Serpindikter serpilisi

«Máńgilik El jastary – ındýstrııaǵa!» jobasy sheńberinde qabyldanǵan «Serpin-2050» baǵdarlamasy oblysta oıdaǵydaı oryndalyp keledi. Jastardy jan-jaqty qoldaýǵa arnalǵan baǵdarlama qoldanysqa engeli ońtústik óńirlerden kelgen bir myńǵa jýyq talapker joǵary jáne arnaýly oqý oryndarynda bilim alyp júr. Yntaly jastar bolsa, zaman talabyna saı mamandyq alyp shyqqannan keıin teriskeıde qalyp, jumys isteýdi basty maqsat etip otyr. – Alǵashqy lek Petropavl temirjol kóligi kolledjine ornyq­qan bolatyn. Sodan beri olardyń qatary tolyǵyp, serpindi kúshke ıe boldy. Stýdentterdiń basym bóliginiń kóp balaly otbasylardan shyqqany eskerilip, áleýmettik qoldaý maqsatymen memleket tara­pynan arnaıy qarajat bó­lin­gen. Onda jataqhanada turý, úsh mezgil tamaqtaný, bir­jolǵy kıiný, shákirtaqy tóleý máseleleri qamtylǵan. Budan bólek M.Qozybaev atyndaǵy Soltústik Qazaqstan memlekettik ýnıversıtetinde kúngeıden arman qýyp kelgen júzdegen talapty jastar bar, – dedi sóıleskenimizde oblystyq bilim basqarmasy kásiptik-tehnıkalyq bilim berý jáne kadrlar daıarlaý bóliminiń basshysy Alma Qusaıynova. Jýyrda eń joǵary upaı jınaý arqyly tegin oqý quqyna ıe bolǵan úmitkerler joǵary jáne arnaýly oqý oryndaryna saltanatty jaǵdaıda qabyldandy. Elbasynyń «Sender – bolashaqqa degen úkili úmitimizdiń tiregisińder. Bizdiń búgingi atqaryp jatqan qyrýar sharýalarymyz tek sender úshin jasalýda. Sender táýelsiz Qazaq eliniń perzentterisińder. Táýelsiz elde týyp, táýelsiz elde tárbıe aldyńdar. Senderdiń azat oılaryń men kemel bilimderiń – elimizdi qazir bizge kóz jetpes alysta, qol jetpes qııanda kórinetin tyń maqsattarǵa aparatyn qudiretti kúsh» degen qanatty sózderin tý etken olar jaqsy oqyp, sapaly bilim alyp, aldyńǵy lekten kórinýdi basty maqsat sanaıdy. Solardyń biri Qarashash Jeńis «Serpin» baǵdarlamasy arqasynda grant utyp alyp, M.Jumabaev atyndaǵy gýmanıtarlyq kolledjdiń stýdenti atandy. Bolashaqta áleý­mettik qyzmetker bolýdy armandaıdy. Petropavl qurylys-ekono­mıkalyq, temirjol kóligi, J.Qızatov atyndaǵy Esil aýyl sha­­rýashylyq, Soltústik Qazaq­stan kásiptik-pedagogıkalyq kolledjderine suranys mol. Atalǵan bilim uıymdarynda oqý-materıaldyq baza jaqsy jab­dyqtalǵan. Bilim berýdiń dýaldy tehnologııasy qoldanylady. Bir sózben aıtqanda, bilim berý standarttary talapqa saı. Alma Muhamedqalıqyzynyń aıtýynsha, atalmysh baǵdarlama boıynsha mamandyq alyp shyqqan túlekterdiń kedergisiz jumysqa turýy mekeme-kásiporyndarmen ekijaqty yntymaqtastyq kelisim-shart negizinde júzege asatyn bolady. «Máńgilik El jastary – ındýs­trııaǵa!» memlekettik baǵdar­lamasy jumys kúshi az teriskeıde kadr jetispeýshiligin azaıtýdy, demografııalyq ahýaldy retteýdi ditteıtinin eskersek, jyl ótken saıyn serpindikter serpilisiniń artyp kele jatqany qýantady. О́mir ESQALI, «Egemen Qazaqstan» Soltústik Qazaqstan oblysy