Elbasy jeńisi – eldiktiń jemisi!

Qazaqstan Respýblıkasynyń kezekten tys prezıdenttik saılaýy aıryqsha azamattyq belsendilikpen ótip, Elbasy Nursultan Nazarbaevtyń jarqyn jeńisimen aıaqtaldy. Qýanysh qutty bolsyn, halaıyq!

Azamattyq belsendiliktiń asqar asýy

ASTANA Keshe Elbasy Nursultan Nazarbaev Astana qalasyndaǵy Ulttyq akademııalyq kitaphananyń ǵımaratynda orna­las­qan №182-shi saılaý ýchaskesine óziniń otbasy múshelerimen birge kelip, daýys berdi. Daýys berip shyqqan soń Prezıdent ózin kútip turǵan jýrnalıs­terdiń aldyna kelip, shaǵyn suhbat berdi. – Búgin búkil álemniń nazary Qazaqstanǵa aýyp turǵan taǵy bir tarıhı sát. Táýelsizdigimizdiń 20 jyldyǵy qarsańynda biz búgin tarıhı tańdaý jasaǵaly otyr­myz, deı kelip Elbasy Qazaq­stan­nyń ótken qadamdaryna qys­qasha sholý jasap ótti. Biz kópti kórdik, kóp jumystar atqardyq, kóptegen qıyndyqtardy bastan keshtik. Endi aldymyzda memleket pen qoǵam­dy jańǵyrtý sııaq­ty orasan zor mindetter tur. Bizdiń azamattary­myzdyń búgingi daýys berýi alda turǵan osynaý mindetterdi sheshýde bizdiń birlikte ekenimizdi aı­qyn­daıdy. Biz ındýstrııalyq-ın­nova­sııalyq baǵdarlamany iske asyrýǵa bet burdyq. Eldi áleý­mettik jańǵyr­tý baǵdarlamasyn qolǵa aldyq. Osynyń bári qara­paıym adam­nyń ıgiligin kózdeıdi, deı kelip, odan ári Nursultan Ábishuly saı­laý prosesiniń demo­kratııalyq talap­tardy tolyq oryn­dap jat­qanyn atap ótti. Prezıdentke kan­dıdat bolǵandardyń bárine teń jaǵdaı jasaldy. Olar­dyń bar­lyq aımaq­tarda bolyp, saı­laý­shylarmen kezdesýine, BAQ-qa teńdeı qoljetimdi bolýyna múm­kindik týdyryldy. Olar ózde­ri­niń ıdeıalary men pikirlerin ha­lyqqa tolyǵymen jetkize aldy. Sonyń ishinde aıtylǵan keıbir qundy ıdeıalardy qoldaý kerek, dedi ol. Memleket basshysy Prezıdent saılaýyna 1059 halyq­ara­lyq baıqaýshy, 200-den artyq shet­eldik jýrnalıster tirkelgenin atap ótti. Bizdiń eldegi saılaý mine, osyndaı ashyq ta zańdy tur­ǵyda ótip jatyr. Qazaq­stan­dyqtardyń bári daýys berýge ot­basy múshelerimen, toptalyp, ujym bolyp kelýde. Men halyq­tyń osynaý belsendiligine rıza­shy­lyǵymdy bildiremin, dep Nur­sultan Ábishuly sózin aıaqtady. Esildiń sol jaǵalaýynda or­na­lasqan Astananyń bul bóli­gindegi ýchaskege barlyǵy 3131 saılaýshy tirkelgen eken. Olar tańǵy saǵat 7.30-dan bastap kóp­tep kele bastaǵan. Tańǵy saǵat 9.00-de halyqtyń daýys berýge kelisi úlken kezekke aınaldy. Bir­aq mundaıǵa eshkim ókpe aı­typ, narazylyq bildirip jatqan joq, báriniń de júzi shýaqty, kó­ńilderi kóterińki. Biz kezekte turǵan birneshe jandy áńgimege tartyp, kóńil kúılerin bilgen edik. Tólegen men Jibek Omarovtar jeke kásipkerlikpen aınaly­sa­dy eken. Búgingi barlyq sharýa­myzdy keıinge qaldyryp, birinshi kezekte daýys berýge keldik desti olar. Sonsha asyqqanda­ryńyz ne, ózderińiz jaqyn jerde tura­tyn kórinesizder, keshki segizge deıin bir kelmeısizder me degen edik, bizge Elbasy qandaı qoldaý bildirse, biz de qoldan kelgen qoldaýymyzdy oǵan tezirek kór­setýimiz kerek qoı, dedi ekeýi de biraýyzdan. Galına Shepelıýk pen on balanyń anasy Jumagúl Áýel­bekova sııaqty ájeıler óz­deriniń nemerelerimen kelipti. 11 jastaǵy Ál-Qurmanáli áje­siniń kózi qaıbir jazýlardy kórmeı qalsa kómek bermekshi eken. Bu­lar­dan basqa da ondaǵan adam­dardyń pikirlerin bildik. Olar­dyń bári de óz kandıdattary bir­eý-aq ekenin atap berdi. Saılaý ýchaskesiniń tóra­ǵasy Meıram Ja­kenovtiń aı­týyna qaraǵanda, tańǵy saǵat 10-da 427 adam daýys beripti. Men osy ýchaskede 4-shi ret tóraǵa bolyp otyrmyn, saı­laýshylar belsendiligi qalyp­taǵydaı, dedi ol. Munda qatysyp otyrǵan baı­qaýshylar 28 adam eken. Sonyń biri, TMD-dan tirkelgen reseılik Sııabshah Shapıev saılaýshylar belsendiligine óz tańdanysyn jasyra almady. Biz sóılesken 9.30-da bir mınótte 3 adamnyń daýys beretinin atap ótti ol. Saılaýshylar belsendiligi El­basy N.Nazarbaev daýys berip ket­kennen keıin de báseńdemeı, kelýshiler tolassyz aǵylyp jatty. Dál osy ýaqyt aralyǵynda Parlament Senatynyń Tóraǵasy Qasym-Jo­mart Toqaev Kongress-holdaǵy №3, Májilis Tóraǵasy Oral Muha­med­janov №35-shi mekteptegi №5, al Premer-Mınıstr Kárim Másimov M.Gorkıı atyndaǵy orys drama  teatrynda ornalasqan №2 saı­laý ýchaskesine kelip daýys berý arqyly óz tańdaýlaryn jasady. Sol kúni tańerteń Astana qalasynyń «О́ndiris» kentindegi 38-shi saılaý ýchaskesi ornalasqan №49 orta mektepke Qazaq­stan­nyń Kommýnıstik halyqtyq par­tııa­sy atynan kezekten tys prezıdenttik saılaýǵa túsken kandıdat Jambyl Ahmetbekov baryp, daýys berdi. Tańerteńgi saǵat 9-da saılaý ýchaskesiniń tabaldyryǵyn attap, saıası naýqanǵa qatysyp, daýys bergen prezıdenttikten úmitker Jambyl