EKSPO-ǵa daıyndyq basty nazarda

Ortalyq kommýnıkasııalar qyzmetinde «EKSPO-2017» halyqaralyq kórmesine qatysýshylardyń III jınalysynyń qorytyndysyna arnalǵan baspasóz máslıhaty ótti. Brıfıngte Halyqaralyq kórmeler bıýrosynyń (HKB) bas hatshysy Vısente Losertales, Qytaı Halyq Respýblıkasynyń seksııalar komıssary Van Szınchjen, Lıtva Respýblıkasy seksııalar komıssary Romas Iаnkýas, EKSPO-2017 komıssary Rapıl Joshybaev pen «Astana EKSPO-2017» UK» AQ basqarma tóraǵasynyń orynbasary Erbol Shormanov kórmege daıyndyq jumystary týraly berdi.   Onda Vısente Losertales kesheden beri EKSPO kórmesi ótetin jerde bolyp, qurylys jumystarymen tanysqanyn, qazir kóptegen elder pavılondaryn ashýǵa belsene áreket etip jatqanyn aıtty. Sonymen birge ol kórmeniń aýmaǵynda sheteldik qonaqtarǵa arnalyp salynǵan páterlerdiń qurylysyna baǵasyn berip, «Astana EKSPO-2017» kompanııasy kórmege qatysýshylardy baspanamen qamtamasyz etýde jaqsy jumys istegenin atap ótti. Kezdesýde Erbol Shormanov Halyqaralyq kórmeler bıýrosynyń ókiliniń sózine qosyla kelip, bul jerde 1 374 páterdiń salynǵanyn, onda ulttyq seksııalar komıssarlary, olardyń otbasylary  men basqa da sheteldikterdiń ornalasatynyn aıtty. Al keshegi jıyn týraly «Astana EKSPO-2017» UK» AQ basqarma tóraǵasynyń orynbasary onyń tıisti deńgeıde ótkenin, sheteldik komıssarlardyń elimizdiń kórmege daıyndyǵyna joǵary baǵa bergenin jetkizdi. Sondaı-aq, ol jıynda kórme kezinde bolashaq energııasy salasy boıynsha eń úzdik atanǵan ınnovasııalyq jobaǵa 20 000 eýro kóleminde syıaqy taǵaıyndaý týraly sheshim qabyldaǵanyn málimdedi. –Jıynda kórmege qatysty barlyq máseleni talqyladyq. Qazir EKSPO-ǵa 115 el men 18 halyqaralyq uıym qatysýǵa nıet bildirip otyr. Keshegi basqosýda biz solardyń birimen yntymaqtastyq týraly memorandýmǵa qol qoıdyq. 2020 jyly Dýbaı qalasy kezekti EKSPO kórmesin ótkizedi. Osyǵan baılanysty biz Birikken Arab Ámirlikteriniń ókilderimen ózara tájirıbe bólisý týraly máseleni talqyladyq, – dedi ol. Dastan KENJALIN, «Egemen Qazaqstan»