Stoılov: «Qaıratty» jeńý úshin barymyzdy salamyz

"Astana" fýtbol komandasy óz alańynda daıyndyq jumystaryn bastap ketti. Eki kúnnen keıin, ıaǵnı 4 naýryz kúni maýsymdy Almatynyń "Qaıratyna" qarsy Qazaqstan Sýperkýbogi úshin bolatyn oıynmen ashady. Oqý-jattyǵý jıyndary, jas oıynshylardyń jumystary jáne "Qaıratqa" qarsy oıynda fýtbolshylardyń jeńiske degen senimdiligi jóninde bas bapker Stanımır Stoılov áńgimelep berdi. Bul týraly fca.kz habarlady. «Oqý-jattyǵý jıyndaryn joǵary deńgeıde ótkizdik. Biz úshin jaǵdaıdyń bári jasaldy. Fýtbolshylardyń daıyndyq jumystary aldaǵy maýsymda jetistikterge jetkizedi dep senemin. Joldastyq kezdesýlerdegi jeńis nemese jeńilis eshnársege sebep bolady dep oılamaımyn. Basty másele klýbtyń maýsymǵa qandaı daıyndyqpen kelýi jáne qalaı bastaýynda bolmaq. О́tken oıyndarda biz qorǵanysta jaqsy oınaı aldyq, biraq shabýyl shebindegi qıyndyqtarymyzdy sheshýimiz qajet. Jalpy, men oıynshylardy qorǵaýshylar jáne shabýylshylar dep bólip jatpaımyn, komanda alda da, artta da jaqsy oınaýy tıis», – dedi Stoılov. Oqý-jattyǵý jıyndarynda negizgi qurammen jastardyń da attanǵany belgili. «Úlken fýtbolǵa jańadan qadam basyp kele jatqandyqtan, kóp eńbektený kerek. Joǵary deńgeıdegi tájirıbesi joq, degenmen soǵan uqsap baǵýda. Dál osy qarqynda jalǵastyrar bolsa, bir-eki jylda «Astanaǵa» talantty oıynshylar kelýi múmkin. Al eger juldyzdyq aýrýǵa shaldyǵar bolsa, bolashaǵyna keri áserin tıgizip alady. Qazir barlyǵy óz qolynda. Olardy múmkindiginshe qoldaımyz, jetistikterge ıtermeleımiz, «Astana» mentalıtetin sińdiremiz», – dedi ol. Komandaǵa jańadan birneshe oıynshylar keldi. «Jattyǵý kezinde baryn salyp júrgenderin kórdim, maǵan da keregi sol. Jańa fýtbolshylardyń deńgeıi resmı oıyndardan keıin belgili bolady. Biz olardy «Astana» komandasynyń álsiz tustaryn tolyqtyra alady degen oımen aldyq», – dedi «Astananyń» bas bapkeri. 4 naýryz kúni Almaty qalasyndaǵy Ortalyq stadıonda el Sýperkýbogy sarapqa salynady. «Qaıratqa» qarsy oıynda fýtbolshylar ylǵı da jeńiske jetý úshin aıanyp qalmaıdy. Ol jaǵyna óz basym tolyǵymen senimdimin. Qazaqstandaǵy eń myqty qos komanda kezekti ret synǵa túspek. Bizdi Almatyda tartysty oıyn kútip tur», – dedi ol. «Jankúıerler komandanyń on ekinshi oıynshysy» degen uǵym bar. «Olar bizdi ótken jylǵydaı qoldaıdy dep oılaımyn. Al biz óz kezegimizde jankúıerlerimizdi qýantý úshin bar kúshimizdi salatyn bolamyz», – dep qorytyndylady ol.