«Kelesi jekpe-jegim 17-maýsymda ótip qalýy múmkin. Sol kúni Saýl Alvarespen jekpe-jek ótkizgim keledi. Múmkin, meniń kelesi qarsylasym Sonders bolyp qalar. Kez kelgen usynysty qabyldaýǵa daıynmyn». О́z kezeginde Bıllı Djo Sonders te Golovkınmen qaı jerde bolmasyn judyryqtasqysy keletinin, tipti Qazaqstanǵa da kelýge daıyn ekenin málimdedi.
- Kez kelgen jerge barýǵa daıynmyn. Jekpe-jektiń Qazaqstanda ótetinine baılanysty ýaıymym joq. Ashyq alańda da judyryqtasa beremin. Eger Golovkınge WBO belbeýi qajet bolsa, men ony báske qoıýǵa daıynmyn. Rasynda Golovkın myqty, alaıda ol men sııaqty boksshymen áli kezdesip kórgen emes. Tipti, men babymda bolǵan kezde meniń deńgeıime jetpeıtin Djeıkobstyń ózi oǵan qarsy tótep bere aldy, - dedi Sonders. Ekeýiniń osy pikirlerinen keıin boks jankúıerleri 17-maýsym kúni Astanada Golovkın-Sonders jekpe-jegi ótetinine sene bastaǵan edi.
Alaıda, jýyrda sheteldik jáne elimizdiń BAQ ókilderi Gennadıı Golovkın brıtan boksshysy Bıllı Djo Sonderspen EHRO aıasynda Astanada ótedi dep josparlanǵan jekpe-jekten bas tartqanyn habarlady.
Golovkın-Sonders jekpe-jegi ótpeýiniń 2 sebebi
Boks sarapshylarynyń aıtýynsha, Golovkın-Sonders jekpe-jegi ótpeýiniń 2 sebebi bar. Birinshi sebep, Gennadııdiń Djeıkobspen kezdesýde jaraqat alyp qalýy. GGG bapkeri Abel Sanches shákirtiniń jaraqaty bar ekenin aıtqanymen, Golovkınniń komandasy áli naqty bir málimdeme jasamady. Gennadııdiń jaraqaty týraly sózimiz jalań bolyp qalmas úshin, osy jerde Abel Sanchestiń pikirin keltire keteıik:
«Golovkın Djeıkobspen ótkizgen kezdesýden keıin shamaly mazasy bolmaı turdy. Ádette jaraqat jekpe-jekten eki ne úsh kún ótkennen keıin baıqala bastaıdy. Biz Golovkınmen birge uzaq ýaqyttan beri jumys istep kelemiz. Sondyqtan, jaraqaty aýyr bolsa, ol maǵan aıtar edi. Alaıda, Golovkın shaǵym aıtatyn boksshylardyń qatarynan emes. Bul jekpe-jekten keıin bolatyn kishigirim jaraqattar. Sebebi, jekpe-jek qıyn boldy» deıdi Sanches.
Osy pikirde bir shıkilik bar ekenin ańǵarýǵa bolady. О́ıtkeni, Abel jekpe-jekten keıin Golovkınniń mazasy bolmady dese, ekinshi sózinde jaraqattar 2-3 kúnnen keıin shyǵatyn edi deıdi. Jekpe-jekten soń Gennadııdiń mazasy bolmaı tursa, belgili bir deńgeıde jaraqaty bar degen sóz. Aýyr jekpe-jekten keıin jaraqat bolatyny da ras. Demek, Sonderspen kezdesý jaraqat sebebimen bas tartyp otyr jáne ol jekpe-jekke Golovkın daıyn emes. Sózimiz jalǵan bolmas úshin, mynadaı mysal keltire keteıik.
Golovkınniń jaraqaty jeńil degenniń ózinde, ony tolyq emdeýge shamamen 1 aıǵa jýyq ýaqyt ketedi dep esepteıik. Árıne, biz Gennadııdiń jaraqaty bar ekenin, onyń qanshalyq aýyr ekenin anyq aıta almaımyz. Bul tek joramal. Sonymen qatar, mundaı aýyr kezdesýden keıin boksshy qalpyna kelý úshin kem degende 2-3 apta qajet. Al, kelesi jekpe-jekke deıin babyna ený úshin sportshyǵa 8-10 aptalyq jattyǵý jumysy qajet bolady.
Endi esepteńiz, Golovkın-Sonders jekpe-jegi 17-maýsymǵa josparlanǵan. Al, Gennadııge emdelý men qalpyna kelý úshin bir jarym aı qajet bolsa, babyna ený úshin 2 - 2,5 aı jattyǵý kerek. Sóıtip, jekpe-jekke tolyq daıyn bolý úshin 4 aıdan kóp ýaqyt kerek bolady. Al, Golovkın-Sonders jekpe-jegine 3 aıdan sál asatyn ýaqyt bar edi. Osynyń bárin nazarda ustaǵan Gennadııdiń komandasy Sonderske qarsy ótetin jekpe-jekten mádenıetti túrde bas tartqan bolýy múmkin.
Ekinshi sebep
Gennadıı Golovkınniń brıtandyq boksshyǵa qarsy kezdesý ótkizýden bas tartýynyń ekinshi sebebi kúzge josparlanǵan Golovkın-Alvares jekpe-jegi. Álem jankúıerleri eki boksshy arasyndaǵy judyryqtasýdy 2 jyldan beri taǵatsyzdana kútip júr. Jáne bul kezdesýdiń ótýi bıyl shyrqaý shegine jetti jáne eki tarap ta úlken somadaǵy qarjyǵa kenelmek.
Eger bul jekpe-jek bıyl uıymdastyrylmasa, Golovkın Sonderspen shyǵyp, orta salmaqtaǵy barlyq belbeýdi ıelense, Golovkın-Alvares jekpe-jeginiń mańyzdy bolmaı qalýy múmkin. Árıne, WBO belbeýi úshin Djo Sonders sııaqty ustatpaıtyn boksshymen judyryqtasý Golovkın úshin tıimdirek. Biraq, meksıkalyq boksshynyń promoýteri Golovkınmen jekpe-jektiń quny qazir eń joǵarǵy deńgeıge jetkenin bilip, Oskar De La Hoıa bul kezdesýdi bıyldan qalmaı uıymdastyrǵysy keledi.
Kásipqoı boks bıznes bolǵan soń eki tarap ta qomaqty qarjydan qaǵylyp qalǵysy kelmeıdi. Tom Lefller de Golovkınniń Sonderske qarsy ótkizetin jekpe-jekte jaraqat alyp qalýynan emes, qyrkúıektegi jekpe-jektiń ótpeı qalýy qaýpinen brıtandyq boksshymen kezdesý ótkizýden bas tartqan bolýy múmkin.
Túıin
Jalpy, Golovkın komandasynyń Sonderske qarsy jekpe-jek ótkizýden bas tartýy Golovkın-Alvares kezdesýin uıymdastyrýǵa múddeli ekenin ańǵartady. Sondaı-aq, Saýl «Kanelo» Alvares 6 mamyr kúni otandasy Hýlıo Sezar Chavespen jekpe-jekten keıin orta salmaqqa, ıaǵnı Gennadıı Golovkınniń salmaǵyna aýysatynyn habarlady. Demek, Golovkın-Alvares kezdesýiniń uıymdastyrylýy 80 paıyzǵa belgili bolǵan sııaqty. Degenmen, bizdiki tek boljam, al naqty resmı habarlamany aldaǵy ýaqytta eki boksshynyń resmı ókilderi jarııalaýy tıis.
Álı Bıtóre,
«Egemen Qazaqstan»
