Saltanat Baqaeva: «Kıim men makııajdy ózgertý ońaı»

Ortalyq kommýnıkasııalar qyzmetiniń brıfıngi «Qazaqstan» ulttyq arnasy efırinen 12 qyrkúıek kúni kórermenge jol tartqan «Aıman-Sholpan» telehıkaıasyna arnaldy. Fılm dúnıe esigin ashqan sátten ómir joldary qos aıyrylǵan, eki túrli áleýmettik ortada tárbıelengen egiz qyzdar Aıman men Sholpan taǵdyry negizinde qurylyp, sıýjet jelisine árqaısysynyń qoǵamdaǵy orny, ómirge degen qarama-qaıshy kózqarasy men oı-túısigi arqaý bolǵan. Jıyn barysynda bul týraly «Qazaqstan» ulttyq arnasynyń basqarma tóraıymy Nurjan Muhamedjanova aıtyp ótti. Brıfıng barysynda fılmniń prodıýseri Rýstam Azamatov, qoıýshy-rejısseri Arman Sandybaev jáne basty róldegi aktrısa Saltanat Baqaeva sóz alyp, jýrnalısterdiń suraqtaryna jaýap berdi. Kórermenderdi basty róldegi aktrısa Saltanat Baqaevanyń birden eki túrli obrazdy somdaǵany qyzyqtyratyny ras. Bul týraly aktrısa: «Alǵashynda maǵan bir mezette eki túrli harakterdegi keıipkerlerdi somdaý qıyn ári qyzyq bop kórindi. Biraq, jaqsy daıyndyqtan soń rólderdi ıgerdim dep oılaımyn. Túsirilim barysynda bir rólden ekinshisine aýysqanda dereý kıimderińdi, makııajdy ózgertý ońaı ǵoı. Soǵan qosa jan-dúnıeńdi «ózgertý» biraz qıyndaý», – deıdi. Aıta keteıik, «Aıman-Sholpan» 100 serııadan turatyn hıkaıa. Otbasy qundylyqtaryn dáripteý, otbasy ınstıtýtyn nyǵaıtý maqsatynda túsirilgen. Aıgúl SEIILOVA