Aqtóbede kottedjder qalashyǵy salynady

«Nurly jer» baǵdarlamasy aıasynda Aqtóbede kottedjder qalashyǵy salynady. Bıyl jobalyq jumystarǵa 130 mıllıon teńge bólindi, dep habarlaıdy QazAqparat. Aqtóbede «Nurly jer» baǵdarlamasy aıasynda tez turǵyzylatyn turǵyn úıler salý pılottyq jobasy ázirlenip jatyr. Bıyl bul jumystarǵa 130 mıllıon teńge bólindi. Jospar boıynsha 500 turǵyn úı salynady. Bári kottedj bolady. «Eger jospar oryndalsa, «Nur Aqtóbe» yqsham aýdanynda kottedjder salynady. Shamamen 500 turǵyn úı salynyp, qurylysqa qajetti metarıaldyń 90 paıyzy jergilikti jerden satyp alynady. Bul jer kezegin azaıtýǵa baǵyttalǵan jumys. Memleket jer telimi kezeginde turǵan azamattarǵa úı salyp berip, «Turǵyn úı qurylys jınaq banki» arqyly nesıe rásimdeıdi. Bul halyqtyń baspanamen qamtýdyń jańa ádisi. Sátin salsa, osy jyldyń alǵashqy toqsanynda joba daıyn bolady»,- dedi oblystyq qurylys, sáýlet jáne qala qurylysy basqarmasynyń basshysy Serik Tólenbergenov. Aıta keteıik, turǵyn úı aýmaǵy 83 myń sharshy metr bolady. Joba 2017-2018 jyldary júzege asýy tıis.