Tabıǵatqa aıaly alaqan qajet

Qandaı bir ındýstrııalyq jobany júzege asyrǵanda da eń aldymen qorshaǵan ortaǵa zalalyn tıgizbeý maqsatymyz bolýy tıis deıtin Qazaqstan Respýblıkasy prezıdenttigine kandıdat, «Tabıǵat» ekologııalyq odaǵynyń tóraǵasy Mels Eleýsizov Astanada ótken Halyqaralyq ónerkásiptik ınnovasııalyq forýmynda bolyp, otandyq atom energetıkasy tóńiregindegi oılarymen bólisti. Sonymen qatar, Eńbek jáne halyqty áleýmettik qorǵaý vıse-mınıstri Ásel Nurpeıisovamen kezdesip, múgedekterge arnalǵan jumys oryndaryn qalpyna keltirý máselesin kóterdi. Japonııadaǵy tabıǵat apatynan keıingi «Fýkýsıma» AES-indegi jaǵdaı atom energetıkasyn paıdalanýda qandaı saqtyq qajettigin kórset­ken­deı. Forýmdaǵy basty taqyryptyń biri otandyq atom energetıkasyn paı­dalanýǵa arnalǵandyqtan, prezıdenttikten úmitker: «Men, árıne, barlyq atom stansalaryn jabý kerek demeımin, alaıda, osy máseleni jete zertteı túsý qajettigin anyq bilemin. Ýran óndirý máselesindegi jaǵdaı kúrdeli, men ony úıip, jınap, siltisiz­den­dirý­diń barlyq aımaqtar úshin tıimdi emestigin bilemin. Ony óndirýdiń sol mańaıdyń halqyna qandaı áser etetindigi jaıynda da birizdi zertteýler júrgizý qajet. Bizdiń qolymyzda qazir ekologııalyq taza ádistermen energııa alatyn joldar bar. Olar – kún, jer­as­ty ystyq sýlary jáne jeldi paıdalaný. Bizdiń ǵalymdarymyz Joń­ǵar qaq­pasynan esken jeldiń qýa­ty­men búkil Qazaqstandy energııamen qamtamasyz etýge bolady deıdi. Árıne, osyndaı tehnologııalardy engizý úshin oǵan qarjylyq qoldaý qajettigi túsi­nikti, al sońynan biz qaýipsiz ári arzan elektr qýatyn ıelenemiz», – degen úmitker aldaǵy ýaqytta álem boıyn­sha atom energetıkasyn paıdalanýǵa qarsy oılar kóbeıe túsetinin, muny qazaqstandyq qoǵam da túsinýi tıis ekenin atap kórsetti. – Biz sondaı-aq jahandyq jylyný problemasyn da esten shyǵarmaýǵa tıispiz. Qorshaǵan ortaǵa nemkettilikpen qaraý, ónerkásiptiń aýaǵa, sýǵa tıgizetin keri áserleri tabıǵat ózgerýine alyp kelýde. Mine, osylardan kelip, aýyz sý, azyq-túlik tapshylyǵy týyn­daıdy. Sondyqtan da, qaıtalap aıta­myn, bizdiń respýblıkanyń qorshaǵan ortany qorǵaý máselelerinde jurt­shy­lyq belsendilik tanytýy qajet, – dedi Mels Eleýsizov. Prezıdenttikten úmitker halyq­tyń qorǵaýdy qajet etetin toptaryna degen erekshe kózqaras jaıyn Eńbek jáne halyqty áleýmettik qorǵaý vıse-mınıstri Ásel Nurpeıisovamen kezdesýi barysynda qozǵady. Bir kezderi zaǵıp jandarǵa nápaqalaryn taýyp, eńbek etýlerine jaǵdaılar jasalǵan jumys oryndaryn qaıtadan ashý qa­jet­tigine toqtalyp, óziniń Soqyrlar men sańyraýlar qoǵamynda ótken kezdesýinde aıtylǵan tilekterdi ortaǵa saldy. – Zaǵıp jandar qazirgi kúni qoǵam­nan tys qalyp otyr. Olardyń ózderin qoǵamnan tys qalǵan adam etip sezindirmeý úshin burynǵy mamandan­dy­rylǵan kásiporyndardy qaıtadan ashý­ǵa kómektesý qajet. Al bul máseleniń ońtaıly sheshilýi Úkimet, Parlament, salalyq mınıstrlik birige jumylǵanda ǵana júzege asady. Son­dyqtan men usynystarym jazylǵan arnaıy hat ázirleımin, – dedi úmitker. Mels Eleýsizovtiń saılaýaldy nasıhat aıasynda taǵy da bir atbasyn tiregen orny – Japonııa elshiligi boldy. Úmitker Elshilikke kelip, japondyq­tardyń basyna túsken taýqymetke, myńdaǵan adamdardyń iz-túzsiz jo­ǵalyp jáne qaza bolýlaryna baı­lanysty kóńil aıtty. Anar TО́LEÝHANQYZY. Astana.