Aqyshev naýryzda teńgeniń baǵamy qalaı bolýy múmkin ekenin aıtty

2017 jyldyń aqpan aıynda AQSh dollaryna shaqqandaǵy teńgeniń baǵamy 3,5 paıyzǵa nyǵaıdy. Al jyl basynan beri 6,2 paıyzǵa kóterildi. Jalpy, aqpan aıynyń sońyndaǵy teńgeniń baǵamy 2015 jyldyń jeltoqsanynyń ekinshi jartysynan bergi maksımaldy kórsetkish retinde tirkeldi. Bul týraly valıýta naryǵynyń aqpan aıyndaǵy qorytyndysy týraly brıfıngte Ulttyq bank tóraǵasy Danııar Aqyshev málimdedi. «Teńgeniń nyǵaıýyna birinshi kezekte munaı baǵasynyń kóterilýi áser etti. Qazir munaı baǵasy 55 dollardan asyp, sol deńgeıge turaqtady. Jalpy, munaıdyń qymbattaýyna OPEK uıymy men oǵan kirmeıtin ózge de munaı eksporttaýshy elderiniń óndiristi azaıtý týraly kelisimi túrtki boldy", - dedi bas bankır. Sonymen qatar bas bank basshysy aqpannyń ekinshi jartysynda sheteldik valıýtaǵa suranys pen usynystyń kórsetkishi de teńeskenin aıtty. Degenmen, bul ýaqytsha nárse ǵana ekeni de aıtyldy. «Eksporttaýshy kásiporyndar valıýtalyq tabystarynyń bir bóligin salyq tóleýge jumsady. Bul óz kezeginde sheteldik valıýta suranysyn arttyrdy. Nátıjesinde teńge taǵy nyǵaıa tústi. Al "salyq aptasynyń" aıaqtalýymen aqpan sońynda teńge azdap álsiredi. Naýryz aıynda da bul qaıtalanýy múmkin. Degenmen, teńgeniń quldyraýynan munaıdyń qymbattaýy saqtaıdy", - dedi Aqyshev.