Ulttyq ulanǵa - 25 jyl

Elimiz táýelsizdik alǵan tusta memleket basshylyǵy Ulttyq ulan áskerine asa jaýapty júk – О́skemen, Kýrchatov jáne Stepnogorsk qalalarynda burynǵy Keńes Odaǵynan muragerlikke qalǵan erekshe mańyzdaǵy nysandardy kúzetýdi senip tapsyrǵan. Al sol 1992 jyly elimizdiń quqyqtyq tártibin qamtamasyz etý úshin Aqmola, Oral, Temirtaý jáne Jambyl qalalarynda mototehnıkaly arnaıy áskerı bólimder, sondaı-aq Qaraǵandy qalasynda týra osyndaı batalon qurylyp, keıin ol polk bolyp jasaqtalǵan. Bul týraly búgin Ortalyq kommýnıkasııalar qyzmetinde Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satovtyń qatysýymen ótken brıfıngte belgili boldy. Onyń aıtýynsha, Almatyda jeke brıgada qurylsa, osy qalanyń mańyndaǵy kezindegi Krasnyı Vostok kentinde jedel brıgada quramy jasaqtalyp, keıin bul qurama Respýblıkalyq ulan, búgingi tańdaǵy Memlekettik kúzet qyzmetiniń qalyptasýyna negizdeme bolǵan. ­ -Ulttyq ulan óziniń qalyptasý jolynda birqatar jetildirý kezeńderin basynan ótkerdi. Máselen, 2013 jyly Memleket basshysynyń «QR IIM Ishki áskerleri týraly» Zańyna ózgertýler men tolyqtyrýlar engizý týraly Jarlyǵymen áskerdi basqarý júıesi quramalyq basqarýdan óńirlik basqarýǵa kóshirildi. Osynyń nátıjesinde áskerı bólimder men bólimshelerdiń jaýyngerlik qabileti jáne jedeldigi artyp, basqarý isi qarapaıym ári tıimdi bola tústi. Byltyrǵy jyly 2014-2016 jyldarǵa arnalǵan áskerdi damytý baǵdarlamasy sátti aıaqtaldy, - dedi general-maıor Muhametqalı Satov. Sonymen qatar brıfıngte Elbasy – Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Ábishuly Nazarbaev el Táýelsizdiginiń 25 jyldyǵyna arnalǵan saltanatty jıynda egemendiktiń arqasynda memleketimizdiń qol jetkizgen 7 jahandyq trıýmf-saltanatynyń biri retinde zamanaýı Qarýly Kúshteri men quqyq qorǵaý júıesi qurylǵandyǵy týraly erekshe atap ótkendigi de aıtyldy. "Aıryqsha atap óterligi, Qazaqstan Respýblıkasynyń Ulttyq ulany (burynǵy Ishki áskerleri) Qazaq eli táýelsizdik alǵan soń Elbasynyń Jarlyǵymen 1992 jyldyń 10 qańtarynda alǵashqy kúsh-qýat qurylymy bolyp quryldy", dedi ol. Onyń aıtýynsha, eger quqyqtyq tártip áskeriniń tarıhy men damý jolyna toqtalar bolsaq, ony úsh kezeńge bólip qaraýǵa bolady. Birinshi kezeń 1992-2000 jyldar aralyǵyn qamtıdy. Osy kezeńge áskerimizdiń qurylýy men damý joly tıesili. Osy ýaqyt kezeńinde áskerdiń zańnamalyq irgetasy qalandy, kadrlyq áleýeti jetildirildi, sondaı-aq bólimsheler Tájik elinde bitimgerlik mıssııany atqaryp, qalyptasýdyń asa kúrdeli kezeńderin basynan ótkizdi. Ekinshi kezeń 2000-2007 jyldary Ishki áskerdi reformalaýǵa arnalǵan memlekettik birinshi Baǵdarlamanyń júzege asyrylýyn qamtıdy. «Al úshinshi kezeń – bul ýaqyt bólshegine 2008-2016 jyldardy, ıaǵnı óziniń kúsh-qýat áleýeti jaǵynan barynsha jandanyp damyǵan, áskerdi basqarýdyń júıesi birqatar zamanaýı ózgeristerge ushyraǵan, ásker quramynyń jaýyngerlik daıyndyǵy men múmkindikteri jańa talaptarǵa sáıkestendirilgen, halyqaralyq baılanystar yntymaqtastyǵy jolǵa qoıylyp, eń aıaǵy Ishki áskerden Ulttyq ulan bolyp qalyptasý jyldaryn jatqyzýǵa bolady», - dedi general-maıor M.Satov. Dastan Kenjalın, "Egemen Qazaqstan".