Qazaqstandyq bylǵary qolǵap sheberi Qanat Islam kezekti jekpe-jegi úshin daıyndyǵyna kiristi, dep jýrnalıst Berik Sultan óziniń feısbýk paraqshasynda habarlady.
«Daıyndyqty bastap jiberdik. Qanat Islamnyń kelesi jekpe-jegine kıetin shorty dızaıny bitti. Bul joly aq tústi tańdap otyrmyz. Onyń eki jaǵy da oıýmen órnektelgen. Sol qaptalynda boksshynyń jeke logotıpi ornalasqan. Al belinde (aldynda) boksshynyń esimi men tegi, artqy jaǵynda laqap aty jazylǵan. Buıyrtsa, jaqyn kúnderi kásipqoı rıngte áli jeńilmegen batyr uldaryńyzdyń kelesi judyryqtasatyn kúni men ýaqytyn málimdeımiz. Bul joly da jekpe-jekke bas demeýshilik tanytyp otyrǵan «Zhersu» korporasııasy, ıaǵnı Baýyrjan Ospanov.
Eske sala keteıik, Baýyrjan Ospanov – Qanat Islamnyń osy ýaqytqa deıin ótkizgen barlyq jekpe-jeginiń bas demeýshisi ári janashyr aǵasy. Sondaı-aq, bul jolǵy judyryqtasýǵa ózindik qoldaýyn bildirip, demeýshiler qatarynan kóringen shymkenttik «Nuray construction» qurylys kompanııasy, onyń basshysy sport janashyry Altaı Aınabek myrzaǵa da erekshe alǵys bildiremiz. Jeńiske birge jeteıik! Jekpe-jek týraly resmı habarlama kútińizder. AQSh-taǵy boks keshin «Qazaqstan» ulttyq arnasy kórsetedi dep josparlanýda. Qazaqtar, alǵa!» – dep jazǵan.
Buǵan deıin Qanat Islam kelesi jekpe-jegi AQSh-ta ótetindigin málimdegen.
