Sheteldik qylqalam sheberleri

Almatynyń 1000 jyldyǵyna tartý jasady Tamyz aıaqtalar tusta Jetisý ólkesiniń kórikti jerlerinde 12 elden kelgen, 30-ǵa tarta qyl­qalam sheberi men 60-tan astam fotosýretshi bas qosyp, «Uly Dala boıaýlary» atty ha­lyqaralyq sımpozıýmdy bastap bergen-di. Almatylyqtar sol sýretshilerdiń qolynan shyq­qan ǵajaıyp óner týyndylaryn tamashalaıtyn kún de kelip jetti. Sonymen, megapolıstegi «Mega» oıyn-saýyq ortalyǵynda ple­nerlik jumystardyń kórmesi ótti. Anyǵyraǵy bul sımpozıým 26 tamyz kúni bastaý alǵan bolatyn. Sımpozıým barysynda sýret­shiler men fotosýretshiler  «Kólsaı kólderi» memlekettik ulttyq tabıǵı parkinde, Sharyn shatqalynda, «Tańbaly tas» qo­ryǵynda, Úshqońyrda, Alataý bókterinde, Almaty qalasy men Almaty oblysynyń kórikti jer­lerinde bolyp, Uly Dala – Qa­zaq eliniń ásem jerleri men ta­bıǵatyn, taýy men dalasyn sýretke túsirip, ǵajap kórinisin ár qyrynan saldy. Reseı, Qytaı, Koreıa, Polsha, Armenııa, Qyrǵyzstan, Vengrııa, Fınlıandııa sııaqty shet memleketterden kelgen sýretshiler ulttyq qoryqtardyń tarıhymen, ósimdikteri jáne janýarlar dúnıesimen de tanysyp, saıahat jasap qaıtty. Kórmeniń ashylýynda atalmysh sharanyń uıymdastyrýshysy, Qazaq memlekettik qyzdar peda­gogıkalyq ýnıversıtetiniń rektory Dınar Nóketaeva: «Búgingi kórmede sheteldik sýretshilermen qatar, qazaqstandyq sýretshi­lerdiń de tyń týyndylary qoıy­lyp otyr. Qazaq dalasynyń ásem beınesin, kórkemdigi men kere­mettiligin kenepke túsirgen naǵyz talanttar – qylqalam sheber­leriniń sýretteri tarıhqa qosyl­ǵan úles jáne Almaty qalasynyń 1000 jyldyǵyna úlken tartý bolmaq!», dedi. Osy arada kórmeni tegin uıymdastyrýǵa «Astana Group» kompanııasynyń prezıdenti, belgili kásipker Nurlan Smaǵulov pen «Qazaqstan Halyq banki» AQ Dırektorlar keńesiniń tór­aǵasy Aleksandr Pavlov muryn­dyq bolǵanyn aıta ketken jón. «Men qashan da beıneleý, sýret ónerin qadirleımin, árqa­shanda qoldaımyn. Almatynyń 1000 jyldyǵyna oraılastyrylyp otyrǵan bul sharaǵa biz de atsalysqanymyzǵa qýa­nysh­ty­myz. Birinen biri erekshe­le­netin sýretterdiń barlyǵy kó­ńilimnen shyqty, erekshe áser aldym», degen kásipker-kol­lek­sıoner Nurlan Smaǵulov sý­ret­shilerdiń týyndylaryn oıyn-saýyq ortalyǵynda saty­lymǵa qoıýdy usyndy. Bir aptaǵa jalǵasatyn kórmege kelýshiler sýretshilerdiń týyndylaryn tamashalap qana qoımaı, satyp alýǵa da múmkindik ala alady. Kórmege plenerde salynǵan sýrettermen qatar, qylqalam sheberleriniń boıaýy keppegen týyn­dylary da qoıyldy. Foto­sýretshiler de óz elderinen ala kel­gen tańdaýly degen óz sýret­terin ónersúıer qaýym nazaryna usyndy. Shara sońynda sımpozıýmǵa qatysqan sýretshiler sertıfıkattarmen jáne arnaıy dıpomdarmen marapattaldy. Aınash ESALI, «Egemen Qazaqstan» ALMATY