Elimizde jyl basynan beri taýar men qyzmetter qanshaǵa qymbattaǵany anyqtaldy

2017 jylǵy qańtar-aqpanda Qazaqstanda ınflıasııa 1,8 paıyz boldy, dep habarlady Qazaqstan Respýblıkasy Ulttyq ekonomıka mınıstrligi Statıstıka komıteti. Aıtýlarynsha, baǵa azyq-túlik taýarlaryna aǵymdaǵy jylǵy eki aıda (2017 jylǵy aqpan 2016 jylǵy jeltoqsanǵa) 2,6 paıyz, azyq-túlik emes taýarlaryna - 1,3 paıyz, aqyly qyzmetterge - 1,2 paıyzǵa ósken. Osy jyldyń basynan (2017 jylǵy aqpan 2016 jylǵy jeltoqsanǵa) baǵanyń ósýi kartopqa 15 paıyz, jańadan jınalǵan kókónisterge - 13,9 paıyz, sıyr etine - 5,3 paıyz, sary maıǵa - 4,3 paıyz, qoı etine - 4,2 paıyz, jańadan jınalǵan jemisterge - 3,3 paıyz, jylqy etine - 2,7 paıyz, máıekti irimshikke - 2,2 paıyzǵa, koservilengen sútke, nanǵa - 2,1 paıyzdan belgilendi. Baǵanyń tómendeýi jumyrtqaǵa 4,7 paıyz, qantqa - 3,2 paıyz, qaraqumyq jarmasyna - 1 paıyzǵa tirkeldi. Al avtomobılderge baǵa ósimi 2,2 paıyz, shyny jáne qyshtan jasalǵan ónimderge - 2 paıyzǵa, farmasevtıkalyq ónimderge, jýǵysh jáne tazalaǵysh quraldarǵa - 1,4 paıyzdan, gazetter, kitaptar jáne keńse taýarlaryna - 1,3 paıyzǵa, jıhaz jáne úıge qajetti zattarǵa, toqyma buıymdaryna, jeke qoldanatyn taýarlarǵa - 1,2 paıyzdan, turmystyq aspaptarǵa - 1 paıyzdy qurady. Benzın 4,3 paıyz, ballondaǵy suıytylǵan gaz - 4,2 paıyzǵa qymbattady. "Baǵa deńgeıi quqyq qyzmetterine 7 paıyz, kólik quraldaryn saqtandyrý - 6,8 paıyz, densaýlyq saqtaý - 2,3 paıyz, demalys, oıyn-saýyq jáne mádenıet salasyndaǵy - 1,4 paıyzǵa ósti. Qalaaralyq avtobýspen jol júrý aqysy 2,7 paıyzǵa qymbattady, al jolaýshylardyń áýe kóligimen - 9,1 paıyz, temir jol kóligimen - 0,3 paıyzǵa arzandady. Turǵyn úı-kommýnaldyq qyzmetter salasynda tarıfter kárizge 6,8 paıyz, taratý jelileri arqyly tasymaldanatyn gazǵa - 4,2 paıyz, ortalyqtan jylytýǵa -2,4 paıyzǵa, elektr energııasyna, ystyq sýǵa - 2,3 paıyzdan, sýyq sýǵa -2,2 paıyzǵa joǵarylady", - delingen vedomstvo habarynda.