- Qurmetti, Shavkat Mıromonuly, bul Sizdiń О́zbekstan Prezıdenti retindegi Qazaqstanǵa jasap otyrǵan alǵashqy saparyńyz. Astanaǵa qandaı sezimmen kele jatyrsyz?
Shyndyǵynda da Qazaqstanǵa josparlanyp otyrǵan aldaǵy memlekettik sapar bizdiń ekijaqty qarym-qatynasymyz úshin mańyzdy saıası oqıǵa bolyp tabylady. Bul eń aldymen tarıhy ortaq, mádenıeti men rýhanı damýy, dástúrleri men dini bir eki eldiń baılanysynda erekshe mańyzǵa ıe. Qazaqstan men О́zbekstan qarym-qatynasynyń joǵary deńgeıdegi kórsetkishi Máńgilik dostyq týraly shart pen Strategııalyq áriptestik týraly kelisim ekeni sózsiz. Sonymen qatar, halyqaralyq jáne óńirlik saıasattyń kóptegen máseleleri boıynsha bizdiń ustanymdarymyz uqsas. О́zbekstan men Qazaqstan óńirdegi ahýalǵa ózderiniń tutastaı jaýapkershiligin sezinedi, Ortalyq Azııadaǵy qaýipsizdik pen beıbitshiliktiń nyǵaıýyn barynsha qoldaıdy.
Biz Qazaqstannyń halyqaralyq qaýymdastyqtaǵy bedeliniń ósip otyrǵanyna qýanamyz. BUU Qaýipsizdik Keńesiniń turaqty emes múshesi bolýdyń ózi Qazaqstannyń halyqaralyq arenadaǵy rólin aıqyndap, halyqaralyq qoǵamdastyqtaǵy ornyn kórsetip otyr.
Qazaqstan Prezıdentimen bolatyn aldaǵy kezdesýde biz eń birinshi kezekte elder arasyndaǵy baılanysty belsendi ete túsý máseleleri boıynsha pikir almasyp, tutastaı óńirdegi jaǵdaıdy da talqylaıtyn bolamyz. О́zbekstan halqy baýyrlas Qazaqstannyń Prezıdenti retinde Nursultan Ábishuly Nazarbaevty biledi jáne qurmetteıdi. Byltyrǵy jyldyń qyrkúıek aıynda dosy О́zbekstan Respýblıkasynyń Tuńǵysh Prezıdenti Islam Abdýǵanıuly Kárimovty eske alý úshin N.Nazarbaevtyń bizdiń elimizge arnaıy kelýin halyq onyń tulǵalyq qasıeti retinde joǵary baǵalanǵan bolatyn. Mundaı dúnıeler esh ýaqytta umytylmaıdy...
Qazaqstanǵa saparym bizdiń qarym-qatynasymyzdy damyta túsý úshin jańa qadamdarǵa jol ashady dep senemin. Eki eldiń de halqy dál osynaý kezdesýden kóp nárse kútip otyrǵanyn bilemiz. Ondaı senimderdiń aqtalatynyna da meniń úmitim mol.
- Sizdiń basshylyǵyńyzda qabyldanǵan asa mańyzdy qujattardyń biri 2017-2021 jyldarǵa arnalǵan О́zbekstan Respýblıkasyn damytýdyń bes basymdyq baǵyttary boıynsha is-qımyldar strategııasy bolyp tabylady. Qujatta Halyqpen dıalog jáne adam múddeleri jyly baǵdarlamasyn júzege asyrýǵa erekshe nazar aýdarylǵan. Memlekettiń keleshek damýy úshin nege dál osy basymdyq tańdap alyndy?
Siz táýelsiz О́zbekstannyń Tuńǵysh Prezıdentiniń basshylyǵymen tabysty naryqtyq ekonomıkany qurý qolǵa alynyp, onyń basym bóligine qol jetkenin biletin bolarsyz. О́mir bir ornynda turmaıdy, eldiń odan ári ornyqty damýyn qamtamasyz etý úshin áli de kóp dúnıeler jasalýy kerek. Qabyldanǵan is-qımyl strategııasy aldaǵy bes jyl ishinde О́zbekstannyń qalaı damıtynyn aıqyndaıtyn bolady.
Bul baǵdarlamalyq qujat memlekettik qurylys salasyn, sot-quqyqtyq reformalardy qamtıdy, turaqty ekonomıkalyq ósimdi, áleýmettik salany damytýdy qalyptastyrady, el qaýipsizdigi men syrtqy baılanystardyń damýyn qamtamasyz etedi. Strategııa - bul kabınette týǵan oıdyń jemisi emes ekenine nazaryńyzdy aýdarǵym keledi. Bul qujattyń jobasy jalpyhalyqtyq maquldaýǵa ıe boldy, aldyn ala qoǵamnyń keń aýqymdaǵy talqylaýynan ótip, onyń barysynda myńdaǵan usynystar aıtylyp, jańa bastamalar kóterildi. Ondaı usynystar men bastamalardyń basym bóligi qujattyń sońǵy redaksııasynan kórinis tapqan bolatyn. Qujattyń negizgi maǵynasyn memleketimizdiń odan ári damý basymdyqtarynyń tańdaýy dep aıqyndaǵan bolar edim. Al ondaǵy basty máseleler adamı múddeler jáne onyń qajettiligi men suranysyn qamtyp, О́zbekstannyń birtutas memleket retinde adam quqyqtaryna kepil berilgen, ornyqty damýy qamtamasyz etilgen damyǵan elder qataryna kirýden týyndaıdy. Strategııanyń mańyzdy bóligi - 2017 jyl bizdiń elimizde Halyqpen dıalog jáne adam múddeleri jyly retinde jarııalandy. Bul negizinen bılik pen elimizdiń kez kelgen azamattary arasyndaǵy tikeleı baılanysty qalyptastyrýdyń ózektiligimen túsindiriledi. Bul rette byltyrǵy jyldyń sońyna taman halyq pen memleket arasyndaǵy ózara is árekettiń tıtimdi tetigi retinde vırtýaldy qabyldaý ashylyp, onda búgingi kúnge deıin jarty mıllıonnan astam adam pikir bildirgen. Osyndaı ótinishterdiń barlyǵy derlik qaralyp, belgili bir formada jaýaptar berildi.
Men halyqpen dıalogsyz eshqandaı da tabysty damýdy qamtamasyz etý múmkin bolmaıtyndyǵyna senimdimin. Al munyń túpki mánine kelsek, ol qarapaıym ǵana formýladan turady: halyq memleketke emes, memleket halyqqa qyzmet etýi kerek. Meniń oıymsha, О́zbekstanda búgin atqarylyp jatqannyń bári osy kvıntessensııada.
- Ortalyq Azııanyń tabysty damýy negizinen bizdiń memleketterimizdiń arasyndaǵy yntymaqtastyq sapasy men deńgeıine baılanysty. Osy turǵydan alǵanda Siz qazirgi qazaq-ózbek qatynasyn qalaı baǵalar edińiz?
О́zbek-Qazaq qarym qatynasy shyndyǵynda da Ortalyq Azııanyń ornyqty damýynda úlken mańyzǵa ıe. Sol úshin de bizdiń memleketterimiz arasynda strategııalyq áriptestik týraly qujatqa qol qoıylýy kezdeısoqtyq dep aıta almaımyn. Ol qujat sózsiz barlyq baǵyttaǵy yntymaqtastyq máselelerimen tolyqqan. Biz basqalardaı emes, óz zamanymyzdyń eń kúrdeli kezeńderinde óńirdegi beıbitshilik pen turaqtylyqty saqtap qaldyq. Memleketter arasynda úlken ári salmaqty konflıktiler oryn alǵan joq. Bizdiń memleketter basshylarynyń, olardyń kóregendik saıasatynyń arqasynda kúni búginge deıin Ortalyq Azııanyń basqa da memleketterimen óńirdegi yntymaqtastyqqa kórinis beretin ózara tıimdi qarym qatynasty ornata aldyq. Men Ortalyq Azııany ıadrolyq qarýdan azat aımaq retinde jarııalap, bul bastamany álemdik arenada ilgeriletý, sonyń ishinde Birikken Ulttar Uıymynyń resmı qujaty retinde bekitý óńirlik mánge ıe bolyp qana qoımaǵanyn, onyń jahandyq deńgeıdegi ıadrolyq qarýdy taratpaý rejımin nyǵaıtýǵa kóp septigin tıgizgenine senimdimin.
Ortalyq Azııany damytý týraly aıta otyryp, biz kez kelgen kóliktik-kommýnıkasııalyq, energetıkalyq sıpattaǵy iri jobalardyń óńir memleketteriniń belsendi árekettesýinsiz, olardyń ıntegrasııasynyń joǵary deńgeıinsiz júzege asyrý múmkin emes ekenin jaqsy túsinemiz. Búgingi kúni Ortalyq Azııanyń halyqaralyq energetıkalyq jáne kóliktik jobalarda basty oıynshy bolyp kele jatqany - bul kóbinese osy óńirdegi memleketterdiń belsendi syrtqy saıasatyndaǵy qyzmetteriniń nátıjesine baılanysty. Birlesken jumystardyń arqasynda Ortalyq Azııa Batysty Shyǵyspen, Ońtústikti Soltústikpen baılanystyratyn halyqaralyq kólik dálizderiniń qıylysyna aınalyp otyr. Sonymen qatar, búgingi kúni Uly Jibek joly jańa bazada qalpyna kele bastady. Osyǵan baılanysty men Ortalyq Azııa memleketterin osydan birneshe ǵasyr burynǵy kezeńdegideı Eýrazııa qurlyǵyndaǵy basty kólik arterııasynyń júreginde turmyz dep aıtar edim.
Sonymen qatar, Qazaqstan О́zbekstannyń mańyzdy ekonomıkalyq áriptesteriniń qataryna kiretinin úlken yjdahattylyqpen aıtyp ótkim keledi. Árıne, jahandyq qarjy daǵdarysy elder arasyndaǵy taýar aınalymynyń qarqynyna áser etpeı qoımady. Áıtse de bizdiń elderimizdiń yntymaqtastyǵynda iske aspaǵan áleýetterdiń basym bóligi osy salada ekenin moıyndaýǵa týra keledi. О́zbekstanda qazaqstandyq kapıtaldyń qatysýymen jumys istep jatqan 230 kásiporyn bar. Al Qazaqstanda bizdiń elimizdiń rezıdentteriniń qatysýymen 130-ge tarta kásiporyn jumys isteýde. Bul kórsetkishti eseleı túsýge de bolatyn edi. Taýar aınalymyn da birneshe esege arttyrýǵa múddelimiz.
- Sońǵy kezderi zamanaýı halyqaralyq saıasatta «halyqtyq dıplomatııa» atalatyn fenomen belsendi damyp keledi. Bul ǵylym men mádenıet, parlamentteraralyq baılanystar, óńirlerdiń tikeleı qarym qatynasy, iskerlik ortalardyń aralasýyn bildiredi. Siz bizdiń memleketter, halyq arasyndaǵy osy baǵyttaǵy yntymaqtastyqtyń perspektıvalary týraly ne aıtar edińiz?
Iá, shynynda da qazirgi tańda halyqaralyq qatynastar tek úkimettik jáne dástúrli dıplomatııalyq formattar arasynda toǵyspaıdy. Ekijaqty baılanystardyń tereńdigin aıqyndaıtyn mańyzdy faktor retinde búgingi kúni parlamentaralyq baılanystar, ókiletti bılik organdary arasyndaǵy baılanystar qubylysy beleń alyp otyr. Parlamenttik dıplomatııa uǵymy da jaıdan jaı týǵan joq dep oılaımyn, olar memleketter arasyndaǵy qarym qatynastyń mańyzdy resýrsyn qamtyp otyr. Bul rette áńgime ekijaqty qarym qatynastardyń normatıvtik quqyqtyq bazasyn jetildirýdegi parlamentshiler róli turǵysynda ǵana emes, olardyń halyq ókilderi retindegi mártebesinde bolyp otyr. Sondyqtan da olardyń daýysy men olar aıtatyn salmaqty sózderiniń ózi memleketter arasyndaǵy yntymaqtastyqtyń mańyzdy faktory bolyp tabylady.
Aldaǵy saparǵa toqtalsaq, onda bizdiń elderimiz arasyndaǵy parlamentaralyq baılanystardyń jańa paraǵyn ashatyn jeke qujatqa qol qoıý kútiledi. Aıta keterligi, jaqynda О́zbekstannyń О́lıı Májilis Senaty men Zańnama palatasynyń birlesken qaýlysymen Qazaqstan Parlamentimen yntymaqtastyq jónindegi parlamentaralyq top quryldy. Bizdiń oıymyzsha, bul asa mańyzdy másele, óıtkeni parlamentshiler arasynda tyǵyz baılanys ornatý kóptegen salalar boıynsha yntymaqtastyqty belsendi etýdiń katalızatory retinde úlken ról atqarady. Máselen, sonyń biri óńiraralyq baılanysty damytý. Osy baǵytta jumystardyń bastalǵany da erekshe qýantady. Sońǵy birneshe aıda О́zbekstannyń birqatar óńirleriniń Qazaqstanǵa saparlary oryn aldy. Qazaqstannan bizge de kelip jatyr. Tashkent delegasııasy Almatyǵa bardy, al bizge óz kezeginde Qyzylorda jáne Shyǵys Qazaqstan oblysynyń delegasııasy kelgen bolatyn. Mundaı saparlar barysynda óńir ókilderi kóptegen máselege qol jetkizgenin, sonyń ishinde birlesken ekonomıkalyq jobalardy júzege asyrý týraly ýaǵdalastyqtar jasalǵanyna qýanyshtymyn. Budan bólek, memleketter arasyndaǵy, shekara mańyndaǵy aýdan turǵyndarynyń ózara aralasýy úshin, mádenıet jáne bilim berý salasynda baılanystar ornatylatynyna erekshe nazar aýdarý kerek. Men eki memleket halqy jaqyn aralyqta osyndaı yntymaqtastyqtyń nátıjesin joǵary baǵalaıtyn bolady dep oılaımyn.
О́tken joly ǵana О́zbekstanda beıbitshilik pen kelisimdi qamtamasyz etýde mańyzdy ról atqarǵan Qazaqstan halqy Assambleıasynyń delegasııasy bolyp qaıtty. Sapar aıasynda Respýblıkalyq ınternasıonaldyq ortalyq ókilderimen jemisti kezdesýler ótti. Udaıy baılanysý jáne tájirıbe almasý týraly ýaǵdalastyq jasaldy. Biz halyqtyq dıplomatııa týraly sóz etkende, kóbinese mádenıet, ǵylym men bilim salasynyń ókilderi arasyndaǵy baılanys týraly oılaımyz. Shyndyǵynda О́zbekstan men Qazaqstan arasynda osy baǵyttaǵy baılanystardy jańa deńgeıge kóterý qajettiligi bar dep senemin. Bizdiń saparymyz barysynda osy saladaǵy yntymaqtastyqty jalǵastyrýdyń naqty mehanızmi týraly kelisimge kele alamyz dep oılaımyn.
- Prezıdent laýazymyna kiriskennen bastap Siz Ortalyq Azııa óńirin О́zbekstannyń syrtqy saıasatyndaǵy basymdyqtar retinde belgiledińiz. Sizdiń oıyńyzsha Ortalyq Azııada óńirlik yntymaqtastyqty nyǵaıtý úshin asa mańyzdy baǵyttar qandaı?
Bizdiń memleketimizdiń syrtqy saıasatyndaǵy mańyzdy baǵyttardyń biri kórshiles memlekettermen baılanysty nyǵaıta túsý bolyp tabylady. Bul tabıǵı umtylys. О́ıtkeni О́zbekstannyń ornyqty damýy eń birinshi kezekte bizdiń óńirlik saıasatymyzdyń qanshalyqty durys ári jaqsy jolǵa qoıylǵanyna baılanysty bolyp tabylatyny sózsiz. Osyny túsiný mańyzdy. Bizdiń bárimiz de Ortalyq Azııa - bul ǵasyrlar boıy ortaq geografııalyq, ekonomıkalyq jáne mádenı, rýhanı keńistikte ómir súrgen birtutas organızm ekenin jaqsy bilemiz. О́ńir halqyn tolǵandyratyn máseleniń barlyǵyn, ár memleket jeke dara óz betinshe sheshe almasy haq. Máselen, memlekettik shekaranyń delımıtasııa jáne demarkasııa problemalary, kóliktik kommýnıkasııalar, ekologııa, sý resýrstaryn tıimdi ári ádil paıdalaný. Ortalyq Azııada sý resýrstary udaıy ótkir másele bolyp keldi, al búgingi jahandyq jylymyq jaǵdaıynda sýdy tutyný arta túsip, bul problema odan saıyn asqynyp otyr. Biz búgingi tańda ózara birlese otyryp sýdyń árbir tamshysyn saqtap qalý sharalaryn qamtamasyz ete almasaq, bul bizden keıingi keleshek urpaq aldyndaǵy úlken qylmysymyz bolar edi.
Bul rette de árbir memleket tipti sýdy únemdeýdiń eń ozyq tehnologııasyn qansha qoldanyp baqsa da, óz betinshe osynaý problemany sheshe almaıtynyn basa aıtqym keledi. Bul másele boıynsha bizdiń Qazaqstanmen ortaq túsinigimiz qalyptasqan, biz osy baǵytta biryńǵaı strategııany júrgizýge shaqyramyz, máselelerdi sheshý úshin biryńǵaı halyqaralyq quqyqtyq normalardyń bolýyn qoldaımyz.
О́ńirdegi úlken resýrstarǵa ıe bolyp, aýqymdy basymdyqtardy qamtyp otyrǵan basqa elderdiń de ondaı resýrstardy elden oqshaýlana paıdalana almaıtynyn da aıta ketsem. Bir el ózi jekedara álemdik naryqqa energoresýrstardy jetkize almaıdy, kórshilesterin aınalyp ótip, taýarlaryn syrtqy tası almaıdy. Sondyqtan da, ózara kelisý kerek, sol arqyly kóliktik aǵyndardy basqarýdyń biryńǵaı ıntegrasııalanǵan júıesin qurý qajet, jańa kóliktik dálizder ashsaq ta odan bizdiń barlyǵymyz da utarymyz anyq.
О́ńirlik yntymaqtastyq máselesine qaıta orala otyryp, men búgingi О́zbekstannyń saıasatyn bylaı aıqyndaıtyn edim: ótkir máselelerden qashpaı, aqylǵa qonymdy kompromısterdi izdený kerek. Qazaqstandaǵy alda kútilip otyrǵan kelissózderdiń kún tártibinde óńirlik damý máseleleri de qamtylyp otyr. Bul negizinen qazirgi problemalardy sheshý joldaryn izdeý, óńirdegi iri jobalardy birlese júzege asyrýǵa negizdelgen sharalar. Osynyń bári biz úshin birinshi kezektegi mindetter bolyp tabylady.
- Sizdiń Prezıdent N.Nazarbaevpen kezdesýińizdiń kún tártibinde óńirlik jáne halyqaralyq qaýipsizdikti nyǵaıtý máseleleri de talqylanady. Osy baǵytta Astana men Tashkenttiń qandaı ózara is qımyl perspektıvalaryn atar edińiz?
Búgingi halyqaralyq ómirde oryn alyp otyrǵan negizgi problemalar boıynsha О́zbekstan men Qazaqstannyń ustanymyny basym jaǵdaıda sáıkes kelip otyrǵany anyq. Biz syrtqy saıasat arenasynda bir birimizdiń bastamalarymyzǵa qoldaý bildirip keldik, qoldaı beretin bolamyz dep te senemin. Bizdiń elderimiz halyqarlyq deńgeıdegi de, óńirdegi de qaýipsizdikke erekshe alańdaıdy. Osy turǵydan alǵanda biz óńirdegi beıbitshilik pen turaqtylyqtyń nyǵaıýyna aýqymdy jasampaz jumystar atqaryp jatqan Qazaqstannyń rólin joǵary baǵalaıtynymyzdy bildirgim keledi. Bul rette Qazaqstan tarapynan kóptarapty yntymaqtastyqty damytý boıynsha bastamashylyq jasalǵan Azııadaǵy ózara is-qımyl jáne senim sharalary jónindegi keńesti (AО́SShK) atasaq ta jetkilikti. Al beıbitshilik pen turaqtylyqqa qaýip tóndiretin transulttyq qaterlerge kelsek, bizdiń oıymyzsha olarǵa qarsy turý halyqaralyq deńgeıde de bolý kerek. Meniń paıymdaýymsha, maýsym aıynda Astanada ótetin ShYU otyrysy, jáne osynaý kópbaǵytty uıymǵa Qazaqstannyń tóraǵalyq etýi óńirdegi beıbitshilik pen turaqtylyqty nyǵaıtý baǵytynda da, transulttyq qaterlermen kúres máseleleriniń tıimdiligin arttyrý úshin de úlken mánge ıe bolady.
Qaýipsizdik máselesinde О́zbekstan men Qazaqstan udaıy ShYU men basqa da forýmdardy naqty áreketter boıynsha qadam jasaýǵa shaqyryp keledi. Biz qaýipsizdik problemasy ornyqty ekonomıkalyq damýmen, adamdardy tolǵandyratyn máselelerdi der kezinde sheshýmen tikeleı baılanysty ekenin qashanda túsinemiz. Sondyqtan da terrorızm jáne radıkalızm sekildi qubylystarmen kúres tek qaýipsizdik sharalaryn belsendi etýdi ǵana qamtymaı, ornyqty ekonomıkalyq ósimdi kúsheıtý, kásipkerlikke erkindik berý, adamdardyń qajettilikterin qanaǵattandyrý sekildi sharalardy kúsheıtýmen baılanysty bolatynyna mán berýimiz kerek dep oılaımyn. Bizdiń oıymyzsha, bul qaýipsiz jáne ornyqty damýdy qamtamasyz etýdiń alǵashqy sharty.
Memleketimizdiń óńirlik saıasaty jáne kórshiles eldermen qarym qatynasyn ıntensıfıkasııalaý týraly aıtqanda О́zbekstanmen shekaralasatyn Aýǵanstanǵa nazar aýdartamyz. Shyndyǵynda bárimiz de Aýǵanstandaǵy jaǵdaıdyń Ortalyq Azııa elderi úshin belgili bir qaterler týǵyzatynyn túsinemiz. Sondyqtan da, О́zbekstan da, Qazaqstan da aýǵan problemasynyń tezirek rettelgenin qalaıdy.
Aýǵanstannyń beıbit jolǵa túsýi kóbinese ekonomıkalyq damýǵa baılanysty, al buǵan bizdiń óńirimizdegi memleketter qatysa alady jáne qatysýy da qajet. Árıne, munda Aýǵanstandaǵy birlesken ınfraqurylymdyq jobalar da úlken ról atqarady. Sonyń ishinde óńirdegi elderdiń Ońtústik Azııa, Parsy shyǵanaǵy, Taıaý Shyǵys elderiniń portyna shyǵaratyn transaýǵandyq kólik dálizi oń áserin tıgizedi dep oılaımyn. Meniń oıymsha óńirlik ózara árekettestikter arqyly Aýǵanstanda energetıkalyq sektordy damytý, kóliktik kommýnıkasııalar sekildi salalarda birlesken jobalardy júzege asyrý osy eldegi beıbit prosesstiń nyǵaıýyna úlken ról atqaratyn bolady.
- Shavkat Mıromonuly, Naýryz meıramyna oraı qazaqstandyqtarǵa tilegińizdi de bildire ketseńiz.
Osy jolǵy Qazaqstanǵa saparymnyń Naýryz meıramymen tuspa tus kelýiniń tereń sımvoldyq máni bar. Naýryz - bizdiń erteden kele jatqan ortaq, ulyq merekemiz, ol Jańa jyldyń kelgenin, jańǵyrý men jańa ómirdiń bastalǵanyn bildiredi. Bul kúnderi Qazaqstan Konstıtýsııaǵa ózgerister engizip, mańyzdy sheshim qabyldap jatsa, О́zbekstan da bes basym baǵyt boıynsha is-qımyl Strategııasyn júzege asyra bastady. Endeshe bizdiń elderimiz de jańǵyrý men jańa damý tabaldyryǵynda tur.
Biz shyn kóńilden Qazaqstannyń odan ári gúldenýin tileımiz. О́zbek eliniń úlken dosy, qurmetti Nursultan Ábishuly Nazarbaevtyń dana basshylyǵyndaǵy Qazaq eli «Qazaqstan-2050» Strategııasyndaǵy kózdegen mindetterge qol jetkizip, álemniń damyǵan elderiniń qatarynan kórinetinine senimdimin. Bundaı uly maqsattarǵa qol jetkiziletininen esh kúmán joq, sondyqtan Qazaqstan halqy da damýdyń jańa deńgeıine kóteriledi degen senimdemin.
Naýryz meıramynda árbir qazaqstandyq otbasyǵa ıgilik, baqyt, beıbitshilik pen gúldenýdi tileımin.
- Qurmetti Prezıdent myrza, Sizdiń mazmundy suhbatyńyzǵa alǵys aıtamyz!
