Petropavl qalasynda 400-den astam aýla bar. Jaqsy bastama jurtshylyq tarapynan qoldaý taýyp, Ulystyń Uly kúnderi 600-ge jýyq qoǵamdyq, mádenı-sporttyq sharalar qamtyldy. Bir atap óterligi, halyqtyq serýender 21 naýryz kúni teatrlandyrylǵan horeografııalyq "Qosh keldiń, mereıli Naýryz!" qoıylymymen ashylyp, eki kúnge sozyldy.
Aımaq basshysy Q. Aqsaqalov soltústikqazaqstandyqtardy kóktemniń rýhanı jańarý merekesimen quttyqtap, dinı jáne etnıkalyq belgilerine qaramastan barlyq qazaqstandyqtardyń ortaq meıramyna aınalǵanyn atap ótti.
Ortalyq alańda 11 kıiz úıden turatyn etnoaýyl ornalasyp, olardyń qatysýymen «Naýryz–kóktem shýaǵy degen atpen konserttik, oıyn-saýyq jáne balalarǵa arnalǵan «Saltymyzdy saqtaıyq!» tanymdyq baǵdarlamalar kórsetildi. Saýda oryndarynda aýyl sharýashylyq ónimderi men azyq-túlik taǵamdary arzan baǵamen saýdalandy. Etnomádenı birlestikter 15 metrlik «Dostyq» dastarhanyn jaıyp, 10 qazan palaý basyp, 9 myń baýyrsaq pisirdi. Dámdiligi til úıiretin taǵamdar turǵyndar men meımandarǵa tegin taratylyp, ulttyq ánder shyrqaldy. Dekoratıvti-qoldanbaly óner týyndylaryn satyp alýshylar qatary da qalyń boldy. Ásirese,oqýshylardyń aǵashtan jasaǵan buıymdary ásemdigimen tańqaldyrdy. Qaıyrymdylyq aksııasy aıasynda múmkindigi shekteýli jandar, ata-ananyń qamqorlyǵynsyz qalǵan balalar, kóp balaly otbasylar "Nevtýn" akvaparki men attraksıondardy tamashalaý múmkindigine ıe boldy. Shaǵyn etnoaýyldar yqshamaýdandarda, aýlalarda, aýdandarda boı kóterip, Naýryz merekesi barynsha ulttyq naqyshta kórinis tapty.
M. Qozybaev atyndaǵy Soltústik Qazaqstan memlekettik ýnıversıteti elimiz boıynsha «Ulttyq kıim» aksııasyn birinshi ret qolǵa alyp, barlyq mektepter tarapynan keń qoldaý tapty.
Merekelik sharalar aýyldarda da jalǵasyp, sahnalyq, sporttyq alańdar uıymdastyryldy. Osylaısha kún men tún teńesip, jer-dúnıe jańaryp, erekshe túrge engen tamasha mezgildi soltústikqazaqstandyqtar da óz máninde qarsy alyp, shyǵaryp saldy.
О́mir Esqalı, "Egemen Qazaqstan"
Soltústik Qazaqstan oblysy
