IDB Qazaqstan ekonomıkasyna $300 mln astam qarjy quıady

Islam damý banki  2017-2020 jyldary Qazaqstan ekonomıkasyna 300 mln dollardan astam qarajat quıýdy josparlap otyr. Bul týraly jýrnalısterge bergen suhbatta  «Astana» halyqaralyq qarjy ortalyǵynyń (AHQO) basshysy Qaırat Kelimbetov málimdedi, dep habarlaıdy egemen.kz QazAqparatqa silteme jasap. AHQO basshysy atap ótkendeı, Elbasynyń Saýd Arabııasy Koroldigine jasaǵan sapary aıasynda birlesken úkimetaralyq kezdesý ótip, túrli mınıstrlikter óz baǵyttary boıynsha Saýd Arabııasymen yntymaqtastyq múmkindikterin qarastyrdy. «Saýd ekonomıkasy Taıaý Shyǵystaǵy irilerdiń biri.  Bul atalǵan óńirdegi bizdiń negizgi strategııalyq seriktesimiz. Sondyqtan ýaqytty salystyryp, ózara yntymaqtasý baǵyttary týraly kelisý mańyzdy boldy», - dedi Qaırat Kelimbetov. Sondaı-aq ol qarjy salasynda Islam damý banki tobymen kelissózder júrgizilgenin qosty. «Bul ıslamdyq qarjylandyrý salasyndaǵy iri bank. Biz  Halyqaralyq qarjy ortalyǵy aıasynda ıslamdyq qarjylandyrý salasyndaǵy óz jumysymyzdy rastadyq. Islam damý korporasııasymen yntymaqtastyq týraly memorandýmǵa qol qoıdyq.  Bul jeke sektorǵa yqpaldasýmen aınalysatyn arnaıy uıym.  Sonyń ishinde, Islam damý banki 2017-2020 jyldary Qazaqstan ekonomıkasyna 300 mln dollardan astam qarajat quıýdy josparlap otyr», - dedi Qaırat Kelimbetov. Onyń sózine qaraǵanda, Islam damý banki «Astana» halyqaralyq qarjy ortalyǵyna  «Astana» halyqaralyq qarjy ortalyǵy týraly» konstıtýsııalyq zań aıasynda ıslamdyq qarjylandyrýdyń eko-júıesin qurýǵa kómektesedi.