Otandyq áskerı tehnıkalar ozyp tur

Máskeý oblysynyń Kýbınka qala­synda ótip jatqan «Armııa-2016» II halyqaralyq áskerı-tehnıkalyq forýmyna qatysyp jatqan otandyq áskerı tehnıkalar men osy maqsatta qol­danylatyn qural-jabdyqtar sala mamandarynyń joǵary baǵasyna ıe boldy. Tipti, óz ónimderimiz kórermenderdiń nazary aýǵan erekshe pavılondardyń birine aınaldy. Sonyń ishinde, ashyq alańda erekshe kózge túsken qos tehnıka – BTR «Barys 8x8» jáne «SARP» 12,7 mm jaýyngerlik modýli bar «Arlan» brondalǵan dóńgelekti mashınasy otandyq áskerılerdiń upaıyn túgendep, sarapshylardyń tańdaıyn qaqtyrdy. Halyqaralyq deńgeıdegi mundaı forýmǵa alǵash ret qatysyp otyrǵan qazaqstandyq «Barys» pen «Arlan» tobynyń tehnıkalary men ónerin kórermender qaýymy «Alabıno» synaq alańynda tamashalady. Bul jerde qazaqstandyq kásiporyndar 184 sharshy metrlik stendte 46 tabıǵı úlgi men 13 áskerı jáne qos maqsattaǵy makettik ónimderdi kórsetilimge qoıǵan eken. Apta sońyna deıin jalǵasyn tabatyn kórme aıasynda otan qorǵaýshylar halyqaralyq sheńberdegi nemese ár túrli deńgeıdegi jattyǵýlardy oryn­daýda sońǵy birneshe jyldan beri paıdalanylǵan uıaly baılanys quraldaryn qoldanýdyń jańasha ádis-tásilderin tanystyratyn bolady. Sondaı-aq, Mı-17V-5 jáne Mı-8 tikushaqtarynyń nobaılary kórmege qoıylady dep josparlanǵan. «Zhasampaz» konsorsıýmy bolsa, «Ar­mııa-2016» forýmynyń qatysý­shylary men meımandaryna «Tynys» AQ zaýytynyń brondy keýdeshelerin, qazaqstandyq óndiristiń dýlyǵalary men áskerı kıim-keshegin kórsetedi dep kútilýde. Nurlybek DOSYBAI, «Egemen Qazaqstan»