Prezıdent Úkimetke básekelestikke kedergi keltiretin normalardy anyqtaýdy tapsyrdy

Jekemenshik kapıtal tartý úshin memleket-jekemenshik seriktestiginiń yqtımal barlyq túri men nysanyn paıdalaný qajet. Bul týraly Qazaqstan Prezıdenti Nursultan Nazarbaev Qazaqstan halqyna joldaýynda málimdedi. "Olar - memlekettik múlikti senimdi basqarý, qyzmet kórsetý kelisimsharttary, taǵy basqalar. Bul rette kelisimniń barlyq rásimderin, ásirese shaǵyn jobalarǵa qatysty rásimderdi meılinshe jeńildetý jáne jedeldetý qajet", - degen Elbasy memleket-jekemenshik seriktestigi ınfraqurylymdy, sonyń ishinde áleýmettik ınfraqurylymdy damytýdyń negizgi tetigine aınalýǵa tıis ekenin aıtty. Memleket basshysy kásipkerlikti damytýǵa memleket-jekemenshik seriktestigi aıasyn keńeıtý zor múmkindik beretinin, bul turǵyda kóterilip otyrǵan bastamalar birqatar memlekettik qyzmetter kórsetý mindetin bızneske berý isine qatysty ekenin aıtty. «Bizde qazirdiń ózinde olardy mektepke deıingi bilim berý isine tartý salasynda jaqsy nátıjeler bar. О́tken 3 jylda memleket 40 myń orynǵa arnalǵan 189 balabaqsha salsa, jekemenshik sektor 100 myń orynǵa arnalǵan 1 300 balabaqsha ashty. Jekemenshik balabaqshalardyń eń kóbi Ońtústik Qazaqstan (397), Almaty (221), Qyzylorda (181) oblystarynda ashyldy. Men úshin osy sektordaǵy memleket-jekemenshik seriktestiginiń úlgisi óte mańyzdy. Bul asa mańyzdy jalpyulttyq mindetterdiń biri - 3-6 jas aralyǵyndaǵy balalardy mektepke deıingi bilim berýmen 2020 jylǵa qaraı júz paıyz qamtý máselesin memleket pen bıznes birlese sheship otyrǵanyn kórsetedi», - dedi N. Nazarbaev. Sonymen qatar, Prezıdent turǵyn úı-kommýnaldyq sharýashylyq nysandaryn jańǵyrtý úshin budan ári jekeshelendirý múmkindigin qarastyra otyryp, basqarýǵa jáne konsessııaǵa berý qajet ekenin aıtty. "Úkimet bir oryndy shıyrlaı berýdi doǵarsyn. Bul baǵytta jumysty jandandyra túsý kerek. Baǵa men tarıf boıynsha ymyralasýǵa jol bermeý qajet. Úkimetke "Atameken" UKP-men birlesip, básekelestikke kedergi keltiretin normalardy anyqtaýǵa qatysty barlyq zańnamaǵa "revızııa" jasaýdy tapsyramyn", - dedi Elbasy.