Patrýldik mindetti atqarýǵa kúnine 5 myń áskerı qyzmetshi jumyldyrylady

Jedel maqsattaǵy bólimder ishki ister organdarymen birlesip, elimizdiń 19 qalasynda qoǵamdyq tártipti kúzetedi. Patrýldik qyzmetti atqarýǵa kún saıyn 5000-nan asa áskerı qyzmetshi jumyldyrylady. Bul týraly búgin Ortalyq kommýnıkasııalar qyzmetinde ótken brıfıngte Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov habarlady. Onyń aıtýynsha, patrýldik-kúzet qyzmet nátıjesinde qala kóshelerindegi zań buzýshylyqtar ótken jyldarmen salystyrǵanda 38,9 paıyzǵa tómendedi. Búgingi tańda Ulttyq ulan qala kóshelerinde quqyqtyq tártipti qadaǵalap, qylmyspen kúreske, memlekettik mańyzdaǵy nysandar men túzetý mekemelerin kúzetýge qomaqty úles qosýda. Áskerı bólimderimizben IIM QAJK túzetý mekemeleriniń senimdi kúzeti qamtamasyz etilgen. Aıdaýyldaý bólimshelerimen sottalǵan jáne qamaýǵa alynǵan tulǵalardy aıdaýyldaý júzege asyrylady. Qazaqstan Respýblıkasy Joǵarǵy jáne Áskerı sottarynyń otyrystary qamtamasyz etiledi. Ulttyq ulannyń arnaıy áskerı bólimderimen strategııalyq jáne erekshe mańyzdaǵy memlekettik nysandar kúzetke alynǵan. Dastan Kenjalın, "Egemen Qazaqstan".