Aleksandr Borodıýk: Qazaqstan quramasyna jas talanttardy tartýym qajet

Birer kún buryn ǵana Qazaqstan ulttyq quramasynyń jattyqtyrýshysy bolyp taǵaıyndalǵan Aleksandr Borodıýk «Sport-Ekspress» basylymyna suhbat berdi. О́tken aıdyń basynda Borodıýktiń Belarýs quramasyn jattyqtyratyny habarlanǵan. Al byltyr Reseı quramasynyń tizginin ustaıtyndardyń tiziminde boldy. Sondaı-aq, az ýaqyt buryn óz eliniń quramasynda sport dırektory qyzmetin atqarýy múmkin ekendigi aıtyldy. «Byltyr Vıtalıı Mýtkomen kezdeskenim ras. Biraq túbinde tańdaý maǵan túspedi. Stanıslav Cherchesovke tek sáttilik tileımin. Al sport dırektory, jastar quramasyn jattyqtyrý jaıly tek gazet betterinen ǵana oqydym. Onyń bárin sybys dep qabyldaý qajet. Onyń ústine aldaǵy jyldary jattyqtyrýshy bolyp qana qyzmet etkim keledi», – dedi Qazaqstan quramasynyń jańa jattyqtyrýshysy. «Bir jarym aı buryn Mınskide boldym. Belarýs ulttyq quramasyndaǵy jumysym jaıly talqyladyq. Biraq federasııa bul máseleni keıinge shegerý týraly sheshim qabyldady. Mine, osy ýaqytta Qazaqstannan usynys tústi. Áýbákirov Qanysh Qaıdarulymen (Qazaqstan fýtbol federasııasynyń birinshi vıse-prezıdenti) kezdesý ótkizdim. Bári oıdaǵydaı ótti. Usynysy maǵan qyzyǵyraq bolyp kórindi. Úsh kúnniń ishinde bári sheshildi. Onyń ústine byltyr «Qaıratta» jumys istegendikten, Qazaqstannyń fýtbolǵa degen kózqarasyn jaqsy bilemin. «Astana», «Tobyl», «Ordabasy», «Atyraý» syndy ujymdar jyldan jylǵa kúsheıip keledi», – dedi Aleksandr Borodıýk. Qazaqstan quramasy 2018 jyly ótetin álem chempıonatynyń irikteý kezeńinde 2 upaımen sońǵy orynda keledi. Al jańa bapkerdiń aldyna qandaı tapsyrma berildi? «Komanda quramyndaǵy oıynshylardy jasartý, jas fýtbolshylardyń talantyn ashý, laıyqty oıyn kórsete alatyn komanda jasaqtap shyǵarýym kerek. Árıne, sport bolǵannan keıin jeńis pen jeńilistiń qatar júrýi zańdylyq. Biraq bastysy bul synda baryńdy salýyń qajet», – dedi ol. Jańa bapker kelgennen keıin jankúıerlerdiń nátıje kúteri anyq. Al ÁCh 2018-ge joldama alý múmkin be? «Federasııada shyndyqqa týra qaraıtyn kisiler jumys isteıdi. Kóshbasshy komandalardan upaı aıyrmashylyǵymyz óte joǵary. Biraq ár bapker komandasyn tek jeńis tuǵyrynan kórgisi keledi. Men de solaı bolsa eken deımin. Qaramaǵymdaǵy jigitterdiń óz eliniń namysy úshin baryn salǵanyn qalaımyn», – dedi ol. «Quramada kómekshim Vıktor Losev bolady. Ekeýimiz bir kezderi «Dınamo» komandasynda, olımpıadalyq quramada birge oınaǵanbyz. Reseı Federasııasynda, jastar quramasynda birge qyzmet ettik. Ekeýimiz burynnan tanyspyz, fýtbolǵa degen kózqarasymyz da birdeı», – dedi ol. Aıta keteıik, Aleksandr Borodıýk Qazaqstan quramasymen úshjyldyq kelisimshartqa otyrdy.