OQO-nyń Sozaq aýdanynda kelesi jyldan altyn óndirý bastalady

Sozaq aýdanynda kelesi jyldan bastap altyn óndiriledi. Bul týraly aýdan ákimi Maqsat Isaevtyń el táýelsizdiginiń 25 jyldyǵynda atqarylǵan sharýalardy baıandaǵan baspasóz brıfınginde aıtty. Osy aralyqta jasalǵan qyrýar sharýalardy tizbektep shyqqan aýdan basshysynyń aldaǵy josparlary jeterlik. Metall óndirýde tájirıbesi jetkilikti tersikeılikter keler jyldan bastap kómir óndirisin de qaıta jandandyrmaq. Aldaǵy ýaqytta aýdanda ónerkásip, shaǵyn kásipkerlik, aýyl sharýashylyǵy, atap aıtqanda et pen qymyran óńdeýdi damytý qolǵa alynbaq. Balamaly qýat óndiretin kún elektr stansııasyn iske qosý da aldaǵy jyldyń enshisine qaldyrylyp otyr. Sonymen qatar, bir kezderi tartylyp qalyp bıyl qaıta tolǵan Qyzylkóldiń jaǵasynan demalys oryndaryn salýǵa nıettenip otyrǵan kásipkerler de daıyn. Tek, joba-jospar túzilýi kerek. Sondaı-aq, Sozaqta turǵyn úı máselesi de jyldan jylǵa sheshimin taýyp keledi. Shırek ǵasyrda aýdanda 206,6 myń sharshy metrdi quraıtyn 4000-ǵa jýyq turǵyn úı salynypty. Jyl aıaǵyna deıin taǵy 50 turǵyn úı el ıgiligine berilgeli otyr. Sozaqtyq sharýalar mal ósirýde de aldaryna qara salmaı keledi. Táýelsizdik alǵan jyldary aýdanda iri qara basy 7 myńnan áreń assa, qazir bul kórsetkish 27 myńǵa jetip otyr. Bıyldyń ózinde Sozaqtan 2 688 qarakól toqtysy birikken Arab ámirlikterine eksporttaldy.