Elbasy «Báıterek» UBH» AQ basqarma tóraǵasy Erbolat Dosaevty qabyldady

Kezdesý barysynda Memleket basshysyna holdıngtiń 2016 jylǵy qyzmetiniń qorytyndysy jónindegi esebi jáne odan ári damý jospary usynyldy. Bul týraly Aqordanyń baspasóz qyzmeti habarlady. Erbolat Dosaev óz sózinde aksıonerlik qoǵamnyń aktıvi 4 trln 100 mlrd teńgeden asyp, taza tabysy 30 mlrd teńgeni qurap otyrǵanyn aıtty. Sondaı-aq, «Báıterek» ulttyq basqarýshy holdıngi» aksıonerlik qoǵamy basqarmasynyń tóraǵasy Memleket basshysyn «Qazaqstannyń damý banki» aksıonerlik qoǵamynyń jumysy jaıly jáne elimizdegi ekonomıkalyq ahýal men Ulttyq banktiń jańa monetarlyq saıasatyn eskere otyryp, holdıngtiń strategııalyq damýyna ózgerister engizýge arnalǵan josparlary jóninde habardar etti. Qazaqstan Prezıdenti holdıngtiń elimizdiń ekonomıkasy úshin mańyzy zor jobalardy iske asyrý barysyndaǵy rólin atap ótti. «Holdıngtiń aldyna áýel bastan iri jobalardy nesıeleý jóninde mindet qoıylǵan. Alaıda ekonomıkalyq daǵdarys jaǵdaıynda «Báıterekke» kóptegen túrli qosymsha tapsyrmalar berildi. Osyǵan baılanysty qazir onyń budan arǵy qyzmetiniń strategııalyq perspektıvalaryn aıqyndaý qajet», – dedi Elbasy.