Qazaqstannyń jas geologtary Japonııadan júldeli oraldy

Investısııalar jáne damý mınıstrliginiń málimetinshe, qazaqstandyq jas geologtar komandasy 20-27 tamyz aralyǵynda Japonııada ótken IESO – 2016 Jer týraly halyqaralyq ǵylymı olımpıadasynan júldemen oraldy. Olımpıadaǵa elimizdiń atynan 4 oqýshy qatysqan. Astana qalasy №4 gımnazııa-mektebiniń 10-synyp oqýshysy Álııa Jaǵyparova jeke synaqta qola medalǵa qol jetkizdi, sondaı-aq halyqaralyq komanda quramynda Jer týraly ǵylymdar jónindegi jobada birinshi orynǵa ıe boldy. Nazarbaev zııatkerlik mektebiniń 10-synyp oqýshysy Baımýrzına Ádııa ITFI (Halyqaralyq komandalyq dalalyq zertteý) saıysynda úzdik atandy. Sonymen qatar, Nazarbaev zııatkerlik mektebiniń 10-synyp oqýshylary Aımýhambetova Ázıza men Tólegenova Arýjan da barlyq saıystarǵa belsendi qatysyp, elimizdi laıyqty deńgeıde tanyta aldy. «Jas geolog» korporatıvtik qorynyń dırektory Janat Ismaılovanyń aıtýynsha, Qazaqstan komandanyń ulttyq kostıýmmen óner kórsetýi olımpıadanyń jabylý saltanatyna arnalǵan gala-konsertke erekshe kórik berdi. Sondaı-aq, olımpıada aıasynda qatysýshylar men qonaqtardy EKSPO 2017 kórmesine shaqyrý retinde bizdiń qonaqjaı elimiz týraly beınerolık kórsetildi. Aıdar О́RISBAEV