Isker áıelder keńesi 2016 jylǵy jumys qorytyndysy boıynsha esep berdi

Ortalyq kommýnıkasııalar qyzmetinde «Atameken» Ulttyq kásipkerler palatasynyń Isker áıelder keńesi ótken jylǵy jumys qorytyndysy boıynsha esep berip, aldaǵy ýaqytqa josparymen bólisti. Brıfıngke «Atameken» UKP tóralqa tóraǵasy hatshylyǵynyń jetekshisi, Isker áıelder keńesiniń tóraıymy Lázzat Ramazanova, «Asyl Arman» JShS dırektory, Ońtústik Qazaqstan oblysy О́ńirlik isker áıelder keńesiniń tóraıymy Alma Arhabaeva, «Terrıtorııa dızaına deSali» stýdııasynyń, «Coffee & People» JShS dırektory, Mańǵystaý oblysy О́ńirlik isker áıelder keńesiniń tóraıymy Sáýle Salıhova men «DELUXE» jýrnalynyń bas redaktory Qaraǵandy oblysy О́ńirlik isker áıelder keńesiniń tóraıymy Álııa Sadyrbaeva qatysty. «Búginde áıelder bızneste kún ótken saıyn belsendi bolyp keledi. Kásipkerlikpen aınalysyp jatqan áıelderdiń úlesi aıtarlyqtaı ósti. Qolda bar málimetterge qaraǵanda kásipker áıelderdiń úlesi shamamen 50 paıyzǵa kóbeıdi. Osynyń bári árıne, memlekettiń qoldaýynyń nátıjesinde múmkin bolyp otyr», ­– dedi Isker áıelder keńesiniń tóraıymy Lázzat Ramazanova. Onyń aıtýynsha, byltyr Kásipkerler palatasy alǵash ret Qazaqstannyń 6 óńirinde bıznesti mıkronesıeleý baǵdarlamasyn iske qosty. Aqtóbe, Almaty, Jambyl, Qyzylorda men Mańǵystaý oblystaryndaǵy О́ńirlik keńester osy jobanyń júzege asyrylýynda belsendi jumys atqaryp keledi. Qazirgi kezde Qazaqstan azamattarynyń 52 paıyzy, ıaǵnı jartysynan kóbi áıelder. Elimizde 9 128 098 áıelder turady. Olardyń ishinde 16 jastan 62 jas aralyǵynda eńbekke jaramdylary ­– 5 323 439 (50%). Al shaǵyn jáne orta kásipkerlikti 697 355 (42%) áıel basqarady. «Atameken» UKP 17 666 kásipker áıelge servıstik qoldaý kórsetse, 45 501 áıelge aqparattyq qoldaý jasady. «Isker áıelder keńesiniń jumysynan kóptegen mysaldar keltirýge bolady. Onyń ishinde Shyǵys Qazaqstan oblysynda jalǵyz usta áıel Svetlana Koshelevanyń isi aıryqsha mysal bola alady. Isker áıelder keńesiniń Kókpekti aýdanyndaǵy bólimshesiniń belsendi jumysy men qoldaýynyń arqasynda «Jumyspen qamtýdyń jol kartasy – 2020» baǵdarlamasy aıasynda 2 mıllıon teńge nesıe alyp, óziniń shaǵyn sehyn ashyp, temirden soǵylǵan 10 túrli buıym daıyndaıdy. Mundaı sheberlik eskerýsiz qalmady. Sheberler «Jańa ónim» atalymymen marapattalyp, syı-syıapattarǵa ıe boldy»,­ – dedi Lázzat Ramazanova. Brıfıngte isker hanymdar aldaǵy jylǵa jumys josparymen tanystyryp, barlyq áıelderdi ortaq iske birigýge shaqyrdy. Dastan KENJALIN, «Egemen Qazaqstan»