"Astananyń" eń jas oıynshysy: Bapkerlerimniń úmitin aqtaǵym keledi

«Astananyń» eń jas debıýtanty Mádı Jaqypbaev komandadaǵy alǵashqy oıynyn 15 jasynda ótkizgen. Jas talant komandanyń jańa maýsymǵa daıyndyǵy jaıly oı bólisti. Bul týraly fca.kz habarlady. «Maýsym aldynda eki úlken oqý-jattyǵý jıynyn ótkizdik. BAÁ-de fızıkalyq daıyndyqqa kóńil bólse, Túrkııada oıyn ýaqytyna kóbirek mán berip, jigitterdiń bir-birine úırenisýine múmkindik berdi», – dedi Mádı Jaqypbaev. «Astanada» jastarǵa kóbirek kóńil bóledi. Tıisinshe, bapkerler alqasy maǵan qajet tapsyrmalar berip, senimdiligimdi oıata tústi. Jańa maýsymda laıyqty oınaý úshin jaǵdaıdyń bári jasaldy. Árıne, ońaıǵa soqpaǵany anyq. Biraq qolymnan kelgenniń bárin jasaý úshin tyrysyp júrmin. Fýtboldaǵy jolym endi bastaldy. Tynbaı daıyndalyp, berilgen múmkindikterdi tıimdi paıdalanýym qajet. Tájirıbesi kóp áriptesterimnen úırenerim bar», – dedi jas talant. Erekshe oıynymen kózge túsken ol Qazaqstan jastar quramasyna da shaqyrtý alǵan. «Jańadan kelgennen keıin kóp ýaqyt bere qoımady. Munyń bári ýaqytsha dep úmittenemin. Bapkerlerdiń senimin aqtaǵym keledi», – dedi ol. Sanaýly kúnderden keıin Qazaqstan premer-lıgasynyń jańa maýsymy da bastalady. Al «Astana» maýsymdy el Sýperkýbogynda «Qaıratqa» qarsy oıynmen ashady. «Ujymdaǵy jeńiske degen senimdilik, áriptesterimizben baılanysymyz joǵary deńgeıde. Osynyń arqasynda jańadan qosylǵan jigitter tez úırenisip ketti dep oılaımyn. Qazirgi ýaqytta oıymyzdyń bári almatylyqtarǵa qarsy match jaıly. О́z oıynymyzdy kórsetip, qajetti nátıjege qol jetkizemiz degen úmittemin», – dedi 15 jastaǵy jartylaı qorǵaýshy.