaksııalyq maqalaǵa «Áli konstıtýsııalyq turǵyda bekip úlgermegen táýelsizdigimiz qaz basyp, apyl-tapyl qadam jasap, tusaýkeser shaǵyna jetti. Qazaqstandy álemniń qanshama memleketi tanyp, nebir aıdarynan jel esken elder respýblıkamen dıplomatııalyq baılanys ornatýǵa múddelilik tanytty. Qazaq eli Birikken Ulttar Uıymy sekildi dúnıejúzilik qoǵamdastyqqa múshe bolyp, álemdik kóptegen qurylymdarǵa qabyldandy. Bul – shyn máninde el abyroıyn asqaqtatar oqıǵalar»; «Degenmen, 1992 jyldyń tynysty taryltyp, qabyrǵany qaıystyrǵan qıyndyqtary da az bolǵan joq. О́ndiris quldyrap, qymbatshylyq árkimniń-aq qaltasyn taqyrlatty. Al tesik qalta jandardy tıtyqtatyp-aq tastady»; «Solaı bolsadaǵy 1992-ge artyq min taǵýdyń esh reti joq. Ol ótpeli kezeńdegi óziniń tarıhı mindetin atqarǵan jyl boldy. Sol úshin de ony jyly qabaqpen, barymyzdy bazarlaı otyryp shyǵaryp salǵan jón kórinedi», – degen shúkirshilikke, qanaǵatshyldyqqa boı aldyra aıtylǵan sózder arqaý boldy.
