Ulystyń uly kúnin atyraýlyqtar da aıryqsha saltanatpen qarsylady. Kóktemniń, jańarý men jasampazdyqtyń merekesin toılaý 14 naýryzdan beri jalǵasyp jatyr.
Atyraý oblysynyń ákimi Nurlan Noǵaev atyraýlyq sábılerdiń tusaýyn kesti. Tusaý kesý rásimi oblys ortalyǵynda ótken Naýryz merekesin toılaý kezinde ótti.
Sábılerdiń biriniń tusaýyn ala jippen, endi birinikin toq ishekpen kesken aımaq basshysy bul yrymdardardyń maǵynasyn túsindirip berdi:
“Ala jippen keskenimiz – eshkimniń ala jibin attamasyn, eline adal qyzmet qylsyn degen nıetimiz, al toq ishekpen keskenimiz – eli, halqy toq bolsyn, otanynan yrys ketpesin degenimiz”, – dedi Nurlan Noǵaev.
Aımaq basshysy turǵyndardy jańa jyl merekesimen quttyqtap, elge baq-bereke, yrys pen yntymaq tiledi, ekonomıkalyq-áleýmettik órleýdiń jalǵasa túsýi úshin atyraýlyqtardy bir bolyp eńbek etýge shaqyrdy.
Ortalyq alańda ótken teatrlandyrylǵan konsertte sahna tórinen Alash arystary Álıhan Bókeıhanov, Ahmet Baıtursynov, Mirjaqyp Dýlatov, Halel Dosmuhamedovter, Qaztýǵan jyraý, Isataı men Mahambet batyrlar, Qazaq handyǵynyń negizin qalaǵan Kereı men Jánibek handar, el úshin qyzmet etken basqa tarıhı tulǵalar turǵyndardy jańa jylmen quttyqtady.
Munaıly aımaqtaǵy mekemeler men kásiporyndar arasynda ulttyq salt-dástúrlerden kórinis qoıý saıysy da joǵary deńgeıde ótti. Al búgin Isataı-Mahambet alańynda «Kosh keldiń, Áz-Naýryz!» atty teatrlandyrylǵan kórinis kópshilik nazaryna usynyldy. Ulttyq oıyndar, jergilikti taýar óndirýshilerdiń jármeńkesi, konserttik baǵdarlama merekelik kóńil-kúı syılady.
- Bıyl Naýryz toıy aıryqsha ótip jatyr, - deıdi Atyraý qalasy ákimdiginiń baspasóz hatshysy Ardaq Jýasov. - «Úzdik kıiz úı», «Dámdi naýryz kóje» baıqaýlaryna aımaqtaǵy otandyq jáne sheteldik mekemeler, qoǵamdyq birlestikter uıymshyldyqpen qatysty. Oǵan Qazaqstan men Qyrǵyzstan Respýblıkalaryna eńbek sińirgen qaıratker, kompozıtor Ilıa Jaqanov bastaǵan qazylar alqasy tórelik jasady.
Ortalyq alańnyń ózinde 25 kıiz úı quryldy. Yqsham aýdandar men qala mańyndaǵy eldimekenderdi qosqanda elýge jýyq kıiz úı saltanattyń sánin keltirdi.
Baqytgúl BABASh,
«Egemen Qazaqstan».
