Pan Gı Mýn Ońtústik Koreıa prezıdenttigi úshin saılaýǵa túsýi múmkin

BUU Bas hatshysy qyzmetinen ketip jatqan Pan Gı Mýn kelesi jyldyń sońynda ótetin Ońtústik Koreıa prezıdentiniń saılaýynda óz kandıdatýrasyn usynýy múmkindigin joqqa shyǵarmaıdy. Buǵan qatysty sheshimdi 2016 jyldyń sońynda Birikken Ulttar Uıymynyń bas hatshysy laýazymyndaǵy merzimi aıaqtalyp, óz eline oralǵannan keıin qabyldamaq, dep habarlaıdy QazAqparat Reuters  agenttigine silteme jasap. «Koreıada (Ońtústik) kóptegen adam el bolashaǵyn jaqsy etý úshin óz kandıdatýramdy usynatynymdy kútýde, men ony sezemin», - dedi ol. Pan Gı Mýn Ońtústik Koreıaǵa qańtar aıynyń ortasynda qaıtatynyn atap ótti. «Sodan keıin Koreıanyń (Ońtústik) bolashaǵynda qandaı ról oınaı alatynym jóninde maǵan jaqsy keńes bere alatyn dostarymmen, qurmet tutatyn adamdarymmen aqyldasatyn bolamyn.Barlyq nusqalar ashyq kúıinde qalýda», - dep qosty ol. Reuters-tiń atap ótýinshe, eger Pan Gı Mýn prezıdenttik kreslo úshin saılaýǵa túsý sheshimin qabyldasa, ol bılik basyndaǵy «Senýrı» partııasy atynan qatysatyn bolady. Ońtústik Koreıada qyrkúıek aıynda ótkizilgen saýalnamaǵa sáıkes, respondentterdiń 32,7 paıyzy Pan Gı Mýn úshin daýys berýge daıyn. Onyń  izin ala 17,3% daýyspen oppozısııalyq saıasatker Mýn Chje In men 8,1% daýyspen An Chhol Sý keledi. Ońtústik Koreıanyń burynǵy syrtqy ister mınıstri Pan Gı Mýn BUU bas hatshysy qyzmetin 2007 jyldan beri atqaryp keldi.