Ásire ásersiz sóz – osy. Qytaıdyń Chansha qalasynda qańtardyń orta sheninde bastalǵan «Singer-2017» baıqaýy senbiniń keshinde máresine jetti. Kúlli dúnıe kóz tikken bedeli bıik dodada baq synaǵan qandasymyz Dımash Qudaıbergen ekinshi tuǵyrdan kórindi. Jankúıerlerdiń deni áttegen-aı dese de, gonkongtik ánshiniń (Sandy Lam) jerlesimizden bir tutam ilgeri ozǵandyǵy zańdy da. О́ıtkeni, jarystyń da, júldeniń de ıesi – jer betindegi eń kóp halyq.
Sózimiz tushymdy bolý úshin, baıqaý barysynan az-kem baıandasaq. Dımashtyń dańqyn asqaqtatqan dodanyń on tórt kezeńinde de qazaq balasy únemi úzdikterdiń qatarynan kórindi. Shyn daryn men saf talantqa bas ıgen mıllıard-
tar qandasymyzdy «Azııanyń eń tanymal ánshisi» ataǵymen marapattady. Buǵan qosa, ánshi «17th China Music Awards» sharasynda «Halyqaralyq deńgeıdegi tanymal ánshi» júldesin de qanjyǵasyna baılady.
Birinshi kezeń bárimizdiń esimizde. Fransýzdyń «SOS d’un terrien en détresse» ánin oryndap, kórermen qoshemetine bólengen Dımashty qytaılyq mýzyka mamandary sol kezde-aq «Táńir nazaryna alǵan ánshi» degen. Al bizdiń ánshimizge elitken ulttyń baqandaı
3 mıllıon tabynýshysy qazaqsha úırene bastady. Dımashtyń alǵashqy áninen keıin áleýmettik mıkroblogyna jazylýshylardyń sany bir saǵatta 35 myńnan 118 myńǵa jetkenin qaıtersiz.
Kelesi básekede Dımash reseılik áıgili ártis Vıtastyń «Opera 2» atty shyǵarmasyn asa joǵary deńgeıde shyrqap, mereıimizdi ústem etkeni este. Sol tusta ǵoı kópshilik ony «Ekinshi Vıtas» ataǵany. Alaıda, týǵan topyraǵyn kıe tutatyn ánshi «Men qazaqtyń Dımashymyn» dedi.
Iá, bas júldeni enshilemese de Dımashty álem tanydy. Onyń oryndaýshylyq sheberligi men eshkimge uqsamaıtyn erekshe daýsyna álemdik sahnadaǵy óner juldyzy Lara Fabıan tańdanyp, ataqty akter Djekı Chan betpe-bet júzdesýge keldi. Dımash myqtylardyń yǵyna jyǵylmaı, óz ultynyń namysyn bıik ustaǵany da abyroı boldy.
Ulttyq namys degennen shyǵady, ánshimizden jankúıerleri «Súıikti kitabyń qandaı?» dep surasa, Muhtar Áýezovtiń «Abaı joly» romany týraly aıtyp beripti. Sodan keıin ádebıetimizdiń klassıkalyq týyndysynyń qytaı tilindegi aýdarmasynyń satylymy da kúrt artqan kórinedi. «Dımash oqyǵan kitapty biz de oqýymyz kerek» deıtin ózge ult ókilderiniń shoǵyry qalyń.
Jetinshi kezeń she?.. Jetinshi kezeńde Dımash óz repertýaryndaǵy «Daıdıdaý» ánimen tyńdarmandardyń janyn tebirentti. Qytaı jurty qazaqtyń saf ulttyq óner naqyshyna tánti boldy. Qazaq balasynyń áninen keıin onyń jobadaǵy áriptesi, qytaılyq ánshi Lı Jıan: «Dımashtyń áni asa shynaıy shyqty. Onyń bul ándi janyna sińirgeni baıqalady. Dımashtyń kózinde ómirdiń san qyryn kórgen adamnyń beınesi bar. Bul onyń ártistik qabileti emes, talanty», dep ádil baǵasyn berdi.
Osy joba Dımashty Qytaı eline tanytsa, Dımash ta atalǵan baıqaýdy basqa shet elderge tanytty deýge bolady. Sebebi, ol aǵylshyn, orys, fransýz, ıtalıan tilderinde ánder shyrqady. «Qytaıda Dımash pen Qazaqstan qazir egiz uǵymǵa aınaldy. Men muny óz kózimmen kún saıyn kóremin. Dımashty Qytaıdyń toqsan paıyzy biledi desem, ótirik bolmas» deıdi ánshiniń menedjeri Alpamys Sharımov.
Onyń aıtýynsha, jankúıerleri Dımash sahnaǵa kıip shyqqan kıimdi kıgisi, onyń qolyndaǵy zattardy ustaǵysy keledi eken. Endi bizdiń uldyń beınesimen kompıýterlik oıyndar shyqpaq. Onda da Dımash kórermenderimen «Daıdıdaýdy» salǵan beınesimen júzdesedi.
Sońǵy báseke jaıynda birer sóz. Dımash onda ózin «Mýzyka salasyna tóńkeris ákelgen talantty ánshi» dep moıyndaǵan qytaılyq tanymal ónerpaz Shan Venszemen qosylyp, Maıkl Djeksonnyń «Earth Song jáne Dangerous» ánderin oryndady. Qytaıdaǵy aqparat quraldary men áleýmettik jelilerinde qandasymyzdy jobadaǵy «Sýper ánshi», «Singer-2017» telejobasynyń brendi» dep baǵalaǵandar da kezdesedi. Mıllıondaǵan pikirlerdiń ishinde Qytaıdaǵy tanymal «Netease» saıtynyń pikiri bylaı órbıdi: «Dımash jobada jarqyrap kózge tústi de, kókjıekti jaryp shyqqan qanatty tulpardaı álem keńistigine samǵady. Ol joba barysynda mıllıondaǵan jandardy ózine tánti etip, aýdıtorııasyna tereń mahabbat darytty. Fınaldyń nátıjesi qalaı bolsa da, Dımash bul jobanyń jeńimpazy».
Aıta keteıik, júldegerlerdiń taǵdyryn kórermen zalynda otyrǵan 500 adam sheshti. Olar aqyrǵy jeńisti tartysqa toly básekede barlyq kezeń boıynsha Dımashpen úzeńgi qaǵystyryp kele jatqan Sandy Lam-ǵa bergen.
Ashat RAIQUL,
«Egemen Qazaqstan»
