Eńbektiń qashanda ónbegi bolady. Jalqaýlyqqa jaıdaq minip, «alma pis, aýzyma tús» dep shaljıyp jatqan adamnyń mańdaıy shylqypty degendi kórgen de, estigen de kisi joq. Shyn baqyttyń bir formýlasy eńbegine adaldyqta jatsa kerek. Kásibine jan-tánimen berilip, ynta-shyntasymen jasasa, baılyq ta, baqyt ta adamdy ózi izdep tabatynyn kúndelikti ómirden myńdap keziktirýge bolady. Osynyń bir dálelin qyzylordalyq dıqandar da qolmen qoıǵandaı kórsetip otyr. Osydan úsh jyl buryn Syr óńiriniń sharýalary Táýelsizdik jyldaryndaǵy eń úlken rekordtyq kórsetkishke qol jetkizip, kúrishten mol ónim jınaǵan. Eńbektiń ónimdiligine arqalanǵan dıqandar qaýymy ol kórsetkishti byltyr taǵy bir beleske kóterip tastaǵan-tyn. Bıyl da qyzylordalyq kúrishshiler jolynan jańylǵan joq. Solaısha, taǵy da rekordtyq ónimge qol jetkizdi.
Táýelsizdiktiń jıyrma bes jyldyǵy men eki márte Sosıalıstik Eńbek Eri, dala akademıgi, dańǵaıyr dıqan Ybyraı Jaqaevtyń 125 jyldyǵy qarsańynda Qyzylorda oblysy kúrishtiń ár gektarynan 52,8 sentnerden ónim aldy. Máselen, Shıeli aýdanynda kúrishtiń ár gektarynan 59,2 sentnerden aınaldy. Jekelegen sharýashylyqtar 70 sentnerden astam ónim jınaýda. Aıtalyq, «Maǵjan jáne K» jaýapkershiligi shekteýli seriktestigi 71 sentner ónim alsa, «Aqtóbe jáne K» JShS gektaryna 94,5 sentnerden jınady.
Aıta ketý kerek, rekordtyq ónim 3,8 myń ga kúrish alańyn azaıtý, tuqym sapasy men jerdiń melıoratıvtik jaı-kúıin jaqsartý esebinen alynyp otyr.
Jyldan jylǵa kúrish eksportynyń kólemi ulǵaıyp kele jatyr. Iаǵnı Qyzylorda oblysy jylyna 50 myń tonna kúrish eksporttaıdy.
Bıyl Iran naryǵyna 5 mıllıon tonna kúrish shyǵarý úshin Qyzylorda oblysynda suranysqa ıe ırandyq sortty tájirıbelik synaqtan ótkizý jumystary bastaldy. Onyń baǵasy qazaqstandyq kúrishten 5 ese joǵary. Búginde aımaq Mazandaran provınsııasyna kúrish jetkizý úshin aldyn ala kelisim jasaýda.
Erte kóktemnen egis basynda júrip, alqaptaǵy alasapyran jumysty atqarǵan dıqandar qaýymynyń eńbegi osylaısha nátıjeli bolyp, baraqatqa bólenip jatyr. Al endi osyny baqyt demeı kórińizshi?!
Erjan BAITILES,
«Egemen Qazaqstan»
Qyzylorda oblysy
Sýretti túsirgen Maksım Rojın
Shıeli aýdanynda kúrishtiń ár gektarynan 59,2 sentnerden aınaldy. Jekelegen sharýashylyqtar 70 sentnerden astam ónim jınaýda.
Aıtalyq, «Maǵjan jáne K» jaýapkershiligi shekteýli seriktestigi 71 sentner ónim alsa, «Aqtóbe jáne K» JShS gektaryna 94,5 sentnerden jınady.