Ahmetbekov óz ómirinde talaı saılaýǵa qatysqanyn, biraq bul saılaý solardyń ishinde erekshe oryn alatynyn atap ótti. «Erekshe bolatyn sebebi, másele bul saılaýǵa ózimniń qatysyp turǵandyǵymda emes. Men osy saıası naýqan arqyly ózime úlken mindet júktegenimdi ishteı sezinip, tolqyp turmyn. Qazaqstan halqynyń aldynda, qoǵamnyń al­dynda úlken aýyrtpalyqty qa­laı alyp júretinimdi jáne al­da­ǵy ýaqytta maǵan sengen halyq­tyń, saılaýshylardyń úmitin qa­laı aqtaımyn degen jaýapkershilik seziminen qobaljyp turmyn. Al negizinen bul saılaýdyń ná­tıjesi qandaı bolsa da, eń al­dy­men, bizdiń elimizdiń ósip-órken­deýge bet burǵandyǵy baıqalady. Bolashaqta bizdiń memleketimiz osy alǵan betinen qaıtpaıdy dep oılaımyn, dedi J. Ahmetbekov óziniń sózinde. Prezıdenttikten úmitker atal­ǵan saılaý ýchaskesine otba­sy­men, ıaǵnı tórt qyzyn ertip kelipti. «Úlken qyzym Perızat jasy 21-de bolsa da, alǵash ret daýys beredi. Qalǵan 3-i – Arýjan, Ká­mıla jáne Aı­nur – bular meniń qoldaýshylarym. Kór­shilerimniń barlyǵy meniń jaqtaý­shy­larym, qoldaýshylarym. Sondyqtan, olar da meni demep, óz azamattyq pa­ryzdaryn atqaryp, daýys berýge keldi», – dedi ol. Bir atap óterligi, bul kúni 38-saılaý ýchaskesine kelip, daýys berýshi azamat­tardyń qatary qalyń kórindi. Ara­la­ryn­da 18-ge tolǵan jasóspirim qyz-ji­git­ter­den bastap, aqjaýlyqty ájeler men qarııalar da bar. Solardyń biri – Sydyq Shatyrbaı degen azamat. Ol prezıdenttik saılaýǵa shyn kóńilmen kelip, daýys berip turǵanyn jetkizdi. «Biz otbasy­myzben Mońǵolııadan Astanaǵa kóship kelgenimizge 5 jyl boldy. Men osyndaı aýqymdy saıası naýqanǵa qaty­syp otyrǵanyma qýanyshtymyn. О́zim 34-shi mektepte tehnologııa páninen sabaq beremin», dedi oralman qandasy­myz. Al «О́ndiris» kentiniń ımamy, 80-di eńsergen Tursynbaı Zakırov degen qarııa óziniń budan burynǵy saılaý­lar­ǵa qatysqanyn, bul saılaýǵa da aı­ryq­sha yqylaspen kelip, daýys berip turǵanyn aıtty. 38-saılaý ýchaskesindegi saılaý kom­mıs­sııasy músheleriniń aıtýynsha, tań­ǵy saǵat 7-den bastalǵan saılaý naý­qa­ny­na saǵat 9-ǵa deıin kelip, óz daýys­taryn bergen jurt qarasy 300-deı adam­dy qurapty. «Saılaý óte jaqsy deń­geıde ótip jatyr. Biz daýys berýdi saǵat 7-de, ıaǵnı óz ýaqytynda bastadyq. Halyqtyń belsendiligi óte joǵary, kó­ńil-kúıleri kóterińki. Saılaýshylardyń arasynda jastar da bar. Bir sózben aıtsam, saılaýǵa azamattar óte kóp kelýde», – dedi 38-saılaý ýchaskesi kom­ıs­sııa­sy­nyń tóraıymy Maıra Qurmanbaeva. ALMATY Tóle bı men Sh.Qaldaıaqov kóshele­riniń qıylysyndaǵy №33 orta mektepte ornalasqan Almaty qalasy №313 saılaý ýchaskesine kelip jetkenimizde tań atqannan silbiregen sýyq jańbyr qylaýlaǵan qarǵa ulasqan. Ýchaskege birli-ekilep kidirissiz kirip jatqan kisiler qarasy birqydyrý sııaqty. Qar úde­melep jaýa tússe de, saılaýshylardyń kóńilinde qylaý joqtyǵy baıqalǵandaı. Mekteptiń kireberis úlken dáliz­jaıy daýys berý úshin arnaıy jab­dyq­talypty. Kórikti, kórkem. Qarsyda – shy­myl­dyq kómkergen daýys beretin kabınalar, onyń aldynda – bıýlletender salynyp jatqan jáshik. Sol jaqtaǵy ús­tel­derde ýchaskelik saılaý komıssııa­synyń músheleri saı­laý­shylardy tizim boıynsha qabyldap, óte jiti uqyp­ty­lyqpen kabınalarǵa qaraı uzatyp sa­lyp jatyr. «Nur Otan» partııa­sy­nyń, prezıdenttikten úmitkerlerdiń, «Azat» qoz­ǵalysynyń baıqaýshylary da osynda. Saılaý ýchaskesiniń tóraıymy Roza Mákejanovanyń aıtýynsha, bulardyń aýmaǵynda eki myńdaı saılaýshy bar kórinedi. Solardyń 80-ge jýyǵy den­saý­lyq jaǵdaıyna baılanysty ýchaskege kele almaıtyn qart adamdar. Eki adam kólikpen júrip, sol kisilerdiń daýys­ta­ryn jınap ákelý úshin arnaıy bólingen. Saılaý ótkizýge kómektesip júrgen 20 erikti jáne bar. Patrıottar partııasynan prezıdenttikke úmitker bolyp túsken Ǵanı Qa­symov saılaý ýchaskesine kishkentaı nemeresi Táńiri-Ǵanıdi ertip ákeldi. Ýchaske tóraıymy osynaý márte­beli saılaý­shy­ny aq tilegin aıtyp, gúl shoqtary­men qarsy aldy. Nemeresin qolyna kó­te­re ustaǵan Ǵanı Esengeldiuly osy jet­kinshek úshin, osyndaı balalar úshin, jas urpaq úshin daýys beretinin málimdedi. Joǵary memlekettik laýazymnan úm­itker úgit naýqanynyń barysynda úlken jumystar júrgizdi, birqatar óńirlerde saılaýshylarmen kóptegen kezdesýler ótkizdi, halyqtyń san alýan topta­ry­men, halyqaralyq baıqaýshylarmen, jýr­nalıstermen júzdesti. Kandıdattyń Almatydaǵy respýb­lıkalyq shtaby, ob­lystar men aýdandardaǵy fılıaldary tynym tappady dese de bolady. Oń­tústik astananyń, Almaty, Atyraý, Shyǵys Qazaqstan oblystarynyń jáne de basqa jerlerdiń júzdegen turǵyn­dary Patrıottar partııa­synyń qata­ryna ótip, úgit-nasıhat jumystaryna belsene qosyldy. Saılaýaldy naýqany kezinde júr­gi­zilgen jumystar kólemin meńzegeni bolar, Ǵanı Qasymov jáshikke bıýlletendi salyp turyp: «Men qolymnan kel­genniń bárin istedim, endi basqalar kelip, menen de kóbirek is atqarsyn», dedi. Ol jýrnalısterge arnap eshteńe aıtpasa da, saılaýshylarmen jaı­mashýaq áń­gi­melesti. Solardyń ishinde qazaq­stan­dyq kompa­nııalardyń biriniń dırektory Vıacheslav Popov ta bar edi. Ol ǵalamtor arqyly úmitkerdiń saıası tuǵyrnamasy jaıynda egjeı-tegjeıli bilip, onymen únqatysypty. Osy ýchaskege Ǵanı Qasymovtyń ózimen júzbe-júz tanysý úshin kelgen beti eken. Daýys berýshiler arasynan ózimiz «Egemende» ótken jazda mereıtoılyq suhbatyn jarııalaǵan ejelgi tany­sy­myz, burynǵy Eńbek mınıstri, kezindegi Temirtaý tarlandarynyń biri Saıat Beı­senovti kórdik. Daýys berýge báıbishesi Bátesh Dúısenqyzymen birge kelgen ol kisi: «Jasyryp-jabatyny joq, men eldiń irgesi shaıqalmasyn dep Elbasyǵa daýys berdim. El ishinde búgingi Pre­zıdentimizdiń bedeli bıik, óresi kemel. Aldymyzdaǵy qazaqtyń altyn ǵasy­ry­na jalyndaǵan jas shaǵymyzdyń serigi bolǵan Nursultan Ábishulymen birge baratynyma senimim kámil», dedi ol. *** Almaty tabıǵaty tosyn minez tany­typ otyr. Keshe jaımashýaq kún edi, búgin – qar aralas jańbyr. Tereńirek oılaıtyndar bul dıqannyń tilegeni, jerge ylǵal kóbirek barady, nur jaýdy dese, qyńyr tartatyndar mynadaı qo­laı­syz sátte halyqtyń daýys berýi tómendeıdi degendi aıtady. Biraq olar­dyń degeni bola qoımaıtyndaı – biz qaladaǵy Seıfýllın jáne Maqataev kóshesiniń qıylysyndaǵy kolledj ǵı­ma­ratynda ornalasqan №247 saılaý ýchas­kesine tańerteń barǵanymyzda, da­ýys berýge kelgen saılaýshylardyń qa­ra­­sy aıtarlyqtaı edi. Ras, munda tańerteń Qazaqstan Res­pýblıkasy prezıdenttigine kandıdat, «Tabıǵat» ekologııalyq odaǵynyń tóra­ǵa­sy Mels Hamzauly Eleýsizov daýys berýge tıis. Soǵan oraı mundaǵylar saı­laýshylardy arnaıy shaqyryp qoı­ǵan shyǵar dep oılaýǵa da bolar edi. Biraq prezıdenttikten úmitker kelmeı jatyp ta biraz adam daýys berip ketipti, sodan keıin úmitkerdiń daýys berý rá­simi ótken soń da munda kelip jat­qan­dardyń qa­rasy az bolǵan joq. Bir sóz­ben aıtqanda, jaýyn-shashyn jurttyń belsendiligine bógesin bola qoımaǵan­daı. Al áńgimeniń qyzyǵy sol prezıdenttikke kandıdattyń daýys berý kezinde boldy – M.Eleýsizov ózine emes, qazirgi Prezıdent Nursultan Nazar­baevqa daý­ys beripti. Mels Hamzauly qolyndaǵy bıýlleteninde qazirgi Prezıdent teginiń tusyna belgi qoıǵanyn jurtqa, osynda kelgen buqaralyq aqp­a­rat quraldary ókilderine kórsetip ba­ryp, ýrnaǵa saldy. – Saılaý naýqany shyn mánine kelgende, bul da jarys. Jeńimpaz aıqyn, ol – Nursultan Ábishuly Nazarbaev. Oǵan daýys bere otyryp, men jeńim­paz­dyń qolyn qystym, – dedi prezıdenttikke úmitker. – Osylaısha men halyq­tyń shyn tańdaýyna degen qurmet kór­setýdiń jańa dástúrin bastadym dep esepteımin. Sirá, Mels Eleýsizovtiń bul qadamy alda biraz sóz bolatyn shyǵar. Jurttyń kópshiligi qoldar. Al aıyptaıtyndar, ásirese oppozısııa arasynda biraz bo­la­tyny da anyq. Keıbireýler onda saı­laýǵa túsip nesi bar dep tabalaıtyny da sózsiz. О́ıtkeni, saılaý ádil júrse, men jeńip shyǵar edim dep ózeýregender de bolǵan. Al parasatty oıǵa júgingender qazirgi ýaqytta bizdiń elimizde kimniń orny qandaı ekenin jaqsy biledi. Osy rette M.Eleýsizovtiń sheshimin sol parasatty oılaýdyń kórinisi desek, lá­zim. Myqtyny moıyndaý da myq­tynyń qolynan keledi. Daýys berer aldynda elimizdiń bas ekology Shanhaı yntymaqtastyq uıy­my­nan kelgen baıqaýshylarmen kezdesip, Ortalyq Azııadaǵy sý problemasy, atap aıtqanda, elaralyq ózenderdi paıdalaný, muzdaqtar problemasy týraly pikirlerin ortaǵa saldy. ShYU ókil­de­rine osy máselege erekshe mán berýin ótindi. Bul jóninde uıymda másele tal­qy­lansa, oǵan qatysýǵa óziniń ázirligin bildirdi. BAQ ókilderi aldyndaǵy áńgime­sin­de M.Eleýsizov saılaý naýqanynyń qa­laı ótkenin baıandady. Osy kezde eldiń batysynan basqa barlyq aımaǵynda bolyp, halyqtyń ómirimen, talap-tilegimen keń tanysqanyn aıtty. Bir óki­nishtisi, barlyq jerde de bolýǵa ýaqyt jetimsizdik etipti. Osy kezde elde «Ta­bıǵat» partııasyn qurý qajettigi týǵa­nyna kózi jetkenin de málimdedi. Oǵan kirmek nıeti bar halyq ta barshylyq eken. Prezıdenttikten úmitker aldaǵy ýaqytta osynaý máselemen belsendi aınalysatyndyǵyn málimdedi. Prezıdenttikke kandıdat Mels Eleý­sizovtiń saılaýaldy shtabynda da dál qazir qarbalas shaq. Shtab bastyǵy Nurjan Oshanbekovtiń aıtýynsha, saılaý naýqanynda úmitkerdiń 683 senimdi ókili halyqpen qoıan-qoltyq jumys istepti. Qazir olar saılaý ýchaskelerinde baıqaýshylyq jumys atqaryp júrgen kórinedi.

AQMOLA OBLYSY

Aqmol aýyly

Búgingi saılaý Qazaqstanymyzdyń ál­em nazaryndaǵy el ekendigin taǵy da dáripteı tústi. Ony Aqmola oblysynda sheteldik memleketterdiń, úkimettik emes uıymdardyń, baspasóz ókilderiniń 500-ge jýyq ókiliniń jumys isteýimen dá­lel­deýge bolady. Olar oblystaǵy barlyq saılaý ýchaskelerindegi saılaý­shy­lardyń joǵary belsendiligine jo­ǵa­ry baǵa berdi. Biz Germanııadan kelgen táýelsiz baı­qaýshy Mıhael Lýbshpen birge birneshe saılaý ýchaskesinde bolyp, onyń bas­pasóz máslıhatyna qatystyq. Oblys ortalyǵy Kókshetaý qalasyn­da­ǵy №6 saılaý ýchaskesinde ol jurt­shylyqtyń saıası oqıǵaǵa beıjaı qaramaıtyndyǵyn atap ótti. Lýbsh myr­zanyń aıtýynsha, Qazaqstan saıası ór­kendiliktiń, kóppartııaly parlamenttiń, erkin saılaýdyń talaptary men onyń qundylyqtaryn bıik deńgeıge kótere biletin tereńdigimen erekshelenedi. Tá­ýelsiz Qazaqstanǵa altynshy ret sapar bastaǵan halyqaralyq baqylaýshy osy elge jıi kelýdiń zor mańyzy barlyǵyn málimdedi. Bizdegi beıbit ómirdiń qym­battylyǵyn kórshiles Tájikstan, О́z­bek­stan, Túrkimenstanmen salystyra saraptama jasaǵan ol otandas­ta­ry­myz­dyń jarqyn bolashaǵyna senimdi ekendigin qulshynys sezimimen bildirdi. «Qazaqstandyq joldyń» úlgi alar tustaryna toqtalǵan Mıhael Lýbsh myrza qaladaǵy «Dostar» mádenıet saraıyndaǵy №40 saılaý ýchaskesinde, «Vıdergebýrt» nemis qoǵamdyq birlestiginde jáne «Tańdaý» mektep-gımna­zııasynda saılaýshylarmen kezdesip, sa­lı­qaly áńgime órbitti. AQTО́BE Kóktemniń shýaǵyna bólengen qala burynǵydan da kóriktenip ketkendeı. Qala kóshelerindegi halyq merekedegideı kóńil-kúıde. Bári de asyǵýly. Úıdiń irgesindegi «Nur Otan» HDP oblystyq fılıalynda ornalasqan №46 saılaý ýchaskesine jetkenshe kórgen kórinisimiz osyndaı. El taǵdyry sheshiletin saıası naýqanda halyqtyń ózderiniń konstı­tý­sııalyq quqyn paıdalanýǵa degen qul­shynysyna saılaý ýchaskesinde de kýá boldyq. El prezıdenttiginen úmitkerler arasynan óz tańdaýyn jasaýǵa yqy­las­tylardyń kezegi úzilmeýde. №46 saılaý ýchaskesiniń tóraıymy Mádına Dos­ja­novanyń aıtýynsha, jergilikti ýa­qyt­pen tańǵy saǵat 9-ǵa deıin osynda tir­kelgen 2058 saılaýshynyń 200-ge jýy­ǵy daýys berip úlgeripti. Adam ómirinde aıryqsha este qalatyn sátterdiń biri kámelettik jasqa jetip, elińniń erteńi synǵa túsetin sátte daýys berý qu­qy­ǵyna ıe bolý ekeni sózsiz. Osy saılaý ýchaskesinde on segiz jas alǵash ret daý­ys berýge keldi. El táýelsizdiginiń qur­das­tary 20 jas ta osy ýchaskege tirkelgen. Olardyń arasynan tuńǵysh daýys berip otyrǵan Naýryzbek Ábilqaıyr men táýelsizdik qurdasy Nurdáýlet Mu­qa­nov birinshi bolyp bıýlletenderin tol­ty­ryp, ózderi tańdaǵan kandı­dat­tar­ǵa daýystaryn berdi. Toqsan jastaǵy Edýard Shaıro, 95 jastaǵy Muǵálıma Músálınova da ejelgi ádetterimen erte kelip, óz tańdaýlaryn jasady. Árıne, olar saılaý ýchaskesi daıyndaǵan syı­lyq­tarmen marapattaldy. Eń bir ádemi kórinis – júrip-turýy qıyndaǵan Ká­mıla Nurǵalıeva ájeıdi nemereleriniń eki jaqtan qoltyqtap ákelip daýys bergizýi boldy. Urpaǵyna baqytty ómir tileıtin qarııanyń bul úrdisi jastarǵa ónege boldy. Saılaýda osy shańy­raq­tyń ózi­nen áje bastaǵan bala-kelini, nemeresi daýys berdi. Oblys ákimi Eleýsin Saǵyndyqov ta osy №46 saılaý ýchaskesine kelip, daýys berdi. О́z tańdaýyn jasaǵan óńir bas­shy­sy buqaralyq aqparat quraldary ókil­de­rimen saılaý kúngi áserimen bólisti. – Men ózimniń azamattyq pary­zym­dy ótedim. Elimizdegi turaqtylyq pen beıbitshilik, bereke-birlik, memleketi­miz­­diń gúldenýi, qýatty bolýy, ómirimiz­diń budan góri de jaqsara túsýi úshin daýys berdim. Elimiz qazirdiń ózinde órkenıetti elder qataryna kirdi, aldaǵy ýaqytta solardyń arasynda aldyńǵy qatardan kórinýine tilektestik nıetimdi bildirdim, – dedi Eleýsin Naýryzbaıuly. Osy saılaý ýchaskesinde bolǵan EQYU Parlamenttik Assambleıasy baı­qaý­shy­la­ry delegasııasynyń ókilderi Ha­nıng Iohansen men Ion Sıgýrd Sıýrsen Kvello saılaýdyń ashyqtyq, ádildik já­ne de­mokratııalyq talaptarǵa saı ótip jat­qanyna tánti ekenin ja­syr­mady. Mun­daı pikirge osynda baıqaýshy bolyp otyrǵan «Nur Otan» HDP, «Nevada-Semeı» ha­lyqaralyq ıadrolyq ja­ry­lys­tar­ǵa qar­sy qozǵalysy jáne «Shy­nar» genderlik ortalyǵy» qoǵam­dyq birlesti­gi­niń ókil­deri Dmıtrıı Dovmatenko, Já­nibek Má­dıhan jáne Sáýle Doshanova da qo­syl­dy. Saılaý ýchaskesine 14.00 sa­ǵatta ha­barlasqanymyzda, 2058 saılaý­shy­nyń 50 paıyzy daýys bergenin bildik. №50 saılaý ýchaskesinde TMD baı­qaý­shylar mıssııasynyń múshesi Gúlsim Kerjikovamen kezdesýdiń sáti tústi. Ha­lyqaralyq baıqaýshy saılaýdyń ótýin baıqaýǵa Reseıden eki delegasııa kelgenin, ózi quramynda bar Saratov obly­synan 16 baıqaýshy qatysyp otyrǵa­nyn jetkizdi. Ol kúndizgi saǵat 11-ge deıin-aq osynda daýys beretinderdiń 50 paıyzy óz tańdaýlaryn jasap úlger­ge­nine rızashylyǵyn jasyrmady. «Qazaqstan Respýblıkasy Prezıden­ti­niń kezekten tys saılaýyn baqylaý jó­nindegi respýblıkalyq qoǵamdyq ko­mıs­sııa» respýblıkalyq qoǵamdyq bir­lestiginiń ortalyq shtaby oblystyq fı­lıalynyń tóraǵasy Halel Qu­saıy­novqa jolyqqanymyzda, óziniń qala­da­ǵy bir­qatar saılaý ýchaskelerinde bol­ǵa­nyn, saıası sharanyń Konstıtýsııalyq ta­laptarǵa jáne demokratııalyq qaǵı­dat­tarǵa saı ótip jatqanyn tilge tıek etti. ALMATY OBLYSY Sáýirdiń 3-i kúngi jeksenbini taldy­qorǵandyqtar asyǵa kútkendeı. Kóktem­niń aq jaýyny sebelep, aspannan nur quı­­ǵandaı. Aýa raıynyń ózgergenine qa­ramastan kóshe boılap, saılaý ýchaskelerine bettegen úlken men kishiniń júzderi jarqyn. Bir-birimen ázildesip, izgi tilekterin toǵystyrǵan. Solardyń qata­rynda aza­mattyq paryzymyzdy ótep, el erteńi úshin daýys berýge shahardaǵy № 9 mektepte ornalasqan saılaý ýchaskesine keldik. Tańerteńgi saǵat 7-ni kútkender qa­ta­ry edáýir. Sálden soń memleketimizdiń ánurany shyrqaldy. Saılaýshylar qo­sylyp, rýhty kóterip, ár júrekke nur syılaǵan án áýeni zal ishin kernep ketti. Budan keıin № 883 saılaý ýchaskesiniń tóraıymy Sálıma Mámleeva jınal­ǵan­dardy óz quqyqtary men bostandyq­tarynyń kepili bolǵan el ómirindegi erekshe kúnmen quttyqtady. Kezekte turǵandar óz aty-jónderiniń alfavıttik ornalasýymen bıýlleten alyp, arnaıy jabyq orynda tańdaý­la­ryn jasap jatty. Soǵys jáne eńbek ardageri Jaqanbaı Ábishovpen tildestik. – Búgingi baqytty ómir Otan úshin ot keshken men tárizdi aǵa urpaqtyń jan­qııarlyq eńbegimen, qanymen keldi. Qa­zaqstan egemen el atanyp, táýelsizdiktiń 20 jylyndaǵy shyqqan bıik pen ta­bys­ty búgingi halyqtyń áleýmettik ja­ǵy­nan qorǵalýymen ólsheýge bolady. Al­ǵash­qylar qatarynda daýys berdim. Tań­daýym naqty. Urpaǵymnyń erteńgi ba­qyt­ty ómiri úshin daýys berdim. Ol berik qolda ekenine senimdimin. О́lim men ómir beldeskende de Otanyma degen azamat­tyq boryshymnan ajyraǵan joq­pyn. Jasym seksennen asqanda da men úshin elimniń tynyshtyǵy men gúl­de­nýinen asqan baqyt joq, – dedi Ja­qan­baı qarııa. Budan soń I.Jansúgirov atyndaǵy má­denıet saraıyna ornalasqan № 872 saılaý ýchaskesine keldik. Munda da kezek kútip, daýys berýge jınalǵandar qa­tary kóp. Saılaýǵa alǵash qatysqan 18 jas­ta­ǵy Evgenıı Berezovoı, saılaýshy Ba­qyt­jan Amırov jáne basqalary óz kan­dı­dattary úshin daýys bergenderin aıtty. Tek, Taldyqorǵan qalasynda ǵa­na 45 saı­laý ýchaskesi bar desek, osy kún­gi ha­lyq­tyń erekshe belsendiligine kýá boldyq. Oblystyq saılaý komıssııasynyń tór­aǵasy Shyraqbaı Jylqaıdarov eli­mizdiń bolashaǵyn aıqyndaıtyn 3 sáý­irdegi kezekten tys prezıdent saılaýy­nyń ótýi jaıly áńgimeledi. – О́ńirde 911 saılaý ýchaskesi jumys ja­saýda. Jalpy saılaýshylar 877877 adam­dy qurady. Sonymen qatar 1073 baıqaýshy tirkelgen. Olardyń qura­myn­da shet eldik jáne saıası partııalardyń, buqaralyq aqparat quraldarynyń ókil­deri bar. Saılaý  jarııalylyqtyń jo­ǵary deńgeı­in­de ótýde deýge tolyq negiz bar. Taǵy bir aıtatynym, ózińiz kór­gendeı, bıylǵy prezıdent saılaýyna degen halyqtyń erekshe belsendiligin aıtýǵa bolady. Jastar da jigerliligimen erekshelendi. Mu­ny sońǵy kezderdegi áleýmettik jaǵ­daıdyń, saıası senim­niń beriktigimen baı­lanystyrsaq qate­les­peımiz. Úmitkerler de belsendiligimen tanylyp, óz múm­kin­dikterin baryn­sha paıdalandy. Jarııa­ly­lyq keń etek alǵan prezıdent saı­la­ýyna jalpy ha­lyqtyń erekshe uıym­shyl­dyqpen qaty­sý­yn osy alǵy­shart­tar­dan izdegen jón, – dedi Sh.Jylqaıdarov. Iá, jetisýlyqtar ózderiniń Ata Zań­da kórsetilgen óz quqyqtaryn paıda­la­nýǵa osylaı baǵa berdi. Elimizdiń ishki jáne syrtqy saıasatynyń negizgi baǵyt­taryn aıqyndaıtyn eń laýazymdy tul­ǵa – Qazaqstan Respýblıkasynyń Prezıdenti ekenine nazar aýdarǵan olar naqty tańdaý jasady. ATYRAÝ Atyraý qalasynan 70 shaqyrymnan astam qashyqta ornalasqan Kaspıı qaı­rańyndaǵy Qashaǵan kenishine ne tik­ushaq, ne júrdek sý kóligi ǵana qa­ty­naıdy. Qashaǵan kenishinen «qara al­tyn» alý qamyna bekem bel býǵan bur­ǵyshylar, tehnıkter, qurylysshylar sekildi san-salaly mamandyq ıeleri qaırańdaǵy jumys ornyna dál osyndaı kóliktermen jetedi. Alaıda, teńiz tó­rindegi jumysshylar úshin senbi, jeksenbilik demalysta da, merekede de jumys toqtamaıdy. Qashaǵanda óner­ká­siptik-tájirıbelik baǵytta burǵylaý júr­gizý maqsatymen bes jasandy aral daıyndalǵan. Tikushaqtan qaraǵanda ja­sandy araldar ádemi kórinedi. Sol araldardyń ishindegi irisi –«D» araly. Munda elimizdiń ár óńirinen 3000-nan asa qazaqstandyq jumysqa tartylǵan. Arnaıy jumys kıimimen júrgen aral­daǵy jumysshylardyń biri, operator Asylbek Ydyrysov «Saılaý komıs­sııa­synyń múshelerin taǵatsyzdana tostyq. Teńiz tabıǵaty qubylmaly. Qatty jel turyp, jańbyr jaýýy, tipti tuman túsýi de múmkin. Teńiz betinde tolqyn oınasa, tikushaq ushpaı qalýy da múmkin. Degenmen, búgingi aýa raıynyń ashyq, jyly bolýy, jeldiń joqtyǵy bizdiń qaýpi­miz­di seıiltti», deıdi. Kaspıı qaırańynda jumys jasaı­tyn qazaqstandyqtar eki saılaý ýchaskesine tirkelgen. «D» aralyna saılaý ko­mıssııasynyń músheleri saılaý bıýlletenderin tikushaqpen jetkizdi. Sóıtip, jumysshylardyń jumys ornynda merziminen buryn ótkizilgen prezıdent saı­laýyna daýys berýine múmkindik jasal­dy. Jumys ýaqytsha toqtatyldy. Daý­ys berý úshin arnaıy oryndar jasaq­talypty. Saılaý bıýlletenderi saly­na­­tyn arnaıy jáshik te ákelindi. – Búgin saılaýǵa birinshi ret qa­ty­syp, daýys berdim. Bul – meniń ómi­rimde este saqtalatyn saılaý, – deıdi jasandy aralǵa tikushaq kelip qonǵansha alańdaǵan jastardyń biri, qubyr qu­rastyrýshy Saǵıdolla Haıroshev. Alǵash ret daýys berýshi jastar mun­da kóp eken. Jaıǵastyrýshy maman­dyǵymen eńbek etetin Aleksandr Krasnobrodskıı de alǵash ret daýys berýi memleket basshysyn tańdaýdaǵy saı­laý­ǵa qatysýymen sáıkes kelgenine qýa­na­dy. Qazaqstandyq jumysshylardyń qaı-qaısysy da eldiń keleshegi úshin, otandyq ekonomıkanyń órkendeı berýi úshin tańdaý jasaǵanyn aıtady. – Qazaqstanda barlyq sala qar­qyn­dy damyp keledi. Ásirese, munaı-gaz ónerkásibiniń keleshegi kemel. Buryn tek qurlyqtan ǵana munaı óndirip kelsek, endi Kaspıı teńizinen de «qara altyn» alýǵa qam jasap jatyrmyz. Os­yndaı úlken jobada jumys jasaıtyn qazaqstandyq mamandardyń básekege qabilettigi qýantady. Búgin, mine, úıi­miz­den alysta, Kaspıı teńiziniń orta­syn­da jumys jasap júrsek te, memleket basshysyn saılaýda óz tańdaýy­myzdy bildire aldyq, – deıdi ınjener Rústem Dúıisqalıev. «D» aralyndaǵy daýys berý kóp ýa­qyt alǵan joq. Túske taman araldaǵy soń­ǵy daýys berýshi bıýlleteni jáshikke salynysymen, saılaý komıssııasynyń músheleri tikushaqpen «A» aralyn betke alyp ushyp ketti. Olardy «A» ara­lyn­da 130 saılaýshy kútip otyrǵan edi. BATYS QAZAQSTAN Saılaýda daýys berýdiń bastalar sáti jergilikti ýaqyt boıynsha tańǵy 7-00-ge belgilengen bolatyn. Osy merzimnen jarty saǵat buryn Oral qala­syndaǵy № 478 saılaý ýchaskesine kelgen qos qarııa komıssııa tóraıymy Marıam Stamqulovanyń nazaryn birden aýdardy. Ekeýi birin-biri demep, súıe­mel­dep keledi. Ári erterek emes pe degen saýalǵa qaraqtarym, saılaýǵa erte kelý bizdiń boıymyzda burynnan qa­lyp­tasqan. Bul jolǵy prezıdenttik saı­laýdyń orny biz úshin tipten aı­ryqsha. Erte kelip qalsaq, eshteńe etpeıdi. Kúte turamyz, dep jaýap berdi ózin Dámesh Jumaǵazıeva dep tanys­tyr­ǵan aq shashty áje. Ýaqyt pen tártipke daǵdylanǵan, ony joǵary baǵalaı biletin, aǵa býyn ókilderi-aı, deseńizshi! Atalǵan ýchaske bul kúnge jan-jaqty tyńǵylyqty ázirlikpen kelgeni kórinip-aq tur. Qaı jaqqa qarasańyz da uqypty qoldardyń, jınaqylyq pen quntty­lyq­tyń izderin baıqaısyz. Budan soń Áb­il­qaıyr han dańǵylynyń boıyndaǵy № 497 saılaý ýchaskesine keldik. Saǵat tili erteńgi 9.40-ty kórsetip tur. Munda daýys berýshilerdiń kezegi paıda bolǵa­ny­na kýá boldyq. «ÝralskDorStroı» AQ-tyń ǵımaratynda ornalasqan ýchaskelik komıssııa tóraǵasy Igor Lı­sı­syndy qınalmaı taýyp aldyq. Árıne jýrnalıstik áýestikpen oǵan daýys berý barysy qalaı degen saýal tastadyq. – Osyǵan deıingi ótkizilgen saılaýlarda da komıssııanyń tóraǵasy bolyp edim. Sol tájirıbem eskerildi me, osy joly oblystyq saılaý komıssııasy ta­ra­pynan taǵy da osyndaı usynys ja­sal­dy. Oǵan kóp oılanbastan kelisim ber­dim. Bizde 2600 saılaýshy tirkelgen. Olardyń belsendiligi buǵan deıingi saılaýlarmen salystyra qaraǵanda joǵary ekeni baı­qa­lady. Osyǵan mereıimiz ósip turǵan jáıi bar. Búgingi erekshelik, saı­laýǵa eshkimdi kúshtep ákele almaısyń. Daýys berý árkimniń óz erki. Bul joly otan­das­ta­rymyzdyń boıyndaǵy azamat­tyq paryz delinetin bıik jaýapkershilik pen adamı asqaq sezimniń tereńdeı tús­kenine kýámiz, – dep aǵynan jaryldy Igor Borısovıch. Sondaı-aq atalǵan ýchaskede qyryq adamǵa óz meken-jaılary boıynsha daý­ys bergizý uıymdastyrylǵan eken. Olar – ózdiginen júre almaıtyn múge­dek jandar, jasy ulǵaıǵan qarııalar. Bul quramda saılaý ýchaskesiniń qyz­met­kerlerimen birge baıqaýshylar ókilderi de bar, deıdi komıssııa tóraǵasynyń orynbasary Nıkıta Sybyrna. Sonymen birge biz Oral qala­syn­daǵy № 470, № 478 jáne № 497 saılaý ýchaskelerinde bolǵanymyzda mundaǵy qoǵamdyq baıqaýshylar men prezıdenttikke kandıdattardyń sengen ókil­de­ri­men jáne kezekten tys prezıdenttik saı­laý barysyn baqylaý jónindegi res­pýblıkalyq qoǵamdyq komıssııalar mú­shelerimen de az-kem til qatysqan edik. Olardyń qatarynda Maqsot Batyrov, Altynaı Esqalıeva, Nadejda Lýchınına, Indıra Muqatova syndy saılaýdyń qyraǵy kózderi bar. Bulardyń qaı-qaısysy da bizge daýys berý respýblıkada qabyldanǵan zańdylyqtar men ere­jelerge sáıkes óz deńgeıi men arna­synda ótip jatqanyn málimdedi. Mundaıda, árıne, saılaý ýchaskelerinen daýys berip shyqqan azamattardan kimge daýys berdińiz dep suraý saılaý jónindegi tártipke de, jýrnalıstik etı­kaǵa da syıymdy bola qoımaýy múmkin. О́ıtkeni bul árkimniń óz quqy ekeni belgili. Degenmen, jýrnalıstik daǵdy men áýestik jeńip ketken sátter de boldy. Sonda bizge Joldasqalı Qurmashev esimdi Oral qalasynyń turǵyny by­laı­sha jaýap qaıtardy. Men qazir tórt prezıdenttikke kandıdattyń arasynan dál kimge daýys bergenimdi jarııa jasamaı-aq qoıaıyn. Degenmen saýalyńyzǵa oraı men el Konstıtýsııasyna, konstıtý­sııa­lyq normalar men zańǵa daýys berdim dep esepteımin. О́ıtkeni biz konstı­tý­sııa­lyq zańmen ómir súrip, eńbek etip kelemiz ǵoı. Búgingi prezıdenttik saılaý da, konstıtýsııalyq normalardy saqtaý men onyń saqtalýynyń basty kórinisi dep esepteımin. Bul da qulaq qoıýǵa, quptaýǵa tu­rar­lyq pikir me dep qaldyq. Fotoreportaj: saılaý sátteri Aqjaıyqta sáýirdiń keshegi aq ta­ńy araılap atty. Aspanda shókimdeı bult joq. Keshigip kelgen kóktem dál keshegi kúni ǵana nuryn meıirlene tókti. Osy kún shýaǵy adamdardyń kó­te­rińki kóńil-kúıimen jarasym taýyp turdy. Daýys berýge Oral qalasynyń turǵy­ny, qos perzenttiń anasy Raıgúl Masalımova da erte jınaldy. Jasy birden endi ǵana asqan Araıdy kóterip alyp saılaý ýchaskesine jınalyp jat­qan­da 6-ǵa kelgen qyzy Ásel men kór­shiniń balasy Músilim: Apa, biz de ba­raıyq­shy saılaýǵa degeni. Ana olar­dyń tilekterin qaıtara almady. Jú­riń­der, endeshe. Erteń sender de ósip, daý­ys bere­sińder, dedi olarǵa meıirlene qarap. Naýryzdyń aıaǵy men sáýirdiń ba­syn­daǵy kúnderde Oral qalasynda erkin jáne grek-rım kúresi boıynsha táý­elsizdiktiń jıyrma jyldyǵyna oraı respýblıkalyq kóktemgi spartakıada ótkizilgen bolatyn. Osy shara­nyń ba­sy-qasynda júrgen, qazaq sporty­nyń maıtalmany Dáýlet Tur­ly­hanovty Oral qalasyndaǵy № 470 saılaý ýchaskesinen kezdestirdik. Ol qashanǵy daǵ­dysynsha sergek te sezimtal qalpynda eken. Daýys berip shyqqan sport qaıratkerine birer saýal tastadyq. – Dáýke, kimge daýys berip shyq­qa­nyńyzdy bilýge bolmas pa eken? – Nege bolmasyn, ábden bolady. Issaparda júrýime baılanysty maǵan pre­zıdenttik saılaýda oǵan daýys berý Oral qalasynan buıyrypty. Saılaý tý­raly zańǵa sáıkes issaparda, dema­lys­ta, emdelýde júrgen azamat­tardyń bári osylaı isteı alady. Kimge daýys berdińiz dedińiz be? Árıne, Nazar­ba­ev­qa. Nursultan Ábishuly sporttaǵy biz­diń barlyq jeńisteri­miz­diń dem berýshisi, tikeleı qol­daý­shysy. Úlken sport – eldiktiń belgisi. Memlekettiliktiń kó­ri­nisi. Osy ar­qyly da Qazaqstan bú­gin­de búkil álemge tanyla bastady, – dedi sport sańlaǵy ashyq-jarqyn únmen. – Qyzym-aý, demep jibershi, meni, baspaldaqtan joǵary qaraı. Daýys berýden keshigip qalyp júrmeıik. Erte bitirgen durys qoı bul isti. Sonda ǵana kóńilimiz ornyǵar, – dep tap-taza peıili men kóńilin ala kirdi saılaý ýchaskesine bir anamyz. Mine, osylaısha araılap atqan sá­ý­ir­diń aq tańynda, júzdegen, myńdaǵan oraldyqtar saılaý ýchaskelerine aǵy­lyp kelip jatty. Kúnniń nury men kóńilderdiń nury bir-birimen ushtas­qan, toǵysqan sátter-aı deseńizshi! Sýretterdi túsirgen  Rafhat HALELOV. JAMBYL Jeksenbige qaraǵan tún qarly bol­dy. Ońtústiktiń jańbyr aralas qary ká­dimgi. Aq ulpaǵa oranǵan taldar beı­kú­ná tompııa qalypty. Aýa bulaq sýyndaı taza, juta bergiń keledi. Taldyń qaı bu­taǵynda otyrǵany belgisiz bir qus, bál­kim qaratorǵaı, óz tilinde tań habaryn bildirip, qyraǵyttaı saırap qoıady. Oǵan kóp uzamaı №33 saılaý bó­lim­shesinen estilgen án men kúı áýeni ul­asty. Tańǵy saǵat jetige on bes mınót qalǵanda kelsek, birinshi bolyp daýys berýden úmitti adamdardyń qarasy kó­beı­ip qa­lyp­ty. Saǵat tili jetini soq­qan­da, bólimshe ishinde elimizdiń Ánu­ra­ny shyrqalyp, tór­aǵa Ǵalym Aǵysov saılaýshylardy qut­tyqtap, el taǵdyry jolyndaǵy saı­laý­da óz tańdaýlaryn jasaýǵa ruqsat berdi. Eń alǵashqy bolyp №13 mekteptiń 11-synyp oqýshysy, 18 jastaǵy Erkin Qur­banov daýys berdi. Tóraǵa onyń Pre­zıdent saılaýyna alǵash ret qaty­syp, óz tańdaýyn jasaýymen quttyqtap, syılyq tapsyrdy. Odan keıin ekinshi, úshinshi saılaýshylarǵa qurmet kórsetildi. Bul bólimshege 1127 saılaýshy tirkelgen. «Saılaýshylar saılaýǵa qatys­paıdy» degen sóz beker eken, jasy bar, jasamysy bar qarly tańnyń salqyn lebine qaramastan saılaý bólimshesine qaraı aǵylýda. Oblys ákimi Qanat Bozymbaev ta ózi tirkelgen №37 saılaý bólimshesine kelip, tańdaýyn jasady. Sonymen birge ol saılaý bólimshesi aldyndaǵy shaǵyn jármeńkeni aralap kórdi. Baǵa saıasatyn turaqtandyrý maqsatynda oblys orta­lyǵynda aqpan aıynan beri azyq-túlik jármeńkesi ótkizilip kele jatqany belgili. Bul dástúr Prezıdent saılaýy kezinde de jalǵasyn taýyp, tańdaý ja­sa­ǵan saılaýshylardyń úıine arzan azyq-túlik satyp ala qaıtýyna da jaǵdaı jasalypty. Durys oılastyrylǵan. – Qanat Aldabergenuly, siz kimge daý­ys berdińiz? – degen saýalymyzǵa ob­lys ákimi: Elimizdegi saıası turaq­ty­lyq pen ekonomıkalyq qarqyndy da­mý­ǵa daý­ys berdim, – dep naqty jaýap berdi. Bul kezde tań aǵaryp atyp qalǵan. Adamdar legi burynǵydan da kóbeıe túsipti. Saǵat tili on jarymda saılaý­shylardyń 30%-y daýys berdi. Tańǵy daýys alysqa estiledi. Qazaq eliniń úni de aq ulpaǵa oranǵan tal­dar­dyń butaǵyna qonaqtaǵan anaý qara­tor­ǵaıdyń ǵajaıyp únindeı álem nazaryn ózine qaratyp, tamsandyra berse eken. Fotoreportaj: saılaý sátteri Qarabulaq, Qa­ra­murt sekildi aýyl­­darynda otyz myń­dyq halqy bar Saıram aýdanynyń or­talyǵy Aqsýkentte tańǵy saǵat jetide-aq saılaýshylar saı­laý ýchaskelerine kele bastady. Aý­dan­nyń qadirli qa­rııalarynyń biri, “Baý­yrmal” syı­ly­ǵynyń ıegeri Karımjan Iýsýpalıev alǵashqy bolyp tań­daýyn jasady. Bata berdi. “Qa­zaq­stan – ondaǵan ulttar men ulystarǵa atameken bo­lyp otyr­ǵan Otany. Bir qoldyń sala­syndaı, bir úıdiń bala­syndaı bolyp otyrǵan osy elge keregi jaqsy ómir men beıbitshilik, turaq­ty­lyq”, deıdi qarııa. On segizge tolǵanyna eki kún ǵana bolǵan Álibek Igisinov te qýanyshty. – Bizge, jastarǵa, Otanymyzdyń bo­­la­shaǵy búgingiden de myqty bol­ǵa­ny kerek. Bul jaıly Elbasymyzdyń ha­lyq­qa Joldaýynda anyq aıtylǵan. Men búgin tańdaý jasaýda qatelesken joqp­yn dep oılaımyn,– deıdi eń jas saılaýshy. Shymkentke oraldyq. №5 saılaý ýchas­kesinde eki búldirshinin ertken erli-zaıypty Ábıbýlla men Sharıpa Qa­lym­betovter daýys berip jatyr. – Bylaıǵy jurt Ádil men Ásemdi kórip: “Nemereleriń be”, dep suraıdy. Qudaıǵa shúkir, nemerelerimiz bar ǵoı, myna qos qulynymyz bizdiń elýge ja­qyndaǵanda kórgen qyzyǵymyz, – deıdi Ábekeń. – Daýys berýge jınalyp jat­saq Ádil: “Men de “Alǵa, Qazaqstanǵa daýys beremin”, dep turyp aldy. Oǵan Ásem qosyldy. Ońtústik Qazaqstan Medısına aka­demııasynyń ǵımaratyndaǵy saılaý ýchas­­­kesine bas suqtyq. Adam qarasy azdaý. 827 saılaýshynyń jartysy daýys berip úlgergen. Ordabasy aýdanynan syralǵy dos, aýdandyq emhananyń bas dárigeri Bolat Saǵymbekov, jýrnalıst Ǵalymjan Zııa­bek telefon shaldy. Saılaý ýchaskelerin aralap júrgenderin aıtady. “Ha­lyqtyń kóńil-kúıi kóterińki.