Eńseli erteńimiz úshin tańdaý jasaıyq

Egindikól aýdanynyń tur­ǵyn­dary ejelden uıymshyl­dy­ǵymen, elimizdegi oń ózge­risterge ózindik ekpin berer belsendiligimen erekshelenip turady. Basty sebep – jaqsy ómir súrý úshin jaqsy eńbek etip, jaqsylyqtardy óz qoly­men jasaýdy murat sanaýda dep bilemin. Tyń kóterý jyldary osy ólkege jas agronom retinde joldamamen kelgen men úshin bul tirshilik maǵynasyn arttyrar úlken qasıet retinde, jigerlendirýshi qasıetke ıe uǵym. О́lkemiz asa mańyzdy ózge­ris­ter qushaǵynda. El táýel­sizdiginiń tábárik talap­ta­ry­nan týyndaǵan jemisterdi kó­rý­diń qanshalyqty qymbat ta ǵa­nı­bet ekendigin tushyný da baqyt. Kúni erteń kezekten tys prezıdenttik saılaý bolmaq. Elimizge áıgili tórt azamat básekege tús­keli tur. Bul – baqtalastyq emes. Otanymyzdyń kemeldigin baı­qa­ta­tyn qadam dep baǵalaımyn. Endi jer júzi nazaryndaǵy saı­laýymyzdy talap dárejesinde ótkizý ulyq paryzymyz dep bilemin. Aýdanymyzda 18 saılaý ýchaskesi qurylyp, daýys bere­tin­der­diń tizimi muqııat qattaldy. So­nyń 30 paıyzy zeınet jasyn­da­ǵy azamattar bolǵandyqtan, aq­sa­qaldar alqasynyń toǵyz múshe­sinde de tynym joq. Saılaýaldy jınalys, kezdesý, basqa da saıası sharalardyń barlyǵyna qatysyp, aǵalyq aqyl-paıymymyzdy or­ta­ǵa saldyq. Aýmaqtyq saılaý komıssııasynyń tóraǵasy О́mirzaq Jumanǵa rahmet, bizdi birde-bir sharadan tys qaldyr­maıdy. Jýyrda aýdan orta­ly­ǵyndaǵy №317 saılaý ýchaskesinde bıyl tuńǵysh ret daýys beretin 8 jaspen kezdesý uıym­dastyryldy. Men olarǵa sonaý qyrqynshy jyldary Aq­mola kásiptik mektebinde oqyp júrip, birinshi ret daýys bergenimdi áńgimelep berdim. Saılaýlardyń ereksheligin túsindirýge tyrystym. Qyzyq jaǵdaı boldy. Kezdesý ústinde ýchaske ornalasqan №1 qazaq orta mektebiniń muǵalimi Jandos Alıakbarov 3 sáýir kúni 25 jasqa tolady eken. Sharaǵa qa­tysqan segiz jas (aýdan boı­yn­sha – 78) Jandos aǵalarynyń týǵan kúnin erekshe oqıǵa retinde atap ótýge sheshim jasa­dy. Másele onda emes, másele erteńgi kúnimizdiń aıshyqty oqıǵalarǵa, jaqsy úmitterge toly bolatyndyǵyna senimniń moldyǵynda dep uqtym. Joldybaı BALTABEKOV, aqsaqaldar alqasynyń tóraǵasy. Aqmola oblysy, Egindikól aýdany.