Jańa úkimet jaqyn kúnderi bekitiledi - Elbasy

Jaqyn kúnderi Úkimettiń jańa quramy qalyptastyrylady. Bul týraly búgin Úkimettiń keńeıtilgen otyrysynda Memleket basshysy Nursultan Nazarbaev málim etti dep habarlaıdy QazAqparat. «Búgin tapsyrmalardy berdim. Osy rette Astanaǵa kelgen óńir ákimderi tıisti kezdesýlerdi ótkizińder. Búgin-erteń, taıaý arada Úkimettiń quramy qalyptastyrylyp, taǵaıyndalatyn bolady, ıaǵnı jumysqa kirisedi. Elimizge, halqymyz úshin birigip jumys isteıik! Barlyqtaryńyzǵa sáttilik tileımin!»,-dedi Prezıdent. Budan buryn habarlanǵandaı, Elbasy Nursultan Nazarbaev  qazirgi ýaqytta otstavkadaǵy Úkimette aıta qoıarlyqtaı ózgerister bolmaıtynyn aıtqan bolatyn. «Úkimette jalpy ózgeristerdiń bolyp jatqanyn estip, bilip otyrsyzdar. Onyń ózindik logıkasy bar. Bul - birinshiden. Ekinshiden - qaýipsizdik máselesin kúsheıtý, nyǵaıtý  máselesi de bar. Sodan  keıin men Kárim Másimovti óziniń kelisimi boıynsha qajetti jerge taǵaıyndadym. Tájirıbesi bar. Respýblıkanyń jaǵdaıyn biledi dep taǵaıyndadym.  Premer-Mınıstrdi qyzmetinen bosatýyma baılanysty qazir Úkimet otstavkada. Kóp sozbaı bárin sheshetin bolamyz. Jańa basshylardy da, jańa mınıstrlerdi de. Onsha kóp  ózgerister bola qoımas dep oılaımyn. Sebebi Úkimet  qıyn-qystaý jaǵdaıda júktelgen tapsyrmany oryndap jatyr», - dedi N.Nazarbaev.