Zań shyǵarý jumysynda eskeriletin bolady

Senatta memlekettik bılik tarmaqtary arasyndaǵy ókilettikterdi qaıta bólý máseleleri jónindegi konstıtýsııalyq reformalar jobasy boıynsha Joǵarǵy Sot jáne Bas prokýratýra basshylyǵymen kezdesý boldy. Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Serik Aqylbaı konstıtýsııalyq reformalar aıasyndaǵy sottar men prokýratýra qyzmetiniń negizgi baǵyttaryn talqylaý taqyryby ekenin atap ótti. Joǵarǵy Sottyń mamandandyrylǵan sot alqasynyń tóraǵasy Aıgúl Qydyr­baeva sot júıesiniń qyzmetin jetildirýge qatysty birqatar usynys aıtty. Atap aıtqanda, Joǵarǵy Sot sýdıalarǵa qoıy­latyn talaptar Konstıtýsııalyq zań deńgeıinde bekitilgeni oryndy dep sanaıdy. Sondaı-aq, sýdıalyqqa úmitkerlerdiń eń tómengi jasyn 25-ten 30-ǵa deıin kóterýdi usyndy. Qazaqstandaǵy Ult josparyn iske asyrý aıasynda úsh deńgeıdegi sot tóreligi júıesi engizildi. Osyǵan baılanysty Kons­tıtýsııada jergilikti jáne basqa sottar­ǵa qatysty Joǵarǵy Sottyń kassasııa­lyq ınstansııa mindetin júzege asyratyny kórinis tabýy tıis. Ata Zańnyń 81-babyna tıisti ózgerister engizý kózdelip otyr. Odan basqa, A. Qydyrbaeva «Astana» halyq­ara­lyq qarjy ortalyǵy sot júıesiniń qyz­metin retteıtin túzetýlerge de toqtaldy. Bas prokýrordyń birinshi orynbasary Iogan Merkel óz sózinde bılikti qaıta qalyptaý jaǵdaıynda prokýratýra qyzmetiniń konstıtýsııalyq negizderi de naqtylanatynyn atap ótti. «Prokýratýra tejemelik pen arasalmaq júıesinde Konstıtýsııanyń myzǵymastyǵy men adam men azamat quqyqtarynyń kepili – Prezıdenttiń quraly bolyp qala beredi, degenmen, qadaǵalaýdyń shegi men sıpaty zańmen belgilenedi», – dedi I.Merkel. Ol engiziletin ózgerister prokýratýranyń konstıtýsııalyq ókilettikterin azaıtpaıtynyn atap ótti. Prokýratýranyń jekelegen ókilet­tikterin bıliktiń sot tarmaǵyna berý de usynylyp otyr. Odan basqa, prokýratýra Konstıtýsııada bekitilgen memleket múddesin qorǵaý qajet bolatyn istermen shektelip, jeke daýlarǵa qatysty azamattyq isterge qatysýyn qysqartýdy jalǵastyrýǵa nıettenýde. I.Merkel Bas prokýratýraǵa Kons­tıtýsııalyq keńeske derbes úndeý jasaý quqyǵy berilýi, sondaı-aq, prokýratýra­nyń mártebesi men óki­lettigin Konstıtý­sııa­lyq zań deńgeıinde belgileý týraly senator Rashıd Túsip­bekov­tiń usyny­sy­na qoldaý bildirdi. «Konstıtýsııa­lyq zańda joǵary deńgeıde qadaǵalaý júr­gizetin konstıtýsııalyq organ retinde prokýratýranyń rólin atap ótý durys dep sanaımyz», – dedi Bas prokýrordyń birinshi orynbasary. Senat depýtattary Rashıd Túsipbekov, Dýlat Qusdáýletov, Darhan Káletaev, Lıýdmıla Poltorabatko, Manap Kóbenov Konstıtýsııaǵa jáne basqa da zańnamalyq aktilerge usynylatyn ózgerister týraly óz oılaryn ortaǵa saldy. Sharany qorytyndylaı kelip, senator Serik Aqylbaı pikirsaıys barysynda aıtylǵan usynystar konstıtýsııalyq reformany iske asyrý jónindegi zań shyǵarý jumysy barysynda eskeriletinin aıtty. Joldybaı BAZAR, «Egemen Qazaqstan»