Aqtóbe qalasynda jergilikti basqarýshy kompanııalardyń qatysýymen ótken qardan jasalǵan músinder baıqaýy qorytyndylanyp, eń úzdikteri anyqtaldy. Qalalyq ákimdik uıymdastyrǵan baıqaýǵa qaladaǵy 28 basqarýshy kompanııa qatysty. Baıqaýdy ótkizýdegi maqsat turǵyn úı aýlalarynda qardan músin jasap, shahardy shyraılandyryp, oqýshylardyń demalys ýaqyttaryn tıimdi paıdalanýǵa jaǵdaı jasap, qala turǵyndaryna kóterińki kóńil kúı syılaý bolyp tabylady.
Sharada sóz alǵan qala ákimi Ilııas Ispanov mundaı baıqaýlardyń áli de jalǵasatynyn tilge tıek ete kelip, jaz aılarynda aýlalardyń ishin abattandyrý jumystary júrgiziletininen habardar etti.
Baıqaý nátıjesi boıynsha Eset batyr kóshesindegi №105 úıdiń aýlasynda jasalǵan syrǵanaq birinshi oryndy ıelendi. №14 basqarý kompanııasy jasaǵan syrǵanaqtyń ereksheligi taýyq jylyn beıneleýimen qundy. Qyzyldy-jasyldy tústerge boıalǵan músinniń bıiktigi – 4 metr, al syrǵanaqtyń uzyndyǵy 20 metrge jýyq bolyp qalady.
Ekinshi oryn №11, al úshinshi oryn №4 basqarý kompanııalarynyń enshisine buıyrdy. Jeńimpaz jáne júldeger basqarýshy kompanııalarǵa arnaıy sertıfıkat tabystaldy.
Qazir Aqtóbe qalasynda turǵyn úıler aýlalaryn qysqy kezeńge saı kóriktendirý jáne sport alańdaryn ashý jumystary júrgizilýde. Mektep jasyndaǵy balalar men jasóspirimderdiń qysqy demalysyn tıimdi uıymdastyrý maqsatynda 60-qa jýyq muz aıdyny ashylyp, ıgilikke qyzmet etýde.
Satybaldy SÁÝIRBAI,
«Egemen Qazaqstan»
AQTО́BE
