Naýryz shyqty. Kóktemmenen
Búrshik jardy tal-daraq,
Boı umsynyp kókke órlegen
Turmyn taýǵa men qarap.
Túlep jatyr tylsym álem
Jaınap, gúldep, jańaryp,
Tabıǵattyń bir syńary em,
Tynystaıyn keń alyp.
Sergitpesin meni nege
Saf aýanyń samaly,
Tátti shaqtan tebirene
Keýdem jyrǵa tolady.
Kúlimdegen kún nurymen
Qulpyrýda aınalam.
El qaýyshyp bir-birimen
Naýryz toıyn toılaǵan.
Jyldy qarsy ap jurtym jatyr,
Saltymyz sol baıaǵy.
Kún teńelip tún túrdi aqyr,
Aıǵa ańsar aýady.
Dastarqanyn bári aıamas,
Ult dástúri bar taǵy –
Jeti túrli dám aralas
Jyl kójesin tartady.
Kel, Naýryzym! Jańa shyraı,
Jer-dúnıeni jasandyr,
Kópten beri dál osylaı
Tamsanyp ek qashan bir.
Samǵap ǵalam kógine erkin
Shyǵa bersin tek tórge,
Ýa, Jasaǵan, momyn eldiń
Qýanyshyn kóp kórme!
Adamdardyń alyp-ushqan
Appaq kóńil kúıin bil.
Saqtap sátin saǵynysqan,
Uzaǵynan súıindir!
Úmit BITENOVA
Jambyl oblysy,
Qarataý qalasy
