Aleksandr Borodıýk: Komandanyń jeńiske degen senimdiligin arttyrǵym keledi

Birer kún buryn ǵana fýtboldan Qazaqstan ulttyq quramasynyń jattyqtyrýshysy bolyp taǵaıyndalǵan Aleksandr Borodıýk «Sport-Ekspress» basylymyna suhbat berdi. Jańa bapker aldaǵy jospary jaıly, ujymǵa qandaı ózgeris engizgisi keletinin málimdedi. «Komandanyń álem chempıonatynyń irikteý kezeńinde ótkizgen oıyndarynyń bárin kórdim. Baıqaǵanym, psıhologııalyq turǵydan senimdilik jetispeıdi. Jigitterdiń boıyndaǵy senimdilikterin oıatyp, jeńiske degen qulshynystaryn arttyrǵym keledi. Bul olardyń qolynan keledi», – dedi Aleksandr Borodıýk. «Tehnıkalyq turǵydan oıynshylardyń bári jaqsy deńgeıde. Tek azdap kózqarastaryn ózgertý kerek. Alańǵa qos komanda 11 fýtbolshysyn shyǵarady. Fızıkalyq jáne psıhologııalyq turǵydan kim myqty bolsa, sol ujym jeńiske jetedi. Mysalǵa birer aı buryn Qazaqstan jastary Granatkın týrnırinde ekinshi oryn alǵanyn aıtýǵa bolady», – dedi ol. «Eýropada matchtar keshke taman bastalsa, Qazaqstanda túnniń bir ýaǵy bolady. Onyń ústine alys elderge jol júretin kezder bolady. Mine, osynyń bárin aldyn ala josparmen oryndaý kerek», – dedi ulttyq quramanyń bas bapkeri. «Qazaqstannyń Azııa konfederasııasyna kóshýi kerek pe?» degen suraqqa: «Eshqashan artqa qadam jasaýǵa bolmaıdy. Eýropanyń úzdikterimen kúsh synasyp, damý kerek. Ol úshin jaǵdaıdyń bári jasalǵan. Almatyǵa jaqyn jerde arnaıy bazasy bar. Al eýrokýboktarǵa qatysý arqyly Qazaqstan chempıonaty kúsheıe túsedi», – dedi ol.