Mınıstrlik dárilerdiń zııany týraly aqparatty joqqa shyǵardy

Densaýlyq saqtaý jáne áleýmettik damý mınıstrligi «dárilik preparattar allergııalyq reaksııa týyndatyp, balalardyń ólim-jitimine sebep boldy» degen aqparatty joqqa shyǵardy. Birshama ýaqyt buryn bul aqparat WhatsApp jelisi arqyly keńinen taralǵan bolatyn. «Densaýlyq saqtaý jáne áleýmettik damý mınıstrligi dárilik quraldardyń janama áserine turaqty túrde monıtorıng júrgizip otyrady. 2016 jyldyń 19 qyrkúıegindegi málimet boıynsha allergııalyq reaksııa týyndatyp, balalardyń ólim-jitimine sebep boldy degen dárilik quraldar (amoksısıllın, kapesýla, ıbýprofen (sýspenzııa), alklofenak, angısept, sýmamed, ıngalıpt, ınflıýsıd, balalarǵa arnalǵan panadol jáne sanasol) týraly eshqandaı shuǵyl málimet kelip túsken joq», delingen mınıstrliktiń resmı saıtynda. Mınıstrlik jurtshylyqtyń záresin ushyrǵan aqparatty taratýshylarǵa qatysty Ishki ister mınıstrligine, Bas Prokýratýraǵa jáne Ulttyq qaýipsizdik komıtetine shaǵym túsirgen. Egemen-aqparat