APL-diń belgili tóreshisi Saýd Arabııasyna aýysty

Aǵylshyn premer-lıgasynyń tóreshisi Mark Klattenbýrg Saýd Arabııasy fýtbol federasııasyna jumysyn aýystyrdy. Bul týraly eurosport.ru habarlady. «Anglııa kásibı tóreshiler qaýymdastyǵy (PGMOL) Mark Klattenbýrgke Saýd Arabııasy fýtbol federasııasyndaǵy jańa jumysyna sáttilik tileıdi. PGMOL-dyń iriktelgen quramyna engennen bastap joǵary deńgeıde jumys istep keldi. Bul Mark úshin tamasha múmkindik. Sondaı-aq, Anglııa tóreshileriniń bedelin álem aldynda taǵy bir dáleldedi», – delingen PGMOL habarlamasynda. О́tken jyldyń jeltoqsan aıynda Klattenbýrg Saýd Arabııasynan bólek Qytaı Sýperlıgasynan da usynys túskenin aıtqan bolatyn. Aıta keteıik, 41 jastaǵy maman búginge deıin 600-ge jýyq oıynǵa tórelik etken. Sońǵy ret ol 11 aqpanda ótken «Arsenal» men «Hall» arasyndaǵy matchqa basshylyq etti.