Qazaqstandyq bızneske 8,61 mlrd. teńge bólinedi

«Báıterek» ulttyq basqarýshy holdıngi» AQ basqarmasynyń tóraǵasy Erbolat Dosaev Eýropa qaıta qurý jáne damý bankiniń birinshi vıse-prezıdenti Fıl Bennetpen kelissóz júrgizdi. "Taraptar shaǵyn jáne orta kásipkerlikti damytý, ulttyq valıýtada qorlandyrýdy tartý, turǵyn úı qurylysyn qarjylandyrý salasyndaǵy yntymaqtastyq, ınvestısııalyq jobalardy daıyndaý men qurylymdaý, memlekettik aktıvterdi jekeshelendirý, sondaı-aq saqtandyrý ónimderin damytý salasyndaǵy yntymaqtastyq máselelerin talqylady. Kelissózder barysynda Erbolat Dosaev ınvestısııalyq jáne ınfraqurylymdyq jobalar boıynsha ózara tıimdi yntymaqtastyqty keńeıtý, shaǵyn jáne orta bıznes ókilderin qashyqtan oqytý jónindegi óńirlik ofısti qurý, sondaı-aq Holdıngtiń enshiles uıymdaryn jekeshelendirý jónindegi josparlardy iske asyrý boıynsha EQDB-nyń tájirıbesin (tehnıkalyq kómek) tartýdyń mańyzdylyǵyn atap aıtty",- delingen holdıng baspasóz qyzmeti taratqan aqparatta. Holdıng aqparatyna sáıkes, Fıl Bennet ornyqty jáne ınklıýzıvti ekonomıkany qurý EQDB úshin túıindi basymdylyq bolyp tabylatyndyǵyn tilge tıek etken. Sondaı-aq EQDB-nyń vıse-prezıdenti qazaqstandyq kásipkerlerdi qoldaýǵa daıyn ekendigin aıtyp, shaǵyn kásipkerler deńgeıinde qarjylandyrýǵa qoljetimdilikti jaqsartý jáne jergilikti valıýtada qaryz berý máselesin qozǵaǵan. Kezdesý barysynda Eýropa qaıta qurý jáne damý banki, Halyqaralyq qarjylyq korporasııasy (IFC), «Báıterek» ulttyq basqarýshy holdıngi» AQ men Holdıngtiń enshiles uıymy «Kazakhstan Project Preparation Fund» (KPPF) arasynda О́zara túsinýshilik týraly memorandýmǵa qol qoıylǵan. Memorandým aıasynda ındýstrııalyq jáne ınfraqurylymdyq jobalardy, onyń ishinde memlekettik-jekemenshik seriktestik jobalardy birlesip izdeý, irikteý, qurylymdaý jáne birlesip iske asyrý úshin tujyrymdamalyq tásilderdi iske asyrý baǵytynda dıalogtyq platforma qurylatyn bolady. Sonymen qatar Holdıngtiń enshiles uıymy «Damý» qory EQDB-nyń qazaqstandyq bıznesti qoldaý úshin 8,61 mlrd. teńge bóletindigi týraly kelisimge qol qoıdy. Qujatty EQDB birinshi vıse-prezıdenti Fıl Bennet, «SentrKredıt Bank» AQ tóraǵasy Vladıslav Lı jáne «Damý» kásipkerlikti damytý qory» AQ basqarma tóraǵasy Qanysh Týleýshın rásimdedi. Qarajat «Damý» qorynyń kepildigimen «SentrKredıt Bank» AQ bólinedi. Jalpy somasy 8,61 mlrd. teńgeni quraıtyn qarajattyń 6 mlrd. 750 mln. teńgesin shaǵyn jáne orta bıznes jobalaryna, 1 mlrd 860 mln. teńgesin «Bıznestegi áıelder» baǵdarlamasyna berý kózdelgen. Kredıt berýdiń talaptary: qaryzdyń maksımaldy somasy - 900 mln. teńgege deıin; kredıt berý merzimi 12 aıǵa deıin; syıaqy mólsherlemesi jyldyq 16 paıyzǵa deıin.