Soltústik Koreıa eń iri ıadrolyq synaq jasady

    Búgin Astana ýaqytymen saǵat 6.30-da Soltústik Koreıa el tarıhyndaǵy besinshi jáne eń úlken ıadrolyq synaq jasady. Bul jónindegi aqparatty Ońtústik Koreıanyń áskerılerine silteme jasaǵan BBC News taratty. Mamandardyń aıtýy boıynsha, bul synaq Kım Chen Yn rejıminiń ıadrolyq qarý salasynda aıtarlyqtaı ilgerilegenin bildiredi.   «Qaıǵyly kún» Jarylǵan bombanyń qýaty Kalıfornııa ınstıtýtynyń mamany Djeffrı Lıýıstiń joramaly boıynsha 30 kılotonna dep habarlaıdy Reuters. «Bul búginge deıin Soltústik Koreıa jasaǵan synaqtardyń eń irisi. Aıtary joq, qaıǵyly kún» dedi ol Lıýıs. Jarylystyń kúshtiligi sonsha, synaq jasalǵan aımaqta qýaty  5,3 ballǵa teń jer silkinisi sezilgen.   «Baryp turǵan esýastyq» Ońtústik Koreıa soltústiktegi kórshisiniń bul isin qatań aıyptady. El prezıdenti Pak Kyn He ıadrolyq synaqty adamzattyń «óz-ózin joıý aktisimen» qatar qoıyp, Kım Chen Yndy «baryp turǵan esýas» dep atady.  Ol bul oqıǵaǵa baılanysty óziniń sheteldegi saparyn úzip, eline oralýǵa májbúr boldy. Búgin Astana ýaqytymen 11-ler shamasynda Phenıan besinshi ıadrolyq synaqtyń jasalǵanyn jáne onyń sátti bolǵanyn resmı túrde rastap, habar taratty. Soltústik Koreıa jasaǵan asa qýatty ıadrolyq synaq álemdi dúr silkindirgen oqıǵa bolyp otyr. Jańa málimetterdi habarlaıtyn bolamyz.