Kóktemgi sý tasqynynyń aldyn alýǵa, odan qutqarýǵa daıyndyq retindegi respýblıkalyq shara bıyl Qostanaıda ótti. Oǵan Qazaqstan Respýblıkasy Ishki ister mınıstriniń orynbasary Iýrıı Ilın kelip, Qostanaı oblysynyń ákimi Arhımed Muhambetovpen kezdesti. Kezdesý barysynda óńirdiń kóktemgi sý tasqynyna daıyndyq máseleleri talqylandy. Olar tótenshe jaǵdaılar departamentiniń qutqarý bólimshelerin aralady. Oblysta bul sharaǵa 201 adam, 75 tehnıka qatysty.
Respýblıkalyq sharanyń ekinshi kúni Qostanaı qalasy tóńiregindegi, Tobyl ózeniniń jaǵasyndaǵy birneshe jerde oqý-jattyǵýlar ótti. Daıyndyq sharasy sheńberinde sý tasqyny kezinde bolyp qalýy yqtımal oqıǵalardyń aldyn alý nemese qutqarý tásilderi júzege asyryldy. Soltústik aýmaqtyq aeromobıldik jedel qutqarý otrıady Tobyl ózeninde muz astyna ketken adamdardy qutqarýdyń, mashınany shyǵaryp alýdyń tórt kórinisin kórsetti. Qutqarýshylar muz jarý, sý tasqynynan zardap shekkenderge kómek, qutqarý kezindegi arnaıy tehnıkalardy paıdalanýdy jurt nazaryna usyndy.
Oblystyń soltústik jaǵyndaǵy Uzynkól aýdanynda qardyń qalyńdyǵy 43 santımetrge jetedi. Sonymen qatar, osyǵan uqsas kórinis Qarabalyq, Qostanaı, Naýyrzym, Qarasý jáne Áýlıekól aýdandarynda da baıqalady. Oblystyq tótenshe jaǵdaılar departamentiniń basqarma basshysy podpolkovnık Rýslan Orynbekovtiń aıtýynsha, óńirde qarǵyn sýda qalýy múmkin 59 eldi meken baqylaýǵa alyndy. Oblysta qazir kóktemgi sý tasqynyna qarsy qımyl úshin 829 tehnıka, 129 júzý quraldary, 263 sý sorǵysh tehnıka, 26700 ydys-qap, 10 myń tonnadan astam ınertti materıaldar, 97 tonna janar-jaǵar maı daıyn.
Názıra Járimbetova,
«Egemen Qazqstan»
