Fırýza Sháripovanyń kelesi jekpe-jegi ótetin kún belgili boldy

Qazaqstandyq kásipqoı boksshy qyz Fırýza Sháripovanyń menedjeri Sergeı Zavıleıskıı kelesi jekpe-jek qashan ótetinin málimdedi. Bul týraly allfight.ru habarlady. «Fırýza 1 sáýir kúni Máskeýdegi «Boks akademııasynda» kezekti jekpe-jegin ótkizedi. Bul tıtýldy aıqas bolýy múmkin. Ázirge bul másele tolyq sheshilmedi. Sebebi, bul jerde kóp nárse qarjyǵa kelip tirelip tur. Eger demeýshilerimiz tabylyp jatsa, tıtýldy kezdesý bolary anyq. Eger maqsatymyz oryndalmaı jatsa, 8 raýndtan turatyn reıtıngtik urys ótkizemiz. Al kelesi aıqasymyz mindetti túrde tıtýldy bolady. Ýaqytymyzdy joǵaltpaı, osy kóktemde alǵashqy chempıondyq belbeýge qol jetkizýdi josparlap otyrmyz», – dedi Zavıleıskıı. «Sháripovanyń aıqasyn Reseıdiń «Boks TV» jáne «Boes» arnalary kórsetedi. Aldaǵy kúnderi qazaqstandyq telearnalarmen kelissózder júrgizemin. Máselen, kishi Floıd Meıýezer ShowTime arnasymen birlesken bolsa, Golovkınniń HBO-men kelisimsharty bar. Mine, dál solar sııaqty qazaqstandyq belgili bir kanalmen kelisim jasaýdy josparlap otyrmyn. Eger olar jekpe-jek translıasııasyn satyp alýǵa kelisse, biz boks keshin uıymdastyrýǵa daıynbyz», – dedi menedjer. «Fırýza qazir joǵary deńgeıde daıyndalyp júr. «Boks akademııasynyń» bapkeri Sergeı Kýbyshevpen tyńǵylyqty jattyǵý jasap júr. Daıyndyǵyna qarap kóp uzamaı chempıon atanady degen senimimiz bar. Ol úshin azdap qarjydan qınalyp otyrmyz. Al qalǵanynyń bári bizde bar», – dedi Sergeı Zavıleıskıı. Aıta keteıik, qazaqstandyq bylǵary qolǵap sheberi qazirgi ýaqytta Máskeýde jattyǵý jıynynda Sergeı Kýbyshevpen jattyǵý jasap júr. Sońǵy urysyn 24 qyrkúıek kúni Almatyda Serbııa chempıony Mılena Matovıchpen ótkizip, úshinshi raýndta nokaýtpen jeńgen.