Ken alyby jańa ónim túrin shyǵara bastady

Eýrazııalyq Top (ERG) quramyna kiretin «Sokolov-Sarybaı ken-baıytý óndiristik birlestigi» AQ-tyń jóndeý-mehanıkalyq zaýytynda jasap shyǵarylǵan jańa ónimniń túri «quıma qalaq» dep atalady. Tehnologııalyq ydys Top quramyna kiretin «Qazhrom TUQ» AQ Aqtóbe ferroqorytpa zaýytynyń kádesine jaraıdy. Eýrazııalyq Toptyń jóndeý qýatyn damytyp, topishilik aınalymdy arttyrý jobasyn júzege asyrý aıasynda SSKО́B-te shyǵarylatyn ónim túrlerin ulǵaıtýǵa múmkindik týyp otyr. Oǵan ERG-diń jóndeý dırektoraty men «ERG Service» servıstik kompanııasy jáne Toptyń basqa da kásiporyndarymen birlese kóterilgen bastama muryndyq boldy. «Quıma qalaq» – tórt jaǵynda il­mek tárizdi elementteri bar metaldan quıylyp jasalǵan buıym. «Qa­laq» Aqtóbe zaýytyndaǵy ferrohrom daı­yndaýdyń tehnologııalyq úderi­siniń ajyramas bólshegine aınalady. Sal­maǵy 3 tonna bolatyn osyndaı tehno­logııalyq ydystyń alǵashqysy So­kolov-Sarybaı ken óndirý birles­­tiginiń Jóndeý-mehanıkalyq zaýytyn­da óndirildi. Bul óndiristi iske qosý birlestik mamandarynyń jan-jaqty izdenisiniń nátıjesi dese bolady. – Birinshi kezekte tehnologııalyq jáne konstrýktorlyq qujattamalar jasalyp, qalypqa arnalǵan jumys pen qurastyrý syzbalary ázirlendi, – dep túsindirdi zaýyttyń quıý sehynyń tehnology Tatıana Sadchıkova. – Mehanıkalyq óńdeý sehynyń metall qurastyrý ýchaskesinde qalyp pen qosalqy bólshekter – qamyt, ilmek, buranda, gaıka, shaıba jasaldy. Quıý sehynyń qoldan qalyptaý ýchaskesinde «qalaqty» qalyptaý men quıý júzege asyryldy. Sýyǵan soń 18 saǵat ishinde quıma qalyptan alynyp gaz peshke qyzdyrylyp óńdeledi. Tek sodan keıin ǵana qamytty bekitý úshin Jóndeý-mehanıkalyq zaýytynyń ilmek pen quty jasaý ýchaskesine jiberiledi. Tehnologııalyq ydys arnaıy ja­salǵan kestege oraı Aqtóbege jónel­tiletin bolady. – Aqtóbe ferroqorytpa zaýytynda tehnologııalyq ydystardy ja­ńartý máselesine erekshe nazar aý­darylady. Sebebi, munyń tehno­logııalyq prosester men adamdardyń qaýip­sizdigine tikeleı áseri bar, – deıdi «Qazhrom» TUQ» AQ Aqtóbe ferroqorytpa zaýytynyń tehnologııa jó­nindegi óndiristik-teh­nıkalyq bólim basshysynyń orynbasary Dar­han Aıdarov. – Sondyqtan bizdiń kásip­orynda ystyq ferrohrom quıma­laryn saqtaýǵa arnalǵan quıma qa­laqtar parkin jańartý qajettiligi týyndaǵanda biz tek ekonomıkalyq kórsetkishterdi ǵana emes, tehnıkalyq jaǵy men sapasyna kóńil bóldik. Buryn osy tehnologııalyq ydys shetelden satyp alynatyn. Sondyqtan ımportty otandyq ónimmen aýys­tyrý maqsatynda Eýrazııalyq Top kásiporyndary arasynan osy ónimdi jasaýǵa qaı kásiporynnyń múmkindigi bar ekenin zerttedik. Osy tusta sapasy eshkimnen kem túspeıtin ónimdi bizge Sokolov-Sarybaı ken-baıytý óndiristik birlestiginiń mamandary usyndy. Aqtóbe ferroqorytpa zaýyty jylyna 29 quıma qalaqqa suranys jasaıdy. – ERG kásiporyndary osymen birneshe ret bir-birine naqty qoldaý kórsetip keledi. Jýyrda biz Qazaqstan elektrolız zaýyty úshin blıýmstar shyǵara bastadyq. Al búgin Eýrazııalyq Toptyń basqa da kompanııalarymen baılanysty nyǵaıtýǵa tyrysyp otyrmyz. Bolashaqta Aqtóbe ferroqorytpa zaýyty úshin taǵy da basqa eki túrli qural – 2,83 tekshe metrlik qojjınaǵysh pen 3 tekshe metrlik shómish shyǵarý jos­­parda bar. Qazirdiń ózinde osy buıymdardy jasaýǵa daıyndyq jumystary bastalyp ketti. Osy qadam­dardyń barlyǵy óndiris kólemi tómen­degen qıyn kezeńde zor mánge ıe. Sebebi, bular naryqta otandyq taýar­lardyń úlesin arttyrýǵa baǵyt­talǵan, – deıdi «SSKО́B» AQ prezı­denti Bereke Muhametqalıev. Izdenister osylaı ishki naryqtyń aınalymyn qamtamasyz etýde. Názıra JÁRIMBETOVA, «Egemen Qazaqstan» RÝDNYI